Video rãmbã kõta kaseto
1 “Tõnd biriblã sɩnga filmã gesg t’a nan ka sɩng kẽnd ye. A ges-a lame n yɩlem naoor wʋsgo. Ad sɩd bee yamleoog wʋsgo, tɩ d tar tʋʋm-teed sẽn kɩtd tɩ tõnd kambã nong a Zeova!” Filim bʋg yell la bi-kãngã roagdã sẽn yaa kiris-nedã ra gomda? Ya a soab ning gom-zug sẽn yaa Noé : Il marchait avec Dieu wã. Pag sẽn pa Kaset soab biig n tɩ ges a Noé video wã ned a to zakẽ. Rẽ kɩtame tɩ pagã tool Tʋʋmdã will kũun sẽn yɩɩd wakɩr tus 12, la a sʋk n ges b sã n tara video rãmb a taab kamb yĩnga. Video rãmb nins a Zeova siglgã sẽn maanã toeemda kãsemb la kamb wʋsg vɩɩm.
2 Zakã pʋgẽ: Zak neb sẽn yaa Kaset rãmb sẽn ges La fermeté des Témoins de Jéhovah face à la persécution nazie video wã poore, ma wã yeelame: “Daarã tõr fãa mam tagsa a Zeova sẽn maan to-to n sõng nin-zaals tɩ b tõog yel-kãsems taoorã zugu! M sẽn tags rẽ zugã, tẽega maam tɩ mam mengã zu-loees ka zem ba a fɩ, b sã n mak-b ne rẽ ye. D sẽn ges video kãngã ne d kambã sõng-b lame tɩ b bãng vẽeneg n paas tɩ b segd n teega a Zeova. Tõnd sõsa ne d kompugli wã rẽ poor n segl-b n paas sẽn na yɩl tɩ b tõog weoogr la namsg buud fãa b sẽn tõe n wa paame.”
3 Lekollẽ wã: Kaset soab sẽn yaa bi-bɩɩg n tõog n wilg Fermeté video wã babs kẽer a karen-doogã neba. Karen- saambã yeelame t’a rag n ka nong Kaset rãmbã ye. A sẽn ges video wã poore, a yeelame: “Yão wã toeema mam sẽn da tagsd to-to a Zeova Kaset rãmbã zugã zãng fasɩ. Mam pʋlmame tɩ nindaar b sã n wa mam nengẽ fãa, m na n kelg-b lame la m sɩng Biibl zãmsg ne-ba!” Bõe n toeem karen-saambã tagsg tõnd zugu? A yeelame tɩ yaa “nonglem la burkĩnd hakɩkã” tõnd sẽn tarã.
4 Koe-moonegã wakate: Saam-bi-poak n seg pag sẽn da ka rat n deeg tõnd sɛbã, baa ne a sẽn da tar yɛl n dat n maan sʋgsgo, kaset rãmbã la b tẽebã wɛɛngẽ wã. Saam-bi-poakã talla Les Témoins de Jéhovah : un nom, une organisation video wã n lebg n wa tɩ pagã ne a sɩdã gese. B yiiba fãa sũy yɩɩ noog wʋsg tɩ b sak Biibl zãmsgo. B sẽn kõ-b kasetã sõma wã kɩtame tɩ b sɩng n toeemd b vɩɩmã n tũud Wẽnnaam daabã.
5 Yãmb tũnugda ne video rãmbã ne manesem sẽn kɩtd tɩ b naf n yɩɩg bɩ?