Yãmb na n sɩnga Biibl zãmsg ne ned zĩ-likr kiuugã bɩ?
1. Zĩ-likr kiuugã, seb-bʋs la d na n kãab nebã?
1 Zĩ-likr kiuugã, yaa Gũusg Gasgã ne Réveillez-vous ! wã la d na n kãab nebã. La d sã n lebg n na n tɩ ges neb nins sẽn deeg periodik rãmbã, d tõe n kõ-b-la Yãmb dat n bãnga sɩdã bɩ? seb-vãoogã, la d modg n sɩng Biibl zãmsg ne-ba. Wãn to la d tõe n sɩng Biibl zãmsg ne-ba?
2. Ned sã n deeg periodik rãmbã tɩ d lebg n na n tɩ ges-a, wãn to la d tõe n tũnug ne Yãmb dat n bãnga sɩdã bɩ? seb-vãoogã n sɩng Biibl zãmsg ne-a?
2 D sẽn tõe n tũnug ne seb-vãoogã to-to: D tõe n yeela woto: “Sɛb nins mam sẽn da bas ne yãmbã sagenda nebã fãa tɩ b bao n bãng sẽn be Biiblã pʋgẽ wã. [Kõ-y-yã-a Yãmb dat n bãnga sɩdã bɩ? seb-vãoogã, la y wilg-a sogsg nins sẽn be a zugã.] Biiblã leokda sogsg nins sẽn be ka wã vẽenega. Yãmb zoe n soka y mens sogs-kãensã bɩ?” Kelg-y a sẽn na n leok to-to wã, la y naag taab n ges a sokr a ye leoor seb-vãoogã pʋgẽ, la y karem vɛrse nins sẽn be beenẽ wã sʋk a ye. Rẽ poor bɩ y yeel-a tɩ woto yaa Biiblã sẽn yetã bilf bala, la y wilg-a Biiblã yetame sebrã. Rẽ masã, y tõe n kos-a lame t’a yãk sak ning sẽn ta a yam, tɩ y sɩng sul a wãn zãmsgo. Y leb n tõeeme n lak zĩig ning b sẽn wɛgsd bũmb ning yãmb sẽn yã seb-vãoogã zugã sõma. Ad sogsgã la zĩis nins d sẽn tõe n yã b wɛgsgã n paas Biiblã yetame sebrã pʋgẽ:
● Tõnd yell sɩd paka Wẽnnaam bɩ? (Seb-neng a 9-11, sull a 6-10)
● Zabã la namsgã na n wa saame bɩ? (Seb-neng 12, sull 12-13)
● Ned kũum poore, bõe n maande? (Seb-neng 59-60, sull a 7-8)
● Sẽn ki-bã tõe n wa vʋʋgame bɩ? (Seb-neng 71, sull 13-15)
● Wãn to la m segd n pʋʋs tɩ Wẽnnaam deege? (Seb-neng 166-167, sull a 5-8)
● M na n maana wãn n paam sũ-noog hakɩka? (Seb-neng a 9, sull a 4-5)
3. D sã n pa tõe n sɩng Biibl zãmsg ne ned zĩig pʋgẽ, bõe la d tõe n maane?
3 D sã n lebg n tɩ ges ned pipi, n mik tɩ d pa tõe n sɩng Biibl zãmsg ne-a Biiblã yetame sebrã pʋgẽ daar-n-kãnga, d tõe n yãka daar a to n lebg n wa sõs ne-a. Ne nina, tõe tɩ d na n sõsa ne-a naoor a wãn seb-vãoogã pʋgẽ sogsg a wãn zugu, n yaool n gom sebrã yelle. Bɩ d modg n tũnug ne seb-vã-kãngã zĩ-likr kiuugã n sɩng Biibl zãmsg ne nebã, n sõng pʋ-peelem dãmbã tɩ b “bãng sɩdã.”—Zã 8:31, 32.