Babg 11 soaba: D sẽn na n zãms nebã Biiblã to-to tɩ b bɩ tẽebã pʋgẽ
D sõng Biiblã karen-biis tɩ b lebg n tɩ ges nebã
1 Biiblã karen-biig sã n wa sɩng koɛɛgã moonego, a na n sega neb sẽn dat n bãng koe-noogã n paase. Wãn to la d tõe n sõng-a t’a tõog n lebgd n tʋgd n get a sẽn da sõs ne neb nins sõma wã la a sõng-b tɩ b bãng n paase?
2 Lebg-n-tɩ-gesã seglg segd n tika bũmb ning f sẽn da zoe n sõsã zugu. Sagl-y karen-biigã t’a ges a sẽn sõsd ne neb ninsã yell neere. (Fil. 2:4) Wilgd-y-a t’a kɩtdẽ t’a kɛlgdbã gomda, t’a kelgd b goamã, la a bãngd yɛl nins sẽn pak-bã. Ned sã n kelg-a sõma bɩ y kɩt t’a gʋls a soabã yʋʋr la bũmb ning zug b sõsgã sẽn tikã. Tik-y rẽ zug n sõng-a t’a segl b nindaar sõsgã.
3 Segl-y n lebg n kẽnge: Lebg-y n ges-y bũmb ning zug yãmb sõsgã sẽn da tikã, la y wilg karen-biigã t’a tik Rĩungã koɛɛgã neng ning sẽn na n kɩt t’a kɛlgdã sak n sõs ne-a wã zugu. (1 Kor. 9:19-23) Naag-y taab n segl goam sẽn tik Biiblã verse zug n paas sebr d sẽn tikd n zãmsd Biiblã sull a yembre. Segl-y sokr me y sẽn na n sok sõsgã baasgẽ tɩ kɩt tɩ y lebg n tɩ ges-a nindaare. Wilg-y karen-biigã a sẽn tõe n maan to-to lebg-n-tɩ-ges fãa sasa n kɩt t’a soabã bãng Wẽnnaam Gomdã n paase.
4 Tara yõod me tɩ y wilg karen-biigã lebg-n-tɩ-ges sɩngr-goam sẽn yaa nana. Wala makre, a sã n pʋʋs nedã n sa, a tõe n yeelame: “Tõnd nindaarẽ sõsgã yɩɩ maam noog tɩ m lebg n wa n na n tik Biiblã n sõs ne-y n paas [wilg-y gom-zugã].” Tõe tɩ y segd n wilga karen-biigã sẽn nan sɩng koe-moonegã a sẽn segd n leok to-to a sã n tɩ mik tɩ pa ned ning a sẽn da sõs ne wã n be yiri.
5 Lebg-y n kẽng-y tao-tao: Sagl-y karen-biigã t’a kõ mak-sõng n lebgd tao-tao n tʋgd n get neb nins sẽn dat n bãng n paasã. Yɩl n yã nebã yir tõe n baoodame tɩ d leb naoor wʋsgo. Zãms-y karen-biigã a sẽn tõe n dɩk sɛk ne ned to-to, la y wilg-a t’a segd n lebg n kẽnga wakat ning a sẽn kõ wã. (Mat. 5:37) Zãms-y-yã t’a sã n wa baood neb nins sẽn wõnd piisã bɩ a tall sõmblem ne nebã n waoogd-b la a sõng-b tɩ b bãng n paase.—Tɩt 3:2.