Meng yalẽ sẽn yaa sõma la sẽn zems ne pẽgre
1. D sẽn segend tigims gĩn sull tigis-kãsengã, bõe yĩng tɩ d segd n tags d yalẽ wã yelle?
1 “A Zeova Kaset rãmbã yaa nin-sõma wʋsgo! Yãmb nebã yaa nin-sõma, n ningd b futã sõma, sẽn paase b waoogda neb sõma.” Yaa woto la lotɛll taoor soab a yembr yeel saam-biisã la saam-bi-pogsã wɛɛngẽ rɩẽ tigims gĩn sull tigis-kãseng a yembrẽ. Tigis-kãseng a toẽ, lotɛll tʋm-tʋmd a yembr n yeel woto: “Yaa vẽeneg tɩ yãmb nebã ningda b futã sẽn na yɩl n ta Wẽnnaam yam.” Sɩda, neb a taabã gũusd n geta neb nins sẽn wa tigis-kãsengã. Rẽ n so tɩ tõnd rat n ning teed sẽn ‘zems ne koe-noogã,’ tɩ naoor wʋsgo, rẽ kɩtdame tɩ sẽn pa-b Kaset rãmbã pẽgd tõndo, la b ne vẽeneg tɩ tõnd yaa Wẽnnaam sõgen dãmba. (Fil. 1:27) Zemsame tɩ d sẽn segend tigims gĩn sull tigis-kãsengã, bɩ d reng n tags d yalẽ wã yelle.
2. Bõe yĩng tɩ yaa toog tɩ d ning fut la d maneg d mensã tɩ yɩ sõma?
2 Karen-biig a Zak gʋlsame: “Yam ninga sẽn yit yĩngra deng n yaa sõama.” (Zak 3:17) Modg tɩ d yalẽ wã yɩ sõma wã ka nana ye. A Sʋɩtãan dũniyã sẽn yaa yoob dũniyã tusda nebã tɩ b ningd fut sẽn ka zemse, wala wilg-m-meng futu, fut sẽn nekd pag ne rao lageng tʋlsem bɩ fu-yoodo. (1 Zã 2:15-17) Woto yĩnga, d sã n wa baood n na n yãk d sẽn na n ning fut nins la d maneg d mensã to-to wã, bɩ d tũ Biiblã sagls sẽn yet “tɩ d bas Wẽnnaam kɩɩsgo la dũniyã ratem sẽn yaa wẽnsã, la d gũus d mens dũniyã ka masã” wã. (Tɩt 2:12) Yaa tõnd saam-biisã tɩ yaa neb a taab me, d ka tol n dat tɩ bãmb ned ba a ye sũur sãam ne tõnd yalẽ wã sẽn yaa to-to wã ye.—1 Kor. 10:32, 33.
3. Sogs-bʋs n na n sõng-d tɩ d fees d meng n bãng d yalẽ wã sã n zemsame?
3 Fut sẽn zems la sẽn maneg sõma: Y sã n wa segend tigis-kãsengã bɩ y sok y menga: ‘Rẽ yĩnga mam futã zemsame bɩ, bɩ b kɩtdame tɩ neba get maam kɛgr-kɛgre? Rẽ yĩnga, woto wilgdame tɩ m waoogda neb a taabã sẽn tagsd bũmb ninga bɩ? Rẽ yĩnga m korsaasã loor siga wʋsg tɩ b ne m yãoogã wʋsgo, bɩ a tẽngrã yaa koɛɛg wʋsg tɩ loog nugu? Rẽ yĩnga mam futã basdame tɩ b ne m yĩngã babs nins sẽn da segd n ludã, bɩ b sẽbga m yĩngã mupp bɩ? Mam futã yaa yɩlma, la b ka tar yũug bɩ? M sã n wa kokd pemsem tigis-kãsengã sõss poore, m na n ket n tara fut sẽn zems ne Wẽnnaam sõgen bɩ, bɩ m na n basa m futã tɩ yaa yɛɛ la zũnglgu, tɩ ka zems ne ned sẽn wa tigis-kãseng n ning badze? Rẽ yĩnga fut ning m sẽn yer pemsem kokrã wakatã na n kɩtame tɩ m sã n dat n kõ kasetã bɩ yãnd tar-m bɩ?’—Rom 15:2, 3; 1 Tɩm. 2:9.
4. Wãn to la neb a taabã tõe n sõng-d tɩ d tall yalẽ sẽn yaa sõma?
4 Kiris-neb nins sẽn bɩ wã tagsg tõnd sẽn ning d teedã to-to wã zug tõe n sõng-d lame. Pagbã segd n soka b sɩdbã tɩ b wilg-b neb a taabã sẽn na n tags to-to ne b futã. Roagdb nins sẽn yaa kiris-nebã tõe n sõnga b kom-bɩɩsã zĩ-kãngã wɛɛngẽ. Sẽn paase, saam-bi-pogs sẽn kʋʋle, la sẽn yaa wẽn-zoɛtb tõe n tẽega “pʋg-bi [wã] tɩ b . . . yɩ yõk-m-mens rãmba, la gũus-m-mens rãmba” b futã ningrẽ, sẽn na yɩl “tɩ Wẽnnaam goama ra paam tʋʋsg ye.” (Tɩt 2:3-5) Tõnd sɛbã tara fot rãmb sẽn wilgd fut sẽn zems la sẽn maneg sõma sẽn yaa to-to.
5. Wãn to la tõnd fãa tõe n pẽg a Zeova tigis-kãsengã wakate?
5 Pẽg-y a Zeova: Tigims gĩn sull tigis-kãsemsã yaa soay sẽn yaa sõma wʋsg tõnd mengã sẽn tõe n tũnug n pẽg a Zeova, pa sõasdbã la sẽn kẽesd b mens sõssã pʋsẽ wã bal ye. Yaa sɩd tɩ d na n waooga a Zeova ne d kiris-ned manesmã la d goamã. La neb wʋsg sẽn na n deng n ges bũmb ning pipi tõnd nengẽ yaa d futã la d sẽn maneg d mensã to-to wã. Bɩ d fãa pẽg a Zeova, n tall yalẽ sẽn yaa sõma la sẽn zems pẽgre.—Yɩɩl 148:12, 13.
[Zĩ-gũbri, seb-neng a 4]
Sõngr sẽn na yɩl tɩ d yalẽ zems pẽgre
◼ Wẽnnaam Gomdã
◼ Fees-m-menga
◼ Neb a taabã tagsgo
◼ A Zeova Kaset rãmbã sɛbã