Babg a 2: D sẽn na n zãms nebã Biiblã to-to tɩ b bɩ tẽebã pʋgẽ
Zãmsgã sẽn segend to-to
1 D sã n dat n zãms ned Biiblã sõma, d ka segd n sõs ne a soabã zãmsgã zug la d karem verse rãmb bal ye. D segdame n zãms karen-biigã hal tɩ zãmsgã kẽ a sũurã sõma. Rẽ baoodame tɩ d segl zãmsgã sõma sẽn na yɩl t’a naf karen-biigã.—Yel. 15:28.
2 D sẽn na n segl to-to: Reng-y n pʋʋs-y a Zeova a soabã la bũmb nins sẽn yaa tɩlae ne-a wã wɛɛngẽ. Kos-y a Zeova t’a sõng-y tɩ y tõog tɩ zãmsgã kẽ karen-biigã sũuri. (Kol. 1:9, 10) Sẽn na yɩl n bãng zãmsgã tags-yẽgr sẽn ya a soab vẽenega, bɩ y maag y yĩng n ges sakã bɩ zãmsgã gom-zugu, gom-zu-bi wã la fot rãmbã. Sok-y y meng woto: ‘Zãmsgã bõn-datl meng yaa bõe?’ Rẽ na n sõng-y lame tɩ y sã n wa maand zãmsgã bɩ y tik-a tags-kãsemsã zutu.
3 Maag-y y yĩng n karem zãmsgã sull-sulli. Bao-y n bãng-y sogsgã leoore, n dẽesd gom-yẽgã bala. Karm-y verse rãmbã b sẽn ning n pa gʋls b goamã n tags n ges b sẽn tɩ loe ne sullã tags-kãseng to-to, n yãk verse nins y sẽn na n wa karem zãmsgã wakatã. Y tõe n mikame tɩ tara yõod tɩ y gʋls tags-koees seb-nensã kɩremse. Biiblã zãmsd segd n nee vẽeneg tɩ bũmb ning a sẽn zãmsdã yita Wẽnnaam Gomdã pʋgẽ.—1 Tes. 2:13.
4 Maneg-y zãmsgã tɩ zems ne nedã yɛla: Y leb n segd n manega zãmsgã tɩ zems ne bũmb nins sẽn yaa tɩlae ne karen-biigã. Tags-y n bãng Biibl zãmsdã sẽn na n wa maan sogsg ninsã la zĩis sẽn tõe n wa yɩ toog ne-a t’a wʋm b võor bɩ a sak-bã. Sok-y y menga: ‘Bõe võor la a segd n wʋme, bɩ bõe la a segd n maan tɩ yɩ sõma n paas n tõog n bɩ tẽebã pʋgẽ? Wãn-wãn la m na n maan tɩ zãmsgã kẽ a sũurã?’ Rẽ poor bɩ y maneg zãmsgã tɩ zems ne nedã yɛla. Wakat ninga y tõe n mikame tɩ yaa tɩlae tɩ y segl makre, bũmb võor wilgri, bɩ sogsg sẽn na yɩl n sõng karen-biigã t’a wʋm zãmsg bɩ verse ning võore. (Neh. 8:8) La ra paas-y tagsa sẽn ka tɩlae sẽn na yɩl n wɛgs tags-yẽgrã ye. Y sã n maan lebg-n-ges zãmsgã baasgẽ, sõngda Biibl zãmsdã t’a tẽeg tags-kãsemsã.
5 Ad d sɩd tara sũ-noog menga, nin-paalsã sã n wom tɩrlem biis a Zeova pẽgr yĩnga. (Fil. 1:11) Sẽn na yɩl n sõng-b tɩ b maan dẽ, wakat fãa y sã n na n maan Biibl zãmsg ne ned bɩ y reng n segl neere.