Babg 10 soaba: D sẽn na n zãms nebã Biiblã to-to tɩ b bɩ tẽebã pʋgẽ
D zãms karen-biisã zak-zak moonegã
1 Kãsem dãmbã sã n wa wilg tɩ Biibl karen-biig tõe n yɩɩ koe-moond sẽn pa reeg lisgu, a tõeeme masã n naagd tigingã neb n moondẽ. (Ges-y Organisés pour faire la volonté de Jéhovah sebrã s .n. 79-81 wã.) Wãn-wãn la d tõe n sõng karen-biigã t’a tõog n moon zak-zakã?
2 Naagd-y karen-biigã n segendẽ: Koe-moonegã yiib seglg sõma wã yaa tɩlae. Wilg-y karen-biigã zĩig ning a sẽn tõe n yã koe-moonegã sɩngr-goam Rĩungã Tʋʋmd sebrẽ la Comment raisonner wã pʋgẽ, la y sõng-a t’a yãk sɩngr-goam sẽn yaa nana la sẽn zems ne moonegã zĩig nebã. Reng-y n wilg-y-yã t’a tall Biiblã n tʋm koe-moonegã pʋgẽ.—2 Tɩm. 4:2.
3 Lebs-n-mak d sẽn na n moon to-to wã n wilgã sõngda karen-biigã sẽn nan sɩngd koɛɛgã moonegã hal wʋsgo. Karen-biigã sã n wa lebsd n makd a sẽn na n moon to-to wã bɩ y wilg-a a sẽn tõe n leok sogsg nins nebã sẽn nong n sokd moonegã zĩigẽ wã ne yam to-to. (Kol. 4:6) Wilg-y-yã tɩ pa tɩlae tɩ koe-moondbã bãng sokr fãa nebã sẽn sok-b leoor ye. Naoor wʋsgo, yaa sõma t’a wilg b rãmbã t’a na n tɩ maana vaeesg n lebg n wa sõs ne-b nindaare.—Yel. 15:28.
4 Naagd-y taab n moondẽ: Pipi raar karen-biigã sẽn na n yi n moon koe-noogã zak-zakã bɩ y kɩt t’a ges yãmb sẽn na n togs goam nins y sẽn naag taab n seglã to-to. Rẽ poor bɩ y kɩt t’a kẽes a toogo. Zĩis kẽere, yɩta sõma tɩ y kɩt t’a karem verse la a wɛgs-a bala. Kɩt-y tɩ yɛlã zems ne karen-biigã la a pãn-tõogã. (Fil. 4:5) Pẽgd-y-yã wʋsgo, y sã n wa zãmsd-a koɛɛga mooneg nens toɛy-toɛy bilf-bilfã sasa.
5 Tara yõod tɩ y sõng karen-biigã sẽn nan sɩng koe-moonegã t’a sigl a sẽkã n yit n moond wakat fãa, tɩ sã n tõe bɩ a maand boto semen fãa. (Fil. 3:16) Yãk-y wakat takɩ n yit n moond ne taaba, la y sagl-a t’a naagd koe-moondb a taab sẽn tar yẽesem me n moondẽ. B mak-sõngã la b tũud-n-taarã na n sõng-a lame t’a bãng zak-zak koe-moonegã n paas la a paam sũ-noogo.