D modg tɩ koe-noogã ta neb wʋsg wa d sẽn tõe tɛka
1. Bõe la pipi kiris-nebã maan sẽn na yɩl n moon koe-noogã neb wʋsg wa b sẽn tõe tɛka?
1 A Zezi pipi karen-biisã maoa ne b sũy fãa n moon Rĩungã koɛɛg zĩig zãnga. B tʋma ne tʋʋm te-sõma n moon koe-noogã neb wʋsg wa b sẽn tõe tɛka. Kiris-nebã gʋlsa Biiblã sɛb Wẽnnaam sẽn vẽneg-b tɩ b gʋlsã, ne gɛrk buud gomd ning b sẽn da gomd Rom soolmã fãa pʋgẽ wakat kãngã. Sẽn paase, b sẽn moon koɛɛgã ne yẽesem a Zezi rogmã poor yʋʋm kob-gĩnd a yiib la a tãab-n-soabã pʋgẽ wã yĩnga, tõe tɩ bãmb n yɩ pipi n tʋm ne kodɛgsã sẽn yaa sebr sẽn tar seb-vãad t’a tall-n-tʋm yaa nana n yɩɩd seb-pindmã.
2, 3. a) Wãn-wãn la Ezai 60:16 paamd pidsg rũndã-rũndã? b) Wãn-wãn la b tʋmd ne nasaar-teedã n kɩtdẽ tɩ baleng hakɩkã paamd pãng n paasdẽ?
2 Nasaar teedã tall-n-tʋme: A Zeova ra pĩnd n tũnuga ne no-rɛɛs a Ezai n togs woto: “Fo na n yẽsma buud a taab bĩisim.” (Ezai 60:16) A Zeova Kaset rãmbã sẽn tʋmd ne tẽnsã arzɛgsã n kɩtdẽ tɩ koe-moonegã kẽngd taoor sõma wã pidsda bãngr-gom-kãngã tõnd wakatã. Wala makre, yʋʋmd 1914 pʋgẽ wã, nand tɩ b wa tõog n kɩt tɩ filim dãmbã yɩ leebg bũmbã, Biiblã Zãmsdb ra zoe n sɩnga “Photo-Drame de la Création” filmã wilgri. Filim kãng sẽn kaoosd lɛɛr a nii n yaa kulɛɛrã kõo neb milyõ rãmb kaset sẽn tar pãnga.
3 Rũndã-rũndã, Wẽnnaam nin-buiidã tʋmda ne masĩn dãmb sẽn tõe n maan sɛb tʋʋll-tʋʋlle, la b tʋmd ne ordinatɛɛr dãmb la tʋʋm teed a taab n yiisd Biibl dãmb la sɛb sẽn tikd Biiblã zug ne buud goam wʋsgo. Nasaar-sɩls la kamyõ rãmb n dɩkd seb-kãens n taasd neb tẽns 235 pʋsẽ. A Zeova tũnuga ne a vʋʋsem sõngã n kɩt t’a sõgen dãmbã tʋmd ne nasaar te-kãens sõma-sõma n taasd Biiblã sɩdã neb wʋsg n yɩɩd pĩndã.
4. Toeen-bʋs la neb kẽer maan sẽn na n yɩl n moon koe-noogã neb wʋsg wa b sẽn tõe tɛka?
4 Bãmb mensã sẽn maan toeeng ninsi: Sẽn na yɩl n moon koe-noogã neb wʋsg wa b sẽn tõe tɛka, Wẽnnaam balemdb hakɩkã sak n maana toeeng b vɩɩmã pʋgẽ. Neb wʋsg toeema b yɛlã wʋsg sẽn na yɩl n tõog n moon koɛɛgã n paase. Kẽer yii b tẽnsẽ n kẽng zĩis nins b sẽn datẽ Rĩungã koe-moondb wʋsgã. Sãnda zãmsa buud gom-zẽng sẽn na yɩl n moon neb wʋsgo.
5, 6. Bõe la d tõe n maan n moon koe-noogã neb wʋsg wa d sẽn tõe tɛk tõnd mooneg zĩigẽ?
5 Sẽn paase, d tõe n moona koe-noogã neb wʋsgo, d sã n moond wakat ning nebã sẽn wat n be yirã la zĩis nins d sẽn tõe n yãẽ nebã. Nebã sã n nong n pa be yir wĩndga, y tõeeme n sigl y sẽkã n moon wĩnd-kaoorã sasa bɩ? Zãma zĩis bee y sẽn tõe n tɩ moon bɩ? Y maka kasetã kũun ne telefon la koosmã zĩisẽ mooneg bɩ? Rẽ yĩnga, y baooda soay sasa buud fãa n kõt kasetã bɩ?
6 D sẽn paam n kõt kasetã wʋsg a Zeova yʋʋrã la a Rĩungã zugã, sɩd yaa zu-noog tɛkẽ! Bɩ d ket n moond Wẽnnaam Gomdã sɩdã sẽn fãagd yõyã neb wʋsg wa d sẽn tõe tɛka.—Mat. 28:19, 20.