Segl-y y mens sõma Tẽegrã yĩnga

Ad sɩd yaa sũ-noog la zu-zẽkr tɛk n kõ Kiristã karen-biisi, b sẽn le paam n na n segl b mens sõma n tẽeg a Zezi Kirist kũumã! (Luk 22:19) Bõe ne bõe la d segd n maan n tõog n segl Tẽegrã sõma?

◼ A zĩigã la a wakatã: B segd n wilga nebã fãa Tẽegrã sẽn na n maan zĩig ningã la a wakatã takɩ. Tigims a yiib bɩ sẽn yɩɩd woto sã n na n maana Tẽegrã zĩ-yende, yɩta sõma tɩ tiging fãa neb wa pĩndã, tɩ sẽn deng-b taoorã me loog tao-tao tɩ b taabã tõog n sɩng lɛɛre. Tigims-kãens segd n zemsa taab sõma tɩ nebã ra wa gũm taab rig-noorẽ wã la parkĩngã zĩigẽ ye.

◼ Seb-vãadã pʋɩɩbo: Koe-moondbã fãa segd n tara seb-vãadã, la b mi b sẽn tõe n tall-b n tʋm to-to. Rẽ yĩnga yãmb lebg n gesa y sẽn na n tall-a n bool nebã to-to wã bɩ? La ãnd dãmb la y na n boole? D segd n modg n pʋɩya seb-vãadã gilli.

◼ D sẽn tõe n sõng kẽer to-to: Neb kẽer sẽn deeg boollã seb-vãoog la saam-biis a taab tõe n data sõngr sẽn na yɩl n ta Tẽegrã zĩigẽ, bɩ n dat sõngr zĩis a taaba. Segl-bʋs la b rɩk sẽn na yɩl n sõng-ba?

◼ Burã ne divẽ wã: Y pa segd n pɩʋʋg ne burã la divẽ wã nebã taoore, tɩ wĩndgã nan pa lʋɩ ye. Ned sẽn paam vʋʋsem sõngã zaeeb sã n yaa bãad n pa tõe n wa, b segd n tɩ kõ-a-la burã la divẽ wã. B segd n deng n baoa burã la divẽ ning sẽn zemsã n dɩgle. Ges-y yʋʋmd 2003, tʋʋlg kiuugã pipi raar Gũusg Gasgã, seb-neng 10-11; sull 14, 17.

◼ Tẽegrã zĩiga: B segd n deng n pɩɩsame la b yẽes Rĩungã Roog bɩ Tẽegrã maaneg zĩig sõma. B segd n baoa laase, vɛɛr dãmb la taabl ne peen-lutg sẽn zems n tall-b pĩnd n wa Tẽegrã maaneg zĩigẽ. B sã n bao zĩig a to n na n maan Tẽegrã, b segd n modgame n bao sono sẽn yaa sõma sẽn na yɩl tɩ neb nins sẽn wa Tẽegrã tõog n wʋm sõsdã goam sõma. B segd n deng n yãka sẽn na n deeg-b nebã la neb nins sẽn na n pɩʋʋg ne burã la divẽ wã, n wilg-b tʋʋm nins b sẽn segd n maanã, la b sẽn segd n maan-b to-to me. Sẽn paase, b segd n ninga fu-sõma la b maneg b mens tɩ yaa sõma.

A Zezi Kirist kũumã Tẽegr sẽn tar yõod wʋsg ne-dã yĩnga, tõnd ned kam fãa la tigingã gill segd n deng n segla sõma. A Zeova rɩka segls ne a bi-nongr a Zezi Kirist maoongã maasem, ninsaalbã neer yĩnga. Vẽenega, a na n ninga neb nins fãa sẽn wilgd tɩ b nanda segl-kãensã wã barka.