D tũnug ne video rãmbã n zãms nebã
1. Wãn to la a Zeova tũnug ne yɛl a pĩnd wẽndẽ sõgen dãmbã sẽn tõe n yã n zãms-ba, la rẽ yõod yɩɩ bõe?
1 Wakat ninga a Zeova tũnuga ne vẽnegr la zãmsdo, sẽn na yɩl n wilg a pĩnd wẽndẽ sõgen dãmbã yɛl sẽn tar yõod wʋsgo. Tags-y a Ezekɩɛll sẽn paam vẽnegr ning n yã a Zeova yĩngr saarã yelle. (Eze. 1:1-28) Tags-y n ges a Daniɛll tagsg sẽn yɩ a soaba, a Zeova sẽn kɩt t’a zãms zãmsd sẽn wilgd dũni gill pãn-soaadbã sẽn na n pʋg taab to-to wã. (Dan. 7:1-15, 28) La ges-y b sẽn tũnug ne bãn n wilg tʋm-tʋmd a Zã bõn-kãsems nins sẽn na n zĩnd “Zusoabã raarã!” (Wil. 1:1, 10) A Zeova tũnuga ne yɛl ninsaal nif sẽn tõe n yã, n zãms-b sẽn na yɩl tɩ b ra yĩm ye.
2. Bõn-bʋs nebã nin sẽn tõe n yã la d tõe n tũnug ne n zãms-b Biiblã?
2 Tõnd me sã n dat n zãms nebã sɩd ning sẽn be Biiblã pʋgẽ wã tɩ kẽ-b tɩ b ra yĩm tao-tao, d tõe n tũnuga ne video rãmbã n zãms-ba. Tõnd video rãmbã wilgda yɛl wʋsgo, la kɩtdame tɩ f tall bas-yard ne Biiblã, ne a Zeova siglgã, la ne noy nins sẽn manegd kiris-nebã vɩɩmã n paasdẽ wã. Bɩ d ges d sẽn tõe n tũnug ne d video rãmbã to-to n zãms nebã. Ad manesem a wãna.
3. Bõe la y tõe n tũnug ne n sõng ned sẽn zãmsd Biiblã t’a bãng a Zeova siglgã?
3 D koe-moonegã pʋgẽ: Yãmb zoe n goma ne y Biiblã karen-biig tõnd saam-biisã sẽn be dũniyã gill zugã yell bɩ? Tũnug-y ne Toute la communauté de nos frères video wã n wilg-a rẽ. Y tõe n kɩtame t’a reng n ges-a tɩ y yaool n maan y nindaar zãmsgã, walla y naag taab n ges-a. Rẽ poor bɩ y tũnug ne sogsg nins sẽn be yʋʋmd 2002 sigr kiuug Rĩungã Tʋʋmd pʋgẽ wã n sõse.
4. Video rãmb bʋs la Kaset rãmb nins sẽn yaa kom-bɩɩsã tõe n tall n tʋm lekollẽ wã?
4 Kom-bɩɩse, y tõe n sõsa ne y karen-saam dãmbã n wilg-b tɩ y rat n talla La fermeté des Témoins de Jéhovah face à la persécution nazie video wã, bɩ Fidèles dans les épreuves—Les Témoins de Jéhovah en Union Soviétique video wã, n wa tɩ y ges y karen-doogẽ wã. Tik-y yʋʋmd 2001 sigr kiuug la yʋʋmd 2003 wao-fugdg kiuug Rĩungã Tʋʋmd zug n segl sogsgo, la y kos y karen-saambã sor n tik rẽ zug n sõs ne y karen-bi-taasã.
5. Bõe la roagdbã tõe n tũnug ne n zãms b zakã neba?
5 Ne d zak rãmb la d zo-rãmba: Roagdba, tags-y n ges yãmb kambã sẽn bɩ n paas to-to, Les jeunes s’interrogent — Comment se faire de vrais amis? video wã yiib tɛka. Woto yĩnga, y Biiblã zãmsg ning sẽn pʋgdã sasa, y tõe n ye ges-a-la ne y zakã neba.
6. Wãn to la y tõe n segl sõsg sẽn kengd tẽeb ne y zo-rãmba?
6 Yãmb tara zo-rãmb tigingã pʋgẽ y sẽn dat n bool y yir bɩ? Y sã n naag taab n ges Respectons l’autorité de Jéhovah video wã, y sõsgã na n kenga y tẽebo. Sẽn yɩɩd fãa y sã n ges video wã n sa, n tũnug ne sogsg nins sẽn be yʋʋmd 2004 bõn-bɩʋʋng kiuug Rĩungã Tʋʋmd pʋgẽ wã n sõs y sẽn gesã zugu.
7. Zĩ-bʋs la sasa bʋg la yãmb tõe n tall d video rãmbã n tʋme?
7 Sasa la zĩis a taaba: Wãn to me la y tõe n tall tõnd video rãmb 20 wã n tʋme? Y sã n tall video a ye bɩ a yiib n tɩ kɩt tɩ neb nins y sẽn tʋgd n kaagdẽ wã gese, na n sõng-b lame tɩ b bɩ tẽebã wɛɛngẽ bɩ? Video rãmbã na n sõng-y lame tɩ y sõng y roagdba, y mitba, y yags la y tʋmd-n-taas tɩ b bãng-d sõma n paas bɩ? Tõnd video rãmbã bee yamleoogo, b kõta zãmsgo, la b wekda yam. D tall-b n zãms nebã.