Saglse, Tʋʋmdã tigisg sõsdbã yĩnga

Ki-kãngã tɛka, Rĩungã Tʋʋmd pʋgẽ na-kẽndrã na n toeema bilfu. Yʋʋmd 2009 sig-noy kiuugã Rĩungã Tʋʋmd talla sõsg gom-zug sẽn yet tɩ: “D sẽn tõe n segl Tʋʋmdã tigisg to-to.” Sagls nins sẽn pʋgdã na n demsa yɛl kẽer rẽ wɛɛngẽ, la kõ tõnd vẽenem n paase.

◼ Diskuuri: B wilgda sõsdbã sẽn segd n tik zĩis nins n maan b diskuurã. Yaa yẽ a ye bal n segd n gomd tɩ nebã kelgdẽ. A segd n goma bũmb nins sẽn na n sõng tigingã nebã yelle.

◼ Sogsg la leoore: Yaa wa b sẽn maand Gũusg Gasgã zãmsg to-to wã bala. Sɩngr goamã la baasg goamã yaa koɛɛg-koɛɛga. B segd n soka sogsgã fãa. Sõsdã pa segd n gom wʋsg ye. Sẽk sã n beẽ, b tõe n karma vɛrse rãmb kẽere. Sã n pa b wilgame tɩ b karem sulã, b pa segd n karm-b ye.

◼ Sõsg ne kɛlgdbã: Yaa diskuur sõsd sẽn na n wɛgse, la a wat n sokda kɛlgdbã sogsg tɩ b leokdẽ. Pa diskuur bala, leb n pa sogsg la leoor bal ye.

◼ Mak-n-wilgi, la bool-n-soke: B sã n yeel tɩ b maan mak-n-wilgi, saam-biig ning sẽn na n maan sõsgã n segd n ges tɩ b segl mak-n-wilgã. Pa tɩlae tɩ yẽ meng zĩnd mak-n-wilgã pʋgẽ ye. Neb nins a sẽn na n yãkã segd n yɩɩ neb sẽn kõt mak-sõngo, la sẽn tõe n maan tɩ yɩ sõma. Sã n tõeyã, b segd n deng n maaname n yɩlem t’a gese. Yita sõma tɩ y ra yãk koe-moond paalse, bɩ sẽn pa tar minim tɩ b na n wilgd nebã koɛɛgã sẽn segd n moon to-to ye. Pa d sẽn dat tɩ bãmb me paam n dʋ ɛstaraadã zugã yĩng bal la d na n yãk-b ye. La y tõe n yãka sãnda tɩ b yɩ kɛlgdb mak-n-wilgã pʋgẽ. Ned nins sẽn maand mak-n-wilgã segd n teesa kɛlgdbã. Neb nins b sẽn na n bool n sokã segd n kẽnga ɛstaraadã zugu, la b ra pa b zĩisẽ wã n gom ye. B segd n deng n maana mak-n-wilgã la bool-n-sogsã fãa n yɩlme. Lɛɛrã sã n wa rat n looge, y sõsgã la y segd n kʋʋge, lakae y pa segd n bas mak-n-wilgã bɩ bool-n-sokã ye. Nand tɩ kãsemb sõngdbã yãk ned mak-n-wilg bɩ bool-n-sok yĩnga, b segd n deng n yãa kãsem dãmbã sull yel-gɛtã, bɩ kãsem soab a to.

B sã n kõ sagls takɩ sõsg yĩnga, y segd n modg n tũu saglsã neere. Y sã n modg n tũ yɛl nins b sẽn wilg sõs-kãngã pʋgẽ wã neere, na n sõngame tɩ b maan bũmbã fãa tɩ zems Tʋʋmdã tigisg sasa.—1 Kor. 14:40.