‘D yãg wa fɩtl dãmba’
1 Masã zãmaanã vɩɩm la a tẽeb sẽn sãamã pʋgẽ, sɩd Wẽnnaam a Zeova balemdb sẽn yɩɩd milyõ a yoob n ‘yãgd wa fɩtl dãmb’ tẽns 234 pʋgẽ dũniyã gill zugu. (Fil. 2:15) Rẽ kɩtame tɩ d yaa toor ne neb a taabã. Wãn to la d pukd sɩdã vẽenem sẽn tar yõod wʋsgã sẽn yit a Zeova nengẽ wã?—2 Kor. 3:18.
2 Tõnd tʋʋmã: Tõnd yel-manesmã yaa bũmb nebã sẽn yãt nana-nana. (1 Pɩɛ. 2:12) Pag a yembr n da yã t’a tʋmd-n-taag sẽn yaa Kaset soab yaa nin-sõngo, n sõngd neba, la a ka gomd gom-dẽgdo, bɩ n laadẽ, neb a taab sã n maand kʋʋsem yood ye. Neb a taabã sã n da mak n na n gom gom-dẽgd Kaset soabã sɛɛgẽ n bao a noore, a kelld n sĩndame, n ka sakd n maan sẽn pa tɩrg ye. Rẽ talla pãn-tusdg bʋg pagã zugu? A yeela woto: “A manesmã zĩnda yamleoog wʋsg ne maam hal tɩ m da sɩng a sogsg Biiblã zugu. Mam sɩnga Wẽnnaam Gomdã zãmsgo, n wa reeg lisgu.” A paasame: “Yaa yẽ manesmã n kɩt tɩ m sak n zãms a Zeova Kaset rãmbã tẽebo.”
3 Yaa tõnd sẽn tar manesem ning ne pãn-soaadbã, tõnd sẽn tagsd to-to ne dũniyã neb manesmã, la d sẽn gomd gom-sõma wã n kɩt t’a Zeova Kaset rãmbã yaa nin-buiid sẽn yaa toor ne neb a taabã. B yaa neb sẽn tũud Biiblã noy sẽn yaa sõma wʋsgã. Tʋʋm sõma a woto kõta a Zeova ziiri, la kɩtdẽ tɩ neb a taabã rat n balm-a.
4 Tõnd goamã: Yaa vẽeneg tɩ neb nins sẽn ne tõnd manesem sõma wã tõeeme n ka bãng tõnd sẽn yaa toorã võor tɩ sã n ka tõnd n togs-b d tẽebã ye. Rẽ yĩnga, yãmb tʋmd-n-taasã la y karen-bi-taasã miimi tɩ y ya a Zeova Kaset soab bɩ? Yãmb baooda soay n na n tũnug ne sõs-zaalg bal n kõ kasetã bɩ? Yãmb yãka yam n na n kɩt tɩ ‘yãmb vẽenem yãg neba sʋk’ wakat sẽn zems fãa pʋgẽ bɩ?—Mat. 5:14-16.
5 Rẽnda d maan modgr sõma n tõog n pids d tʋʋmd ning sẽn yaa yãg wa fɩtl dãmbã. D sã n dat n maan tʋʋmdã ne d sũur fãa, rẽ na n kɩtame tɩ d bas yɛl nins yõod sẽn paoodã, sẽn na yɩl n maan yõe fãagr tʋʋmd ning sẽn yaa moon la d maan karen-biisã sõma wa d sẽn tõe tɛka.—2 Kor. 12:15.
6 Bɩ d ket n yãgd wa fɩtl dãmb ne d tʋʋmã la d ne d goamã! D sã n maan woto, tõeeme n kɩt tɩ neb a taabã wa naag-d n pẽg a Zeova.