D bao n zãms Biiblã ne sẽn deegd-b zʋrno rãmbã wakat fãa wã
1. Wãn-wãn la d tõe n kɩt tɩ ned sẽn deegd zʋrno rãmbã wakat fãa ne-d tʋlg n zãms Biiblã?
1 Neb wʋsg tõnd sẽn segd koe-moonegã pʋgẽ nong n deegda d sɛbã, la b yaool n pa rat tɩ d tolg n zãms Biiblã ne-b ye. D tõe n tũnuga ne d sẽn tʋgd n kõt-b zʋrno rãmbã wakat fãa wã n kɩt tɩ b tʋlg n zãms Biiblã. Y sã n bas zʋrno ne ned bɩ y gʋls a soabã adɛrse, daar ning y sẽn tɩ kaag-a wã, sɛb nins a sẽn deegã, la verse ning zug y sẽn sõsã, n paas bũmb ning fãa y sẽn yã tɩ yɩ-a-la noogo. Zʋrno paal sẽn wa fãa bɩ y bao zĩis sẽn tõe n yɩ neb nins sẽn deegd zʋrno rãmbã wakat fãa wã noogo, tɩ y sã n wa tɩ na n kõ-b bɩ y wilg-b zĩ-kãense. (1 Kor. 9:19-23) B tõe n wa karma bũmb ning tõnd zʋrnall a ye pʋgẽ tɩ tall yamleoog wʋsg ne-ba, tɩ kɩt tɩ b tʋlg n bãng n paase.
2. Bõe yĩng tɩ nebã segd n bao a Zeova ne yãgb masã, la wãn-wãn la d tõe n sõng-b n paase?
2 Baasg zãnga, d sak n deegame tɩ pa neb wʋsg sẽn na n karemd tõnd zʋrno rãmbã b toor yĩng bal la b na n lebg a Zeova balemdb ye. D sẽn mi tɩ nebã segd n baoa a Zeova ne yãgb masã wã, wãn-wãn la tõe n sõng-b n paase? (Sof. 2:2, 3; Wil. 14:6, 7) D sã n wa kẽng fãa n na n tɩ kõ-b zʋrno rãmbã, d tõe n yãka verse sẽn zems n karem sẽn na yɩl n kɩt tɩ b tʋlg n zãms Biiblã.
3. a) Wãn-wãn la d tõe n segl sõss sẽn tik verse rãmb zut n pʋgd taaba? b) Sõs-bʋs la yãmb moonegã zĩig neb tõe n dat n kelg n yɩɩda?
3 Verse zug sõsgã: Tags-y neb nins sẽn deegd zʋrno rãmbã yell n yãk verse sẽn zems ne b ned kam fãa n segl sõsga. (Fil. 2:4) Wala makre, ned nin-nongr sã n maan kaalem tɩ nan pa kaoose, y tõe n kaag-a lame n yɩlem sẽn na yɩl n wilg-a Biiblã sẽn yet bũmb ning sẽn ki-bã zug la kũum vʋʋgr saagrã zugu. Y tõe n tika Comment raisonner wã gom-zut nins sẽn yaa “kũum” la “kũum vʋʋgrã” n segl sõs-kãense. Sẽn pʋgde, tõe tɩ y na n wilg-a-la bãasã, kʋʋlmã la kũumã sẽn na n sa to-to. D segd n baoa gom-zug sẽn na n yɩ a soabã noogo, tɩ bilf-bilfã bɩ d wilg-a Biiblã sẽn sɩd yet bũmb ning rẽ zugã.
4. Bõe yĩng tɩ tar yõod tɩ d sõng nebã tɩ b wʋm verse rãmb nins zut d sẽn sõsd ne-bã võore, la wãn-wãn la d tõe n maan dẽ?
4 Sõng-y-b tɩ b wʋm a võore: Baa sẽn yaa sõma naoor wʋsg tɩ d kɩt tɩ sõs-kãens yɩ nana la koeesã, d segd n maaname tɩ yɩɩg verse d sẽn yãk kareng bala. A Sʋɩtãan luda nebã yam tɩ b ra yã koe-noogã vẽenem ye. (2 Kor. 4:3, 4) Baa neb nins sẽn tar Biiblã bɩ b karemd-a wã ratame tɩ b sõng-b tɩ b wʋm a sẽn yetã võore. (Tʋʋ. 8:30, 31) Woto yĩng bɩ y rɩk sẽk tɩ sek n wilg verse wã võor wala y sẽn maand to-to Wẽnnaam tʋʋmdã lekollẽ wã. (Tʋʋ. 17:3) Bao-y n bãng-y nedã sã n nee Wẽnnaam Gomdã sẽn tõe n naf-a to-to wã.
5. Wãn-wãn la ned sẽn deegd zʋrno rãmba wakat fãa tõe n wa lebg Biibl karen-biiga?
5 Nedã sã n nonga bũmb ning a sẽn zãmsdã, bɩ y paasd sõsgã woglem bilf-bilfu, n sõsd verse a yiib bɩ a tãab zugu. Bao-y n sɩng-y Baood seb-bilã wall Bãngr sebrã zãmsg ne-a. D sã n maand woto, ned sẽn deegd zʋrno rãmbã wakat fãa tõe n wa lebga Biibl karen-biiga.