Video-paall sẽn na n sõng-d tɩ d zãms neb Biiblã

Neb wʋsg paam n gesa video-koɛɛg ning sẽn be tõnd sitã (jw.org.) pʋgẽ t’a gom-zugã yaa “Bõe yĩng tɩ y tog n zãms Biiblã?” B yiisa video-kãng n na n sõng sẽn dat-b n bãng koɛɛgã n paasã tɩ b sak n sɩng Biiblã zãmsgo. Sẽn na yɩl n paam video wã n gese, kẽ-y tõnd sitã pʋgẽ, n kilik zĩig ning b sẽn gʋls tɩ “ Cours bibliques gratuits ” wã. Wall y ges tõnd seb-vã-paalã yaoolem nengã, n ɛskane koodã (QR: quick response) sẽn be tẽngrã wa tãmpõ wã. Ad sagls a wãn sẽn na n sõng-d tɩ d bãng n tall video wã n moon koɛɛgã.

• Wala makre, y sã n lebg n na n tɩ kaag neda, y tõe n yeel-a-la woto: “M tõe n wilg-y-la video sẽn na n sõng-y tɩ y paam sogsg Biiblã sẽn leokd bɩ?” A sã n sak bɩ y yiis y portaablã n wilg-a video wã. Wall a sã n tara ordinatɛɛr n tõe n paam ẽntɛrnetã, bɩ y wilg-a a sẽn tõe n maan to-to n paam video wã.

• Y sã n wa moond koɛɛgã zãma sẽn beẽ wall y paama segb n kõ ned seb-vã-paalle, bɩ y wilg-a koodã (QR: quick response) sẽn be seb-vãoogã yaoolem nengã tẽngr wa tãmpõ wã, la y yeel-a t’a tõe n ɛskane-la ne a portaablã. Koodã bee sɛb b sẽn lebg ne buud-goam wʋsg zugu, tɩ f sã n ɛskane-yã-a bɩ a pak video wã sẽn beẽ. Woto kɩtame tɩ y tõe n paam n ges video wã zĩig pʋgẽ.

• Gom-y video wã yell ne y tʋmd-n-taase, y karen-bi-taase, y roagdb la y mitinsi, tɩ b sã n dat bɩ y wilg-ba. Wall y tũnug ne ẽntɛrnetã n tool-b mesaaz n kõ-b adɛrs ning b sẽn tõe n kilik n paam video wã n gese.

Ad video kãngã sɩd na n yɩɩ sabab tɩ d sɩng Biiblã zãmsg ne neb wʋsg sẽn yaa sũ-tɩrs rãmba, n dat “vɩɩm sẽn ka sɛtã.”—Tʋʋ. 13:48.