‘D maan bũmb fãa koe-noogã yĩnga’
1. Bõe la koe-moond fãa tʋl n maan a taabã yĩnga, la bõe yĩnga?
1 Tʋm-tʋmd a Poll ra miime tɩ yaa tɩlae ne yẽ t’a moon nebã koe-noogã. (1 Kor. 9:16, 19, 23) Woto me, nebã beoog daar na yɩ neerã yĩng kɩtame tɩ tõnd me maand d sẽn tõe fãa n taasd-b koe-noogã.
2. Bõe la d segd n maan sẽn na yɩl n paam nebã n moone, la bõe yĩnga?
2 D moon sasa la zĩig ning d sẽn tõe n mik nebã: Zĩm-yõgd pa yãkd wakat la zĩig yaar n lobd a gãmbr ye. Yaa sasa la zĩig ning a sẽn tagsd t’a na n paama zĩm la a lobd a gãmbrã. Tõnd me sẽn ‘baoodb neb’ sẽn na n sak n kelg koe-noogã, d koe-moonegã zĩigẽ wã, d segd n gesame yaa wakat bʋg la zĩ-bʋg la d tõe n mik-ba, sẽn na yɩl n moon neb buud fãa. (Mat. 4:19; 13:47) D tõe n moonda nebã soayã zut yibeoog pĩnd b sẽn wat n dabd tʋʋma sasa, pa rẽ bɩ d kẽnd b zagsẽ wã zaabr b tʋʋma sigb poor n moond-ba. Tʋm-tʋmd a Poll sẽn da rat bũmb ning yaa a tõog n moon koe-noogã sõma. La a maana rẽ zĩig ning la wakat ning fãa a sẽn tagsd t’a tõe n mika nebã.—Tʋʋ. 17:17; 20:20, 24.
3, 4. D sã n wa moond koɛɛgã, bõe la d segd n maane, la rẽ na n woma bi-bʋse?
3 D sẽn moond nebã bũmb ninsã segd n zemsda ne b yɛlã: Zĩm-yõgdbã nong n toeemda bũmb nins b sẽn maanda, sẽn na yɩl n paam zĩif takɩ n yõke. Wãn to la d tõe n moon Rĩungã koe-noog tɩ yɩ nebã noogo? D sã n wa moond koe-noogã, d segd n tika yɛl nins sẽn pak nebã zug n sõse, la d kelgd b sẽn na n yeel bũmb ningã neere. (Zak 1:19) Sẽn na yɩl n paam tɩ b sak n sõs ne tõndo, d tõe n sok-b-la sokre. (Yel. 20:5) D sã n maand woto, d na n tõog n tika yɛl sẽn pak-b zut n moon b koe-noogã tɩ kẽ b sũyã sõma. Tʋm-tʋmd a Poll sak n “lebga bũmb fãa neba yĩnga.” (1 Kor. 9:22) Sẽn na yɩl n sõs tɩ kẽ nebã sũy sõma, d segd n toeemda d sẽn moond-b bũmb ninsã tɩ zemsd ne yɛl nins sẽn pak-bã.
4 Ad d sẽn moond nebã ‘koe-noogã’ yaa sũ-noog tɛkẽ! (Ezai 52:7) Bɩ d modg n ‘maan bũmb fãa koe-noogã yĩnga,’ sẽn na yɩl n paam n sõng neb wʋsgo.—1 Kor. 9:23.