Yãmb sogsgã leoore

◼ Wãn to la d tõe n modg tɩ tigingã tigisg sõasg fãa sa wakat ning b sẽn yãkã pʋgẽ?

D sã n sõsd ne d zo-rãmb tɩ sõasgã yaa noogo, d ka bãngd wakatã loogr ye. Yaa rẽ yĩng la sẽn yaa toog tɩ d tõog n kõ tigissã sõss wakat ning b sẽn yãkã pʋgẽ wã. Bõe n tõe n sõng-d tɩ d ra loog wakatã tigissã sasa?

Sɩng-y lɛɛre. Tigingã neb sã n tigmi, sẽn na yɩl tɩ tigisgã sɩng lɛɛr tɩ zũnd-zãnd ra zĩndi, yɩta sõma tɩ b kos neba tɩ b tɩ zĩnd b zĩisẽ, minit a yembr bɩ a yiib nand tɩ tigisgã yaool n sɩnge. (Koɛ. 3:1) Tigisgã sã n yaa sul-bõoneg wala moonegã yiib tigissi, b ka segd n yaas n gũ neb nins sẽn na n wa wa retaarã ye.

Segl-y neere. Bũmb sẽn na n sõng-d tɩ d ra loog wakatã yaa d sẽn na n pĩnd n segl neere. Ning-y sõasgã bõn-datl sẽn ya a soab y yamẽ vẽenega. Bãng-y tags-kãsemsã sẽn yaa b rãmb n gom n tadg b zutu, la y ra bas tɩ yel-bõones lim-b ye. Maan-y tɩ kɛlgdbã tõe n wʋm y sõasgã võor nana-nana. Sõasgã sã n tara mak-n-wilg rãmb la bool-n-sogse, bɩ y reng pĩnd n maan-b n gese. Y sã n tõe fãa, bɩ y reng n zẽk y koɛɛg n maan sõasgã y yembr n ges y sã n pa loog wakatã.

Welg y sõasgã babs toɛy-toɛya. Yaa diskuur tɩ yaa sõasg ne kɛlgdbã la b kõ-y tɩ y maan me, y na n yãame tɩ yɩta sõma tɩ y welg y sõasgã babs toɛy-toɛya. Yãk-y y sẽn na n dɩk sẽk ning babg fãa yĩnga, n gʋls rẽ sõasgã sebr kɩrenga. Rẽ poor tɩ y sã n kõt sõasgã bɩ y maan dẽ tɩ zems ne babg fãa wakate. Sã n yaa sõasg ne kɛlgdbã, bɩ y ra gom wʋsg sɩngrẽ wã tɩ taoorã masã bɩ y yaool n maand yãg-yãge, tagsa nins sẽn tar yõod n yɩɩdã zut ye. Gũusg Gasgã taoor-lʋɩtb me segd n basa sẽk tɩ seke, sẽn na yɩl n wa tõog n maan lebg-n-ges zĩ-gũbrã baasgẽ wã. B leb n segd n gũusame n da wa rɩk sẽk ning b sẽn yãk pʋʋsgã la yɩɩllã yĩngã ye.

Baas-y tigisgã lɛɛre. Tigisg sã n tar sõss toɛy-toɛy wala tʋʋmdã tigisga, sõasd fãa segd n bãnga a sõasgã sẽn sɩngd la a baasd wakat ninga. Bõe la b tõe n maane, b sã n mik tɩ pa gũusi tigisgã na n looga wakatã? Sõasd a ye bɩ sẽn yɩɩd woto na n gom n tadga tags-yẽgã zut la a bas tags-bõonegã sẽn na yɩl tɩ tigisgã ra loog wakatã ye. Sõasd sã n tõog n maan dẽ fãa, yaa bũmb sẽn wilgd t’a yaa karen-saamb sẽn mi neb zãmsgo.

Tõnd sẽn yaa kɛlgdbã tõe n sõnga saam-biig ning sẽn lʋɩt zãmsgã taoorã, n kõt leoor sẽn yaa koees la takɩ. Dẽ, tõnd fãa tõe n sõngame tɩ tigissã “maan wa sẽn segde la ra yɩ yaar ye.”—1 Kor. 14:40, Sebr Sõngo.