Daar a yembr tigis-kãseng paalga

Rũndã-rũndã kɩbay wʋsg n be n wilgd ned sẽn tõe n maan to-to n kogl a sũur ne bãas n tõog n paam sũ-noog la yõ-woko. La sẽn tar yõod n yɩɩd meng yaa tõnd makr wɛɛngẽ sũurã laafɩ koglgo. Rẽnd sɩd yaa bũmb sẽn zemse, daar a yembr tigis-kãsemsã sẽn sɩngd yʋʋmd 2003 bõn-bɩʋʋng kiuugã pʋgẽ wã gom-zu-raoog sẽn yaa, “D tũ a Zeova ne d sũur fãa” wã. (1 Kɩb. 28:9) Yaa bõe la d na n zãmse?

Tigims gĩnd yel-gɛtã na n wɛgsa sõasg ning gom-zug sẽn yaa ‘D sõng neb a taabã tɩ b tũ a Zeova ne sũ-noogã.’ Bool-n-sogsã na n wilga lebg n tɩ ges neb nins sẽn dat n tũ a Zeova wã la Biiblã zãmsg ne-bã sẽn wat ne sũ-noog ninga. Sãmbg sẽn ka be, sõasd sẽn yaa kaagdã pipi sõasg na n kenga sẽn na n wa-bã fãa pels la b raoodo. Sõs-kãng gom-zug yaa “D sẽn na n kogl d sũyã dũni sẽn gudg pʋgẽ to-to.” Yaa lisgã sõasg n na n baas yibeoogã tigim-taaba.

Wĩnd-kaoorã, sõasg ning gom-zug sẽn yaa ‘D kõ d sõngrã’ na n goma tõnd sẽn tõe n maan to-to n sõng neb a taabã yelle. Bõe la roagdbã tõe n maan n kogl b kambã sũy ne pãn-tusd-wẽns la b sõng-b tɩ b pẽneg a Zeova? Sõasg ning gom-zug sẽn yaa “Sõng-y kambã tɩ b maan sũ-noog ne a Zeova” wã pʋgẽ, b na n kõo sagls sẽn zemse, la b wilg rẽ sẽn tõe n maan to-to.

Tõnd dɩta segls nins fãa a Zeova sẽn maand sẽn na yɩl n kogl tõnd makr wɛɛngẽ sũurã t’a tall laafɩ la raooda nafa bɩ? Sõasd sẽn yaa kaagdã yaoolem sõasg gom-zug sẽn yaa “Ket-y n tũud a Zeova ne y sũur fãa” wã na n wilga yel-kãsems a naas d sẽn segd n maan tɩ d tẽebã kell n tall pãngã. Hal sẽn ta zĩ-bʋg la d rɩkd sẽk la d maand modgr n pʋʋsd ne d sũur fãa, n zãmsd Wẽnnaam Gomdã, n moond koe-noogã ne yẽesem, la d maand lagem-n-taar ne kiris-neb a taabã? Rẽ yĩngã, zĩ-kãensã wɛɛngẽ, d tõe n maaname tɩ yɩ sõma n paas bɩ?

A Zeova sagenda tõnd woto: “Reeg saglgo la f kelg yam dãmb goama.” (Yel. 23:12) Reng-y n maan segls masã sẽn na yɩl n wa zĩnd tigis-kãsengẽ wã ra-kãnga, n paam zãmsg sẽn be nafa, sẽn tik Gʋlsg Sõamyã zugu. Woto maaneg na n paasa d pãng tɩ d ket n balemd a Zeova ne d sũur fãa la ne sũ-noogo.