Babg a 4 soaba: D sẽn na n zãms nebã Biiblã to-to tɩ b bɩ tẽebã pʋgẽ
D sẽn na n wilg Biibl zãmsdbã zãmsgã sẽn segend to-to
1 Biibl zãmsd sã n dengd n karemd zãmsgã, n dẽesd leoorã, la a tagsd a sẽn na n kõ leoorã to-to ne a meng no-goama, naoor wʋsgo yẽ soabã bɩta tao-tao tẽebã pʋgẽ. Woto yĩnga, yãmb sã n sɩng Biibl zãmsg ne ned n maand rẽ wakat fãa, bɩ y naag taab n segl zãmsg a yembr tɩ Biibl zãmsdã bãng sẽn maand to-to. Ne Biibl zãmsdb wʋsgo, yɩta sõma tɩ y segl sak a ye bɩ zãmsg a ye tõr ne taaba.
2 Leoorã rẽesg la tags-koees gʋlsg sebrã kɩrenga: Wilg-y Biibl zãmsdã a sẽn na n maan to-to n yã zĩis nins sẽn leokd sogsg nins sẽn gʋlsã vẽenega. Wilg-y Biibl zãmsdã yãmb mengã zãmsg sebr t’a ges yãmb sẽn dẽes goam bɩ gom-bi-yẽgã to-to. Y sã n wa maand zãmsgã, yẽ me na n datame n tũ yãmb makrã, n dẽesd bũmb ning bal sẽn na n sõng-a t’a tẽeg leoorã a sebrã pʋgẽ. (Luk 6:40) Rẽ poor bɩ y kos-a t’a kõ leoorã ne a meng goama. Rẽ na n sõng-y lame tɩ y bãng a sã n wʋma zãmsgã võor sõma.
3 Verse rãmb la b gʋls n ka ning b goamã ye. Verse kãens vaeesg neerã yaa bõn-kãseng karen-biigã sẽn segd n maane, a sã n wa segend a zãmsgã. (Tʋʋ. 17:11) Sõng-y-yã-a t’a bãng tɩ verse kãens me teenda tagsg sẽn be sullã pʋgẽ. Wilg-y-yã-a a sẽn tõe n gʋls tags-koees to-to a zãmsgã seb-nens kɩremsẽ. Kɩt-y t’a bãng vẽeneg tɩ bũmb nins fãa a sẽn zãmsdã tika Biiblã zugu. Sagl-y-yã-a t’a sã n wa kõt leoor a zãmsgã wakat bɩ a tũnugd ne verse rãmb wʋsg b sẽn sõdg n ka gʋls b goamã.
4 Zãmsgã reng-n-kʋms la a lebg-n-gese: Nand tɩ Biibl zãmsdã sɩng a zãmsgã seglg neere, yɩta sõma t’a reng n kʋms a tags-kãsemsã. Wilg-y t’a tõe n deng n kʋmsa zãmsgã, a sã n ges sakã gom-zugu, a gom-zu-bi, la fot rãmbã koɛɛg-koɛɛga. Wilg-y-yã-a t’a seglgã baasgẽ, yɩta sõma ne-a t’a rɩk sẽk bilf n lebg n ges zãmsgã tags-kãsemse. Lebg-n-ges zĩ-gũbr sã n beẽ, a tõe n tũnug ne rẽ n maan lebg-n gesã. Lebg-n-ges a woto na n sõng-a lame tɩ zãmsgã pa a pʋ-tẽerẽ wã.
5 Y sã n wilg Biibl zãmsdã t’a segl a zãmsgã neere, na n sõng-a lame t’a kõt leoor sẽn tar yõod tigingã tigissẽ. Na n leb n sõng-a lame me t’a tall minung zãmsgã wɛɛngẽ sẽn na n naf-a kaoosg zugẽ, Biibl zãmsgã b sẽn maand ne yẽ wã saab poore.