Yãmb tõe n kẽnga Masedoan bɩ?
1. Bõe n kɩt t’a Poll ne a tũud-n-taasã kẽng Masedoane?
1 Yʋʋmd 49 wã sẽnese, tʋm-tʋmd a Poll yii Siiri Ãntiosã n na n maan a so-toak a yiib-n-soabã. A ra rat n kẽnga Efɛɛz ne Aazimineer tẽns a taabẽ. La ne vʋʋsem sõngã vẽnegre, Wẽnnaam wilg-a lame t’a kẽng Masedoane. Yẽ ne a tũud-n-taasã sakame n sɩd kẽnge, la b paamame n lugl pipi tiging beenẽ. (Tʋʋ. 16:9, 10; 17:1, 2, 4) Rũndã-rũndã me, dũniyã gill zugu, zĩis n be tɩ b rat koe-moondb n paase. (Mat. 9:37, 38) Yãmb tõe n tɩ sõngame bɩ?
2. Bõe yĩng tɩ neb kẽer tagsd tɩ b pa tõe n yik n kẽng zĩig b sẽn datẽ koe-moondb n paase?
2 Tõe tɩ yãmb me rat n yɩɩ misioneer wa a Polle, la y pa tags tɩ y tõe n yik n kẽnga zĩig b sẽn datẽ koe-moondb n paas ye. Tõe tɩ yaa y sẽn tagsd tɩ y pa tõe n zãms buud-gomd a to yĩnga. Tõe tɩ y yik n tɩ bee tẽng a to pʋgẽ tʋʋmã yĩnga, n pa rat n toeem zĩig ye. La y sã n tags rẽ zug la y pʋʋs a Zeova, tõe tɩ y na n yãame tɩ y yɛlã pa gɩdgd y na yik n kẽng zĩig b sẽn datẽ koe-moondb n paas ye.
3. Bõe yĩng tɩ Gileaad lekollã bɩ lekoll a to kẽngr pa tɩlae sẽn na yɩl n tõog n tɩ moon zĩig a to?
3 Gileaad lekollã bɩ lekoll a to kẽngr yaa tɩlae bɩ? Bõe n sõng a Poll ne a tũud-n-taasã tɩ b tõog n tʋm b tʋʋmdã? B teega a Zeova ne a vʋʋsem sõngã. (2 Kor. 3:1-5) Woto yĩnga, baa y yɛlã sã n kɩt tɩ y pa tõe n kẽng Gileaad lekollã bɩ lekoll a to, y ket n tõe n tɩ moona zĩig b sẽn datẽ koe-moondb n paase. Tẽeg-y tɩ ne Wẽnnaam tʋʋmdã lekollã la ne tʋʋmdã tigisgã maasem, y paamda zãmsg sẽn tõe n sõng-yã, baa y sẽn wa n tɩ be zĩig ninga.
4. Bõe yĩng tɩ neb nins yʋʋm sẽn vẽsgã pa segd n tags tɩ b pa tõe n yik n kẽng zĩig b sẽn datẽ koe-moondb n paase?
4 Neb nins yʋʋm sẽn vẽsgã: Kiris-neb nins yʋʋm sẽn vẽsg n ket n tar keelmã, la sẽn tar minim tẽebã wɛɛngẽ wã sɩd tõe n yɩɩ sõngr n kõ zĩis nins b sẽn datẽ koe-moondb n paasã. Yãmb bee retrɛt bɩ? Zĩis kẽere, neb nins sẽn tar pãnsɩõ wã, baa pa waooge, b sã n yik n kẽng zĩig a to b mikdame tɩ ligd ning b sẽn na n yiisd n get b mens yellã, la baa tɩbsgã wɛɛngẽ wã yaa nana n yɩɩd bãmb sẽn yitẽ wã.
5. Bõe la saam-biig a ye sẽn be retrɛt maan-yã?
5 Kãsem soab a ye sẽn be retrɛte, sẽn yaa so-pakd sẽn yit tẽng b sẽn gomd ãngilind pʋgẽ yikame n kẽng tẽng a to, n na n tɩ sõng koe-moondb sull sẽn yaa neb a wae, sẽn gomd ãngilindi. B moona sãamb 30000 sẽn be beenẽ n gomd ãngilindi. Yʋʋm a yiib poore, neb 50 n da wat tigissã. Saam-biigã yeela woto: “Mam sẽn yik n kẽng be wã, m paama bark m sẽn zɩ n paame, la m pa tõe n togs fãa ye!”
6. Bõe la pʋg-sad a ye tõog n maane?
6 Pagb nins sẽn nan pa kẽ kãadmã: A Zeova tũnuga ne pagb n taas neb wʋsg koe-noogã zĩis nins b sẽn datẽ koe-moondb n paasã. (Yɩɩl 68:11, MN) Pʋg-sad a ye n da rat n yik n kẽng n tɩ moon koɛɛgã zĩig b sẽn datẽ koe-moondb n paase, t’a roagdbã ra maand yɩɩr a yĩnga. Woto kɩtame t’a yãk zĩig gudgr sẽn kae, tɩ teedã ligd me pa toog wʋsg n na n kẽnge, n gʋls Betɛllã n paam kibay a taab n paase. Yʋʋm a yoobã a sẽn zĩnd be wã, a paama bark wʋsgo. A yeela woto: “Mam yirã, yɩl n paam Biibl karen-biig pa nana ye. La m sẽn kẽng zĩig b sẽn datẽ koe-moondb n paasã, mam paama Biibl karen-biis wʋsgo, tɩ kɩt tɩ m sẽn zãmsd nebã Biiblã to-to wã sõmblem paase.”
