Segl-paalg Rĩung Rotã sɛb bĩngr zĩis yĩnga

Sẽn na maan yʋʋm wʋsgo, Rĩung Roog sɛb bĩngr zĩigã b sẽn da boond pĩnd tɩ Wẽnnaam Tʋʋmdã lekoll sɛb bĩngr zĩigã nafa tigimsã dũniyã gill zugu. Pĩndã, b ra tagsame tɩ tiging fãa segd n tara a meng sɛb bĩngr zĩiga. La masã sẽn mik tɩ tigims wʋsg n tõe n tigimd Rĩung Ro-yɛng pʋgẽ wã, tɩ wakat ning me bɩ buud-gom zẽn tigims naagã, b getame tɩ yaa sõma n yɩɩd tɩ Rĩung Roog fãa pʋgẽ, bɩ buud-gomd sull fãa tar sɛb bĩngr zĩ-yɛnga, sẽn tar pĩnd la masã sɛbã fãa. Rĩung Roog sã n tar tigisg rot sẽn ta a yiib bɩ yɩɩd woto, tigisg roog fãa segd n tara a sɛb bĩngr zĩig buud-gomd sull fãa yĩnga, tigims nins sẽn tigimd be wã yĩnga.

D tẽedame tɩ segl-kãngã na n sõngame tɩ b paam weer n paas la b boog depãens rãmbã. Sẽn paase, b sã n fãoog tigims a yiib bɩ sẽn yɩɩd woto sɛb bĩngr zĩis taaba, yaa vẽeneg tɩ sɛb bĩngr zĩ-paalgã na n talla sɛb wʋsg n yɩɩge. Fãoogrã poor tɩ b sã n mik tɩ sɛb kẽer lebg yiib-yiib bɩ yɩɩd woto, b tallda a yembr la b rɩk sẽn kellã n bĩng Rĩung Ro-paals b sẽn na n wa me yĩnga. Rĩungã Roog sã n tar ordinatɛɛr tɩ Watchtower Library ne CD-ROM be a pʋgẽ, neb kẽer na n mikame t’a yaa tʋʋm teoog sẽn be nafr wʋsgo.

Rĩung Roog sɛb bĩngr zĩig fãa pʋgẽ, yaa saam-biig a ye n segd n ges sɛbã yelle, la zemsame n yɩɩd tɩ yɩ yel-gɛt a yembr Wẽnnaam Tʋʋmdã Lekoll yel-gɛtb sʋka. Bilf-bilfã a na n paasda sɛb nins sẽn zemsã sɛbã bĩngr zĩigẽ, la a gʋls sebr fãa pʋgẽ vẽeneg n wilg tɩ yaa Rĩungã Roog sɛb bĩngr zĩig n so. Vugr bɩ sẽn yɩɩd woto yʋʋmd fãa, a segd n gũusame n ges sɛbã fãa sã n beeme la b sã n ket n yaa sõma. B ka segd n yi ne sɛbã bĩngr zĩigẽ sebr Rĩungã Roogẽ ye.

Tigingã neb fãa ket n nanda Rĩungã Roog sɛb bĩngr zĩig hal wʋsgo. Bɩ d mengã wilg naneb ne Rĩungã Roog sɛb bĩngr zĩig n ges a yell la d tũnug ne-a n bao n paam ‘Wẽnnaam bãngr’ meng-mengã.—Yel. 2:5.