Pẽgr kengda pɛlga
1 Bipugl kɩdgã sẽn da wa n kẽed gãagã, a ra yãbdame n yetẽ: “Rũndã mam pa yɩ bi-sõng la?” Sok-kãngã linga a ma wã. Baa ne a ma wã sẽn yã t’a biigã modga raarã pʋgẽ n tall manesem sõma wã, a ka tol n pẽg-a baa bilf ye. Biigã sẽn yãb b sẽn ka pẽg-a wã yĩngã tẽegda tõnd fãa, kãsemb la kamba, tɩ d rata pẽgre. Rẽ yĩnga, tõnd pẽgda neb nins sẽn be ne tõndã bõn-sõma nins b sẽn maanda yĩng n kengd b pels bɩ?—Yel. 25:11.
2 Tõnd kiris-nin-taasã maanda bõn-sõma wʋsg sẽn sek d na pẽg-ba. Kãsem dãmbã, kãsemb sõngdbã, ne so-pakdbã modgda wʋsg n tʋmd b tʋʋmã. (1 Tɩm. 4:10; 5:17) Roagdb sẽn yaa wẽn-zoɛtb maanda b sẽn tõe fãa n wubd b kambã a Zeova soayã pʋsẽ. (Ef. 6:4) Kiris-neb sẽn yaa kom-bɩɩsã maoodame n kɩɩsd “dũniyã yam.” (1 Kor. 2:12, NW; Ef. 2:1-3) Neb a taab balemda a Zeova ne kɩs-sɩda, baa b sẽn kʋʋlã, b sẽn bẽedã, bɩ b sẽn maood ne makr a taabã. (2 Kor. 12:7) Nin-kãensã fãa zemsa pẽgre. Rẽ yĩnga, tõnd sak n deegame tɩ modgrã b sẽn maandã zemsa pẽgr bɩ?
3 Pẽgr b sẽn pẽgd neb takɩ: B sã n zĩnd ɛstaraarã zug n pẽg tigingã neba, d fãa sũy sɩd yaa noogo. La sã n yaa tõnd mengã la b pẽg-yã, pẽgrã kengda pɛlg n yɩɩda. Wala makre, a Poll sẽn tool Rom dãmbã lɛtr ningã sak 16 pʋgẽ, a pẽga neb takɩ wʋsgo, wala a Foebe, a Pirska ne a Akila, a Tirfɛn ne a Tirfooze, n paas a Pɛrsiide. (Rom 16:1-4, 12) Ad a goamã sɩd kenga nin-kãensã sẽn yaa wẽn-zoɛtbã pelse! Pẽgr a woto kõta tõnd sãam-biisã la d saam-bi-pogsã bas-m-yam tɩ b tara yõodo, la pẽnegd tõnd ne-b n paasdẽ. Rẽ yĩnga, sẽn pa kaoos pʋgẽ yãmb pẽga ned takɩ bɩ?—Ef. 4:29.
4 Pẽgr sẽn maan ne pʋ-peelem: D sã n dat tɩ d pẽgrã sɩd keng neba pelse, rɩlla yɩ ne pʋ-peelem. Nebã tõe n bãnga tõnd pẽgrã sã n yaa ne pʋ-peelem bɩ a sã n yaa “no-noom” bala. (Yel. 28:23) Tõnd sã n modgd sõma n get neb a taabã zʋg-sõma, rẽ na n kɩtame tɩ d tʋlg n pẽg-ba. Bɩ d nong n pẽgd neb a taabã sõmb-sõmb ne pʋ-peelem, n miẽ tɩ “goam sã n zems a wakate, a yaa noogo!”—Yel. 15:23.