D naag d zakã rãmb n balem a Zeova
1 Pĩnd wẽndẽ wã, zagsã rãmb ra naagda taab n maand bũmb wʋsgo. B ra naagda taab n tʋmdẽ, la sẽn tɩ yɩɩd fãa b ra naagda taab n balemd a Zeova. (Maan. 10:12-14; Tõo. 31:12) Zĩis wʋsg rũndã-rũndã, zagsã rãmb sẽn naagd taab n maand bũmb ninsã pa waoog ye. La kiris-nebã miime tɩ tara yõod tɩ bãmb ne b zagsã rãmb naagd taab n tʋmdẽ, sẽn tɩ yɩɩd fãa n naagd taab n balemd Wẽnnaam. Yaa vẽeneg t’a Zeova sẽn yaa zakã lugundã sũur na n yɩɩ noog wʋsgo, zakã rãmb sã n naagd taab n balemd-a!
2 Naagd-y taab n moondẽ: Zakã rãmb sã n naagd taab n moond koɛɛgã, kɩtdame tɩ b zems-n-taarã paasdẽ. Dẽnd kãsem soab segd n moonda ne tigingã neb a taaba. Sẽn paase, a segd n moonda wakat fãa ne a pagã la a kambã me. (1 Tɩm. 3:4, 5) Baa ne tigims sull yel-gɛtbã sẽn tar tʋʋm wʋsgã, b yãkda wakat sẽn na yɩl n moon ne b pagbã.
3 Roagdb nins sẽn moond ne b kambã tõogd n sõng-b lame tɩ b lebg koe-moondba. Kambã na n yãa sũ-noog ning koe-moonegã sẽn kõt b roagdbã, la b yã b roagdbã sẽn wilgd to-to tɩ b nonga Wẽnnaam la ninsaalbã. (Tõo. 6:5-7) Baa kambã sã n wa bɩtẽ me, ket n tara yõod tɩ roagdbã naagd-b n moondẽ. Pag a ye ne a sɩd sẽn tar kom-dibli a tãab tɩ b yʋʋmã zems 15 ne 21 sʋk moonda koɛɛgã ne b kambã wakat fãa. Kambã baaba yeela woto: “Wakat fãa d zãmsda kambã bũmbu. La d mogdame tɩ yɩ sũ-noog wakat la keng b raoodo.”
4 Naagd-y taab n segend y mense: Zags kẽer neb bãngame tɩ tara yõod tɩ b naagd taab n segend b mens koe-noogã mooneg yĩnga. Kambã mi n nong n maanda mak-n-wilg ne zakã neb a taaba. Mak-n-wilgã pʋgẽ, b nong n dat n yɩɩ kɛlgdã wall koe-moondã. Kẽer rɩkda minit a wãn bal b zakã sebr zãmsg poor n maand rẽ.
5 D sã n maand bũmb sẽn tar yõod la be yamleoog ne neb d sẽn nonge, d sũ-noogã paasdame. Yaa vẽeneg tɩ zakã rãmb sã n naagd taab n moond koɛɛgã zak-zaka, n lebgd n tʋgd n get neb nins sẽn dat n bãng n paasã la b zãmsd nebã Biiblã, yaa sũ-noog tɛkẽ! Dẽnd y sã n naagd y zakã rãmb n balemd a Zeova, y tõe n yeela ne sũ-noog woto: ‘Maam ne m zakã rãmb yẽ, tõnd na n tũu a Zeova.’—Zoz. 24:15.