D sẽn tõe n segl Tʋʋmdã tigisg to-to
1. Bõe yĩng tɩ b sigl Tʋʋmdã tigisgã, la bõe la d segd n maan sẽn na yɩl n dɩ a nafa?
1 B sigla Tʋʋmdã tigisg sẽn na yɩl n sõng tõnd tɩ d moon koɛɛgã tɩ wom biisi. Sõs nins b sẽn kõt tigis-kãngã sasa wã tika koɛɛgã moonego, karen-biisã maanego, la a Zeova bʋ-kaoorã koeesã taasg zugu. (Mat. 28:20; Mark 13:10; 2 Pɩɛ. 3:7) D fãa sã n segend tigis-kãngã sõma la d kẽesd d mens sõssã pʋsẽ, na n naf-d-la wʋsgo.
2. Wãn to la d tõe n deng n segl diskuur la d yaool n wa kelg-a?
2 Diskuur: B wilgda sõsdbã sẽn segd n tik zĩis nins n segl b sõssã. D tõe n deng n vaeesa zĩ-kãense, n karem verse rãmbã la d tags n ges d sẽn tõe n tũ sagl-kãens to-to koɛɛgã mooneg pʋgẽ.
3. Wãn to la d tõe n segl sogsg la leoorã?
3 Sogsg la leoore: B maanda sogsg la leoorã wa b sẽn zãmsd Gũusg Gasgã to-to wã. Sɩngr goamã la baasg goamã yaa koɛɛg-koɛɛga. Rẽeg-y leoorã sull fãa pʋgẽ, la y segl y mens n wa tõog n leok koɛɛg-koɛɛga.
4. Wãn to la d tõe n segl sõsg ne kɛlgdbã?
4 Sõsg ne kɛlgdbã: Yaa diskuur sõsd sẽn na n wɛgse. La a wat n sokda kɛlgdbã sogsg tɩ b leokdẽ. Sull fãa pʋgẽ, y sã n deng n dẽeg bũmb nins takɩ b sẽn dat tɩ pa y yamẽ wã la y karem verse rãmbã b sẽn sõdgã, sõsdã sã n wa sokd sogsgo, y na n tõog n leokame. Sõsdã segd n modgame n kɩt tɩ kɛlgdbã wilg bũmb nins takɩ b sẽn dat tɩ pa d yamẽ wã.
5. Bõe la d segd n maan sẽn na yɩl n dɩ mak-n-wilgã nafa?
5 Mak-n-wilgi: Sõs-kẽer pʋsẽ, b maanda mak-n-wilg sẽn na yɩl tɩ d bãng d sẽn tõe n tũ sagls nins b sẽn kõ wã to-to koe-moonegã pʋgẽ. Yaa kãsem dãmbã, so-pakdbã bɩ koe-moondb a taab sẽn tar minim la b tog n yãk tɩ b maan mak-n-wilgã. Mak-n-wilgã seglg wɛɛngẽ, d segd n deng n tags n gesa b sẽn tõe n maan-a to-to. B sã n wa tik sagls nins sẽn be Rĩungã tʋʋmd sebrã poorã n maan mak-n-wilgi, d tõe n tags n gesa d sẽn tõe n maneg-a to-to tɩ zems ne yɛl nins sẽn pak d kɛlgdbã. Tẽeg-y n zã-y sebr ning b sẽn na n tall n maan mak-n-wilgã. Yãmb ne y zakã rãmb sã n wa maand y zakã pʋgẽ zaabr Biibl zãmsgã la pʋʋsgã, y tõe n maana mak-n-wilg kãensã kẽere.
6. Bõe yĩng tɩ d segd n segend Tʋʋmdã tigisgã?
6 D sã n segend Tʋʋmdã tigisg la d tagsd b sẽn na n wɛgs sõssã to-to wã zugu, d na n yãame t’a sɩd tara yamleoogo. D sã n maand woto, d na n tõog n sɩd kenga taab raoodo. (Rom 1:11, 12) D sã n dɩkd sẽk n segend Tʋʋmdã tigisgã, d na n tõog n pidsa tʋʋmd ning Wẽnnaam sẽn bobl-dã neere.—2 Tɩm. 3:17.