Les Témoins de Jéhovah : organisés pour prêcher la bonne nouvelle

Yaa sẽn yɩɩd yʋʋm 100 la woto a Zeova Kaset rãmbã sẽn sigl koe-noogã moonego. Tõnd moonda koe-no-kãngã sẽn yɩɩd tẽns 230 pʋgẽ ne buud-goam wʋsgo. Koe-mooneg woto buud zɩ n zĩnd ye. (Mat. 24:14) Bõe yĩng tɩ koɛɛgã mooneg yaa tɩlae? Wãn to la d moond-a dũniyã gill zugu? Les Témoins de Jéhovah : organisés pour prêcher la bonne nouvelle video wã leokda sogs-kãensã. A wilgda tʋʋm nins d sẽn tʋmd dũniyã gill zugã bal-balle. Y sã n wa get video kãngã, bɩ y bao n leok sogsg nins sẽn pʋgdã:

Wãn to la video kãngã sõng yãmb 1) tɩ y nand a Zeova siglgã sẽn maand to-to n moond koe-noogã? (2 Tɩm. 4:2) 2) Wãn to la a sõng yãmb tɩ y nand tʋʋm nins b sẽn tʋmd Betɛll dãmbã pʋsẽ dũniyã gill zugã? 3) Wãn to la a kɩt tɩ y nand yel-gɛtbã la misioneer dãmbã sẽn paamd zãmsg ningã n paase? (2 Tɩm. 2:2) 4) Wãn to la a sõng yãmb tɩ y sɩd bãng tɩ tara yõod tɩ y vaees daar vɛrse wã yibeoog fãa, la y segend tigissã semen fãa? (Tʋʋ. 17:11) 5) Wãn to la a sõng yãmb tɩ y nand tigissã la tigis-kãsemsã n paase? (Heb. 10:24, 25) 6) Wãn to la a sõng yãmb tɩ y nand bũmb nins sẽn na n zĩnd arzãnã pʋgẽ wã? (Ezai 11:9) 7) Wãn to la a sõng yãmb tɩ y nand koe-noogã moonego?—Zã 4:35.

Video kãngã sõnga neb wʋsg tɩ b bãng a Zeova Kaset rãmbã sẽn tʋmd tʋʋm nins dũniyã gill zugã. 8) Wakat bʋg la y tõe n wilg video wã y Biibl karen-biisã, y roagdbã, la neb a taab tɩ naf-ba? 9) Neb nins yãmb sẽn yiis video wã tɩ b gesã manesem yɩɩ wãna?

D sã n tags bũmb nins a Zeova sẽn maandã zugu, kɩtdame tɩ d yeel wala yɩɩl-gʋlsdã sẽn yeelã. A yeela woto: “Zusoaba, mam Wẽnnaam, yãmb bõn-bãnã yãmb sẽn maanã ne y tagsgã tõnd yĩngã yaa wʋsgo. [Wẽnnaam] a to kae sẽn zem yãmb ye.” (Yɩɩl 40:6) Bɩ d modg n tall video kãngã n sõng nebã tɩ b wa nong a Zeova la b tall naneb ne a siglgã.