D sẽn tigimd neb sẽn gomd goam toɛy-toɛyã fãa to-to
1 Wẽnnaam Gomdã paamda pidsgu! Neb sẽn ‘gomd goam toɛy-toɛyã fãa’ sakda sɩd balengã. (Zak. 8:23, Sebr Sõngo) Wãn-wãn la a Zeova Kaset rãmbã sõngd neb “sẽn yi soolem fãa, la buud fãa, la neb sẽn gomd goam toɛy-toɛya fãa” tɩ b tõog n yɩ yɩlem Wẽnnaam taoore, n wa paam n põs ‘to-kãsengã’?—Wil. 7:9, 14.
2 Wẽnnaam siglgã sẽn maand bũmb ninga: Siglgã taoor lʋɩtb sull maana segls tɩ b yiis sɛb sẽn tik Biiblã zug buud-goam sõor sẽn zems 380 pʋsẽ, sẽn na yɩl tɩ dũniyã gill fãa neb tõog n bãng koe-noogã yõodo. Yɩl n yiis sɛbã buud-goam wʋsg pʋsẽ woto ka tʋʋm bil ye. Rẽ baoodame tɩ b tigim seb-lɛbgdb sẽn tar tõog n kõ-b sõngr ning b sẽn datã tɩ b lebg sɛbã buud-gom-kãensã pʋsẽ, n yiis-b n tool zĩis toɛy-toɛya. La yaa koe-moondbã yembr-yembr sẽn taasd nebã Biiblã fãagr koɛɛgã zut la tʋʋmdã meng tɩ zao n yɩɩda.
3 D sak tʋʋm toogo: Masã tẽns wʋsg tara sãamb wʋsg sẽn gomd buud-gom zẽna. Sẽn na yɩl n tõog n moon nin-kãensã koe-noogã, Wẽnnaam sõgen dãmb sõor sẽn tar paasg n modg n zãmsd Ɛspayõlle, Ris, Sinoa la buud goam a taab neb wʋsg sẽn nong n gomd bãmb babgẽ wã. Koe-moondb a taaba zãmsda Etazĩni la Fãrens mugs goama. Afiriki, b moonda koe-noogã buud-goam ka tɛk pʋsẽ. Neb wʋsg sẽn da zɩ n wʋm a Zeova kɩbare, bɩ sẽn ka mi Biiblã sakda sɩd ning sẽn be Wẽnnaam Gomdã pʋgẽ wã .—Rom 15:21.
4 D tõe n modga sõma n paas n taas koe-noogã buud a taab neb sẽn be tõnd moonegã zĩigẽ bɩ? (Kol. 1:25) Tigims wʋsg siginda moonegã tʋʋmd bu-zẽmsã neb sẽn be b babgẽ wã yĩnga. Koe-moondbã rengd n zãmsa buud-gomdã tɩ sek b na tõog n wilg koɛɛgã nana-nana woto: “Ne y yibeoogo (bɩ y ne y zaabre). M tara koe-noog n dat n taas-yã. [Rẽ poor bɩ y kãab a soabã seb-vãoog bɩ seb-bil sẽn be buud-gom kãng pʋgẽ.] Wẽnd na kõ-d nindaare.” A Zeova sɩd barkda sɩngr a woto sẽn ka zem baa fɩ wã!
5 Rĩungã koɛɛg bee yamleoog ne neb sẽn yit zĩis toɛy-toɛy la sẽn gomd buud-goam toɛy-toɛya. Bɩ d bao soay n taas-b koe-kãnga.