D sẽn na n moon dũni sẽn toeemd wakat fãa pʋgẽ to-to
1 Ad yɛlã sɩd ka zɛɛd toeeng ye! Ka la ka bal tɩ sabaabo, yel-beed laogã wɛɛngẽ, gudgr naamã wɛɛngẽ, bɩ yel-beed a to sẽn maan tɩ kɩba-kɩtbã gom a yell wʋsg tõe n kɩtame tɩ nebã tar dẽ yell goam bala. La pa kaoosd la b bas bõn-kãng yell goam n leb n gomd bũmb a to yell ye. (Tʋʋ. 17:21; 1 Kor. 7:31, Sebr Sõngo) Dũni kãngã sẽn tar toeengã pʋgẽ, wãn-wãn la d tõe n maan tɩ neba kelg Rĩungã koɛɛgã d sẽn dat n taas-bã?
2 Bao-y n bãng yɛl nins sẽn pak nebã: Bũmb a yembr d sẽn tõe n maan n kɩt tɩ nebã kelg-d yaa d sẽn na n gomd yaoolem kɩbayã yelle. Vugri a Zezi goma yel-beed sẽn da nan maan paalem tɩ ket n be nebã yamẽ yelle, n sagl a kɛlgdbã tɩ b tags bãmb moorã ne Wẽnnaamã sẽn yaa to-to wã zug sõma. (Luk 13:1-5) Woto me, d sã n wa moond koe-noogã, yɩta sõma tɩ d gom yaoolem kɩbay yelle, bɩ tẽngã bũmb ning sẽn pak tõnd moonegã zĩigẽ neb yelle. La d sã n sõsd yel-kãensã zutu, bɩ d gũus n da wilg tɩ d bee neb sull poorẽ n kɩɩsd neb sull a to naamã bɩ vɩɩmã yɛl wɛɛngẽ ye.—Zã 17:16.
3 La tõnd moonegã wakate, d yɩta wãn n bãng nebã sẽn tagsd bũmb ning zugu? Sẽn zems n yɩɩd yaa d sẽn na n sok-b bũmb la d kelg b goamã bala. (Mat. 12:34) Nebã yell sã n pak-d lame, d na n kelga b sẽn tagsdã, la d maan yam n sok-b yɛl a taab n paase. Nina tõe n yeela bũmb woto bala, tɩ rẽ wilgdẽ tɩ yaa bõn-kãng yell n pak neb wʋsg bab-kãngã pʋgẽ, tɩ rẽ tõe n pak sor n kõ-d tɩ d kõ kasetã.
4 D segl d sẽn na n moon nebã koɛɛgã to-to: Dũni kãngã sẽn toeemd wakat fãa wã pʋgẽ, d sã n wa segend n na n yi moonego, d tõe n tʋma ne Biibl Sõss seb-bilã. Sagls a woto sẽn wilgd d sẽn tõe n paas yaoolem kɩbayã d moonegã goam pʋgẽ to-to n be sebrã seb-neng a 3-5 pʋgẽ, zĩig ning b sẽn yet tɩ “Kɩbaya” la “Tʋʋm wẽnse/Bãanã.” Y sã n segend y moonegã goam bɩ y modg n paas verse sẽn zemse.
5 D sẽn ne tɩ yɛl nins sẽn pak nebã moonegã zĩigẽ wã tara toeeng wakat fãa wã, rẽnda d rems d koe-noogã mooneg goam tɩ zems ne rẽ. Woto, d na n tõog n goma ne nebã bũmb nins sẽn sɩd pak-b vɩɩmã pʋgẽ wã zugu. D sã n maan dẽ, d tõogd n sõnga neb wʋsg n paas tɩ b bãng a Soab ning zʋg-sõma la a noy sẽn ka toeemdã.—Zak 1:17.