Zakã Biibl zãmsgã, ne d meng Biibl zãmsgã tara yõod wʋsgo!
1. Wãn to la Siglgã taoor lʋɩtb Sull wilg tɩ tõnd yell pak-a lame, la bõe yĩnga?
1 Wala sẽn yɩ to-to pipi kiris-nebã wakatẽ wã, Siglgã taoor lʋɩtb Sull maanda a sẽn tõe fãa sẽn na yɩl n ges a Zeova nin-buiidã yelle. (Tʋʋ. 15:6, 28) To-kãsengã sẽn kolgdã yĩnga, segdame tɩ koe-moond fãa tall zood ne a Zeova sõma. Bõe la y na n maan ne sẽk ning y sẽn da rɩkd n kẽngd Sebrã zãmsgã? D sagenda y fãa tɩ y rɩk sẽg-kãng n naagd y zakã rãmb n zãmsd Biiblã la y pʋʋsdẽ. D sã n tʋm ne d sẽkã sõma, na n kɩtame tɩ d tõog n vaees Biiblã sõma n dɩ a nafa.—Yɩɩl 1:1-3; Rom 11:33, 34.
2. Wãn to la d tõe n sigl d zakã pʋgẽ zaabr Biibl zãmsgã la pʋʋsgã?
2 Zakã pʋgẽ zaabr Biibl zãmsgã la pʋʋsgã: A Zeova gũudame tɩ zak soab fãa modg n zãmsd Biiblã sõma ne a zakã rãmb la a pʋʋsd ne-b wakat fãa n da vaandẽ ye. (Tõo. 6:6, 7) Saam-biis la saam-bi-pogs nins sẽn pa ka kẽ kãadem bɩ sẽn pa tar zak pʋgẽ zɩɩbã segd n dɩka sẽg-kãng n zãmsd Biiblã la b maand vaeesg sõma. D fãa segd n yãka sasa n zãmsd Biiblã la d bʋgsd bũmb nins d sẽn zãmsdã zutu, sẽn na yɩl n paam pãng n yals kãn-kãe wakat kãngã sẽn yaa wẽngã sasa.—Ef. 5:15, 16.
3, 4. Bõe ne bõe la d tõe n tik n zãms d zakã pʋgẽ, la bõe la d segd n ning d yamẽ?
3 B sẽn tõe n zãms bũmb ninsi: Index des Publications de la Société Watch Tower, bɩ Watchtower Library CD-ROM tõe n sõnga yãmb tɩ y paam kibay sẽn na n kɩt tɩ Biiblã zãmsg tall yamleoogo. Wala makre, zagsã rãmb tõe n zãmsa sõss nins sẽn pʋgdã sẽn be Gũusg Gasgã pʋgẽ wã: “Clés du Bonheur familial,” “Enseignez vos enfants,” “Pour nos jeunes lecteurs.” Réveillez-vous ! wã pʋgẽ me, Les jeunes s’interrogent” ne sõs a taab sẽn gomd naanegã yell n be be tɩ d tõe n zãmse.
4 Y sã n naagd taab n maagd y yĩns n karemd Biiblã sõma, na n kɩtame tɩ saglsã kẽ zakã neb fãa sũyã, la sõng-b tɩ b tũ Biiblã noyã. (Heb. 4:12) Sasa ning me y tõe naaga taab n ges kaset video siglgã sẽn yiisi, la y sõs a zugu. Y tõe n yãka bũmb ning y sẽn na n zãmsã la y yãk y sẽn na n zãms-a to-to wã. Y tõeeme meng n sok zakã neb tɩ b togs b sẽn dat tɩ y zãms bũmb ninsi, la b sẽn dat tɩ y maan-a to-to.
5. Bõe yĩng tɩ zakã Biibl zãmsgã, ne d meng Biibl zãmsgã tar yõod wʋsg masã n yɩɩda?
5 Bũmb ning sẽn kɩt tɩ yaa masã la d segd n zãmsd Biiblã n yɩɩdã: D sã n modgdẽ tɩ zood ning d sẽn tar ne a Zeova wã pãng paasdẽ, na n sõnga tõnd tɩ d segl d mens sẽn na yɩl n ‘yals n ges a Zeova sẽn na n fãag tõnd to-to.’ (Yik. 14:13) Yaa tɩlae tɩ roagdbã paam Wẽnnaam sor-wilgr sẽn na yɩl n wub b kambã dũni kãngã sẽn pid ne ‘kɩɩsdb la ne nin-wẽnsã” pʋgẽ. (Fil. 2:15) Kambã rata sõngr sẽn na yɩl n tõog n mao ne manesem wẽnsã sẽn tar paasg lekoll dãmbẽ wã rũndã-rũndã wã. (Yel. 22:3, 6) Neb nins sẽn kẽ kãadmã segd n modgame tɩ zood ning b sẽn tar ne taab la ne a Zeova wã pãng paase, tɩ yɩ wa ‘wĩir sẽn kal a tãabo.’ (Koɛ. 4:12) Bɩ d rɩk sẽk ning sẽn ketã n keng d mensã tẽeb tɩ tall pãng n paase!—Ziid 20.