D wilg tɩ nebã yell pak-d lame, ne d sẽn na n pẽgd-ba
1 F sã n pẽg ned ne pʋ-peelem, kengda a raoodo, noogda a sũuri, la kɩtdẽ t’a tʋll n maan modgr n paase. Koe-moondb wʋsg yãame tɩ koe-moonegã pʋgẽ, b sã n pẽg ned ne pʋ-peelem baa yaa bilfu, b paamdame t’a soabã kelg koɛɛgã. Wãn-wãn la d tõe n pẽg nebã d sẽn wat n taasd-b koe-noogã?
2 D yɩ neb sẽn gũusd n getẽ: A Zezi sẽn wa n vʋʋg n leb saasẽ wã, a gũusame n ges Aazimineer tigimsã tʋʋmã, n yã b tʋʋm-sõma wã n pẽg-ba. (Wil. 2:2, 3, 13, 19; 3:8) Woto, rũndã-rũndã me, neb nins tõnd sẽn segd koe-moonegã pʋgẽ wã yell sã n sɩd pak-d lame, d na n baooda soay n pẽgd-ba. Wala makre, d sã n yã ned sẽn pɩɩs a zak tɩ yaa yɩlemde, pa rẽ bɩ d yã roagd sẽn maand bũmb tɩ wilgdẽ t’a nonga a kambã, wall ned sã n deeg-d sõma, d tõe n tũnuga ne rẽ n pẽg a soaba. Yãmb mi n gũusd n geta yel-kãensã buud n paamd n pẽgd nebã bɩ?
3 D yɩ neb sẽn mi kelgre: D sã n moond nebã koɛɛgã, bɩ d sogsd-b sogsg b sẽn tõe n leoke. D waoogd-b n kelgd b sẽn yetã neere. (Rom 12:10) D sã n maand boto, d tõe n yãa bũmb b goamã pʋgẽ n pẽg-b ne pʋ-peelem, tɩ kɩt tɩ d paam zems-taab zĩig n tik rẽ n sõse.
4 D gomd ne yam: D kɛlgd sã n yeel bũmb tɩ pa zems ne Biiblã sẽn yetã, d segd n maana wãna? Wall tɩ d kɩɩs a sẽn yeelã, d tõe n wilgame tɩ d nanda a goamã n yeel woto: “Yãmb leokrã wilgdame tɩ y tagsa yel-kãngã zug wʋsgo.” (Kol. 4:6) Baa ned sã n kɩɩsd tõnd sẽn yetã, d tõe n mi n pẽg-a-la a sẽn wilgd t’a nanda yell ning zug d sẽn sõsd ne-a wã yĩnga. Woto tõe n kɩtame tɩ ned sẽn wõnd a pa tol n dat n kelg koe-noogã kɩɩsg booge.—Yel. 25:15.
5 D sã n dat n pẽg nebã tɩ keng b raoodo, d segd n pẽg-b-la ne pʋ-peelem. D sã n maand boto, d pẽgda a Zeova, la tõe n kɩtame tɩ nebã kelg Rĩungã koɛɛgã.