Yãmb sakd n toeemdame bɩ?
1. Dũniyã yɛl sẽn toeemdã baoodame tɩ tõnd me maan bõe?
1 Pipi Korẽnt dãmb 7:31 wã pʋgẽ, b maka dũniyã ne reem zĩig la reem-dɛɛmdb sẽn toeemd wakat fãa. Dũniyã yɛl sẽn toeemdã, segdame tɩ tõnd me toeemd d sẽn moond koɛɛgã to-to wã, wakat ning d sẽn yit n moondẽ wã, la d sɩngr-goamã. Yãmb sakd n toeemdame bɩ?
2. Bõe yĩng tɩ d segd n toeem d sẽn moond to-to wã tɩ zems ne siglgã sẽn datã?
2 Y sẽn moond to-to wã: Hal pĩnd n tãag masã, kiris-nebã toeemda b sẽn tʋmd b tʋʋmdã to-to wã. Makre, a Zezi sẽn wa n tʋm a karen-biisã pipi tɩ b tɩ moon koɛɛgã, a sagl-b lame tɩ b ra zɩ rɩɩb korg wall ligd ye. (Mat. 10:9, 10) La a wa n toeema no-kãense. Bala a ra miime t’a karen-biisã na n wa sega zu-loees koe-moonegã pʋgẽ, la a ra miẽ me tɩ b segd n modgame tɩ koɛɛgã ta tẽns a taaba. (Luk 22:36) Woto me, a Zeova Kaset rãmbã talla b sẽn moond koɛɛgã to-to wã toeengo. Wala makre, b ra moonda ne kart-rãmba, (carte de témoignage) radio-rãmba, la mobila sẽn tar mikoro rãmba. Tʋʋm-te-kãensã fãa zemsa ne yɛlã sẽn da yaa to-to wakat kãngã. Rũndã-rũndã, zĩis wʋsgo, d pa le wae n mikd nebã b zagsẽ ye. Woto kɩtame tɩ b sagend-d tɩ zak-zak moonegã toor sẽn ka be, bɩ d moond neb sẽn beẽ, la segb buud fãa d sẽn paam sasa. B sagl-d lame me tɩ nebã sã n kẽnda tʋʋm yibeoog tɩ d pa yãt-b yiri, bɩ d moond zĩ-sobd b sẽn wat n be b zagsẽ wã. A Zeova saarã sẽn wẽnemd n tees neng ning fãa, yãmb me tũud n wẽnemdame bɩ?—Eze. 1:20, 21.
3. D sã n toeemd d sẽn moond to-to wã tɩ zemsd ne nebã yɛlã, wãn to la na n wom biisi?
3 Y sɩngr-goamã: Bõe n pak yãmb moonegã zĩig nebã? Yaa ligd zu-loees wall zagsã pʋsẽ zu-loees bɩ, bɩ yaa zaba? D sã n mi yɛl nins sẽn pak d moonegã zĩig nebã, na n sõng-d lame tɩ d bãng d sẽn tõe n sɩng sõsg to-to. (1 Kor. 9:20-23) D sã n sɩng sõsg ne ned t’a togs-d sẽn be a sũurẽ, wall tɩ d leok-a zugẽ-zugẽ wã, yɩta sõma tɩ d bas d sẽn da rat n gom bũmb ning yellã la d tik sẽn pak-a wã zug n sõs ne-a.
4. Bõe yĩng tɩ d segd n sakd n toeemd tao-tao?
4 Ka la bilfu, dũni-kãngã “yɛlã” sẽn tar toeengã na n taa a tɛka, tɩ to-kãsengã sɩnge. ‘Wakatã lebga bilfu.” (1 Kor. 7:29) Rẽnd segdame tɩ d yɩt tao-tao n toeemd d sẽn moond koɛɛgã to-to wã, n tõog n sõng neb wʋsg wakatã ning sẽn ketã pʋgẽ.