Tigims gĩnd tigis-kãseng paalga
1 Tõnd Zusoabã reng n togsame t’a karen-biisã na n paama namsgo. (Mat. 24:9) Wãn-wãn la d segd n ges makrã? Bõe n na n sõng tõnd tɩ d tõog n yals kãn-kãe namsg taoore? Yʋʋmd 2004 tʋʋmd yʋʋmdã tigims gĩnd tigis-kãsengã na n leoka sogs-kãensã. A gom-zugã yaa: ‘Maan-y sũ-noog ne saagrã. Maan-y sũ-mar toog pʋgẽ.’—Rom 12:12.
2 Gom-n-dees-taab a yiibu: Pipi gom-n-dees-taabã gom-zug sẽn yaa ‘Wom-y biis ne sũ-marã’ na n wilga tõnd manesem toɛy-toɛy d sẽn tõe n tũnug ne n wom biisi. Koe-moondb la b na n bool n sok tɩ b togs b sẽn moond la b zãmsd nebã to-to n ningd b mens yamẽ tɩ yaa yãgdem tʋʋmde. Sẽn yɩɩd fãa roagdbã na n tʋlgame n kelg sõasg ning gom-zug sẽn yaa “A Zeova sã n kibl tõndã” neere, bala a na n goma roagdbã sẽn tõe n yẽs ne b kambã to-to. Gom-n-dees-taabã yaoolem sõasd na n wilga bũmb ning d sẽn tog n maan sẽn na yɩl tɩ dũniyã ra sãamd tõnd tẽebã bilf-bilfu, tɩ rẽ kɩt tɩ d ka wom biisã.—Mark 4:19.
3 Gom-n-dees-taab a yiib-n-soabã gom-zug yaa “D zoe zoeesã n da yɛ ye.” A na n wilga tõnd vɩɩmã sẽn wõnd wala zoees to-to vẽenega. Bõe yĩng tɩ d segd n zoe zoeesã tɩ zems ne zoeesã siglg noya? Wãn to la d na n tõog n bas zɩɩb buud fãa n da yɛ zoees ning d sẽn zoet vɩɩmã yĩngã pʋgẽ? Sagls nins sẽn zems tõnd wakatã, sẽn tik Gʋlsg Sõamyã zug b sẽn na n kõ wã na n sõng-d lame tɩ d ket n zoet zoeesã n da yɛɛdẽ ye.
4 Sũ-marã kɩtdame tɩ d ta Wẽnnaam yam: Sõss nins kaagr yel-gɛtbã sẽn na n kõ wã na n kenga neb nins sẽn na n kelg saglsã la b tũ-bã tẽebo. Tigims gĩn sull yel-gɛtã sõasg a ye gom-zug yaa “Sũ-marã kɩtdame tɩ d ta Wẽnnaam yam.” Zãma sõasgã na n leoka sogs-kãensã: Tẽnsã segd n talla saagr ne ãnda yʋʋre, la bõe la rẽ baood tɩ tõnd maane? Baasg sõasgã gom-zug sẽn yaa “Ne sũ-mare yãmb na n fãaga y mensã” na n wilga tõnd a Zezi sẽn tõog n tall sũ-mar yel-kɛg taoor n ka tall sũ-toog to-to wã.
5 Tẽeg-y n tall y École du ministère sebrã la Gũusg Gasg ning b sẽn na n zãms semen kãngã n wa. Gʋlsd-y tagsa sẽn na n sõng-y tɩ y kelg neere, la y sẽn na n tõog n lebg n ges nindaare. Kaoosg zugu, b na n maana tigis-kãsengã sõss lebg-n-ges tigingã pʋgẽ.
6 A Zeova mengã n segl tẽeb kibs kãngã. Wa n dɩ-y-yã! D na n yɩɩla ne sũ-noogo, d sã n zĩnd tigis-kãsengẽ wã n kelg a sõssã fãa.—Ezai 65:14.