Moon-y Rĩungã koɛɛga
1 ‘Yaa tɩlae tɩ mam moon Wẽnnaam soolem koe-noogã; tɩ bõe, b tʋma maam bõn-kãng yĩnga.’ (Luk 4:43) A Zezi gom-kãensã wilgdame t’a koe-moonegã tikr yaa Wẽnnaam Rĩungã. Koɛɛg ning tõnd sẽn moond rũndã-rũndã wã me tika Wẽnnaam Rĩungã zugu. Matɩe 24:14 reng n togsa rẽ n yeele: “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.” Sɩd bʋs sẽn tɩ loe ne Wẽnnaam Rĩungã la neba segd n wʋme?
2 Wẽnnaam Rĩungã bee saasẽ n dɩt naam masã, la ka la bilfu a na n ledga ninsaalbã naam. B zoe n diga a Sʋɩtãan n yiis saasẽ, tɩ dũni wẽng kãngã kẽ a yaoolem day pʋsẽ. (Wil. 12:10, 12) B na n sãama a Sʋɩtãan dũni wẽngã zãng-zãnga, la Wẽnnaam Rĩungã kõn dĩms ye. A na n paa wakat sẽn ka sɛta.—Dan. 2:44; Heb. 12:28.
3 Rĩungã na n kɩtame tɩ ninsaalb nins fãa sẽn yaa sakdbã paam bõn-sõma nins b sẽn datã. A na n kɩtame tɩ ninsaalbã tɩlg ne namsg ning zabã, bi-beerã, weoogrã, la naongã sẽn wat ne wã. (Yɩɩl 46:9, 10; 72:12-14) Neba fãa na n paama rɩɩb wʋsg tɩ sek-ba. (Yɩɩl 72:16; Ezai 25:6) Bãasã la komslem buud fãa ka na n leb n zĩnd ye. (Ezai 33:24; 35:5, 6) Yaa ãdem-biisã sã n wa zemsd zãnga, la b na n toeemd tẽngã t’a lebgd arzãna, tɩ nin-buiidã sẽn be a zugã na n vɩɩmd ne taab zems-n-taar pʋgẽ.—Ezai 11:6-9.
4 Yaa ne tõnd sẽn vɩ d vɩɩmã to-to masã wã la d wilgd d sã n dat n yɩɩ Wẽnnaam Rĩungã soolem neba. Rĩungã koɛɛg segd n toeema tõnd vɩɩmã tõre, wala tõnd bõn-datɩ wã la yɛl nins d sẽn ningd pipi zĩigẽ wã. Wala makre, baa d sẽn segd n tʋm n dɩlg d zakã neba, d ka na n bas tɩ laogã yɛl pak-d tɩ loog tɩ d yĩm Rĩungã yɛl ye. (Mat. 13:22; 1 Tɩm. 5:8) Wall tɩ yɩ woto wã, d segdame n tũ a Zezi sagl-kãngã: “Bɩ y reng n bao Wẽnnaam soolem ne bãmb tɩrlem, la bõn-kãens fãa [vɩɩmã bõn-datmã] na paas yãmba.”—Mat. 6:33.
5 Yaa yãgb yell tɩ neba wʋm la b sak Rĩungã koɛɛg tɩ ket n nan tõeyã. Bɩ d sõng-b tɩ b maan dẽ, n wilg-b tɩ ‘Wẽnnaam soolem koɛɛgã sɩd yaa sɩda.’—Tʋʋ. 19:8.