7. Bõe la zak a ye rãmb tõog n maane?
7 Zagsã rãmba: Yãmb sã n tara kamba, rat n yeelame tɩ y pa tõe n yik n kẽng zĩig a to n tɩ moon koe-noogã bɩ? Rao ne a pag sẽn tar kamb a yiib t’a ye tar yʋʋm piig t’a to wã tar yʋʋm a nii yikame n kẽng zĩig a to. Pagã yeela woto: “D sũur yaa noogo, d sẽn paam n wub d kambã ka wã, bala b paam n minima so-pakdb la misioneer dãmba. D sẽn moond zĩig b sẽn datẽ koe-moondb n paasã kɩtame tɩ d vɩɩmã sɩd tar barka.”
8. Bõe n wilgd tɩ pa tɩlae tɩ d zãms buud-gomd a to n yaool n tõog n tɩ moon zĩig a to?
8 Buud-goamã zu-loɛɛga: Yaa y sẽn tagsd tɩ y pa tõe n zãms buud-gomd a to yĩng n kɩt tɩ y pa tõe n yik n kẽng zĩig a to bɩ? Tõe tɩ zĩis nins b sẽn datẽ koe-moondb n paasã kẽer pʋsẽ, b gomda yãmb buudã gomd be me. Rao ne a pag sẽn gomd ãngilind yikame n kẽng tẽng b sẽn gomd ɛspayõll pʋgẽ, tɩ sãamb wʋsg sẽn gomd ãngilind be beenẽ. Tẽn-kãng Betɛllã sẽn wilg-b ãngilindã tigims nins sẽn datẽ koe-moondb n paasã, b yãka a yembre, n tɩ kaag-a naoor a yiibu. Rẽ poore b lebg n kulame n tɩ boog b depãens rãmbã, n kẽgs ligd yʋʋmd tõre. B sẽn wa n dat n lebg n kẽngã, beenẽ saam-biisã sõng-b lame tɩ b paam roog ligd sẽn pa toogo.
9, 10. Neb nins sẽn be sãand weoogã bɩ sẽn yik n tɩ vɩ zĩig a to wã segd n tagsa bõe yelle, la bõe yĩnga?
9 Neb nins sẽn be sãand weoogã: Yaa y sẽn wa n be tẽn-zẽng la y lebg a Zeova Kaset soab bɩ? Tõe tɩ yãmb yirã b rata koe-moondb wʋsg n paase. Yãmb tõe n lebg n kulame n tɩ sõng bɩ? Tõe tɩ yaa nana ne yãmb tɩ y paam tʋʋmd la gãag zĩig n yɩɩd sãana. Tõe tɩ y wʋmda buud-gomd ning neb wʋsg sẽn gomd yãmb tẽngẽ wã. Sẽn paase, koɛɛgã mooneg sasa tõe tɩ nebã na n sak n kelga yãmb n yɩɩd sãana. Yãmb bee retrɛt n vɩ tẽn-bedr pʋgẽ, tɩ b moon yãmb moonegã zĩig n yɩlme, tɩ y tigingã me tar yel-gɛtb sẽn get a yell sõma bɩ? Sã n yaa woto bɩ y tags n ges y sã n pa tõe n yik n leb y ba-yirã, bɩ zĩig y sẽn kẽnge, y sẽn wa n ket n tʋmdẽ wã n tɩ sõng tigims nins sẽn pa tar koe-moondb wʋsgã.
10 Albani rao n zoe n kẽng Itali, la be a paama tʋʋmd sẽn yaood sõma, n toond a zakã rãmb ligdi. A sẽn lebg a Zeova Kaset soabã poore, a zãmsa so-pakdb buud-gomd ning b sẽn gomd Albani wã Itali beenẽ, sẽn na yɩl tɩ b kẽng Albani, bala b ra rata koe-moondb be n paase. Saam-biigã yeela woto: “Yaa zĩig ning mam sẽn yiẽ wã la b sẽn da rebdã. B pa wʋm tõnd buudã gomde, la baasgo b yãgdame n dat n kẽnge. Be yaool n yaa mam ba-yiri, m le wʋmda buudã gomd sõma. Mam bee Itali ka n maand bõe?” Saam-biigã yãka yam n na n lebg n kul Albani n tɩ moon koe-noogã. Rẽ poore a yeela woto: “Baa ne m sẽn bas m tʋʋmdã sẽn da yaood sõma Itali wã, m pa maand m bãngẽ baa bilf ye. Albani ka, mam tʋmda tʋʋmd sẽn tar barka. Ne maam, tʋʋmd kae sẽn tar yõod la kõt sũ-noog hakɩk n yɩɩd f sẽn na n tʋmd a Zeova tʋʋmdã ne f sũur fãa ye!”
11, 12. Bõe la neb nins sẽn dat n yik n kẽng zĩig b sẽn datẽ koe-moondb n paasã segd n maane?
11 Y sẽn tõe n maane: Nand t’a Poll ne a tũud-n-taasã kẽng Masedoanã, b ra rat n teesa Aazi soolmẽ wã, la vʋʋsem sõngã gɩdg-b lame, tɩ b tees nug-rɩtg sẽnese. (Tʋʋ. 16:6) La b sẽn wa n kolg Bitini, a Zezi gɩdg-b lame. (Tʋʋ. 16:7) A Zeova ket n tũnugda ne a Zezi n get koɛɛgã mooneg yelle. (Mat. 28:20) Woto yĩnga, y sã n magdame n na n yik n kẽng zĩig b sẽn datẽ koe-moondb n paase, bɩ y pʋʋs a Zeova n kos a sõngre.—Luk 14:28-30; Zak 1:5.
12 Kos-y sagls y tigingã kãsem dãmbã la kiris-neb tẽeb sẽn tar pãng nengẽ. (Yel. 11:14; 15:22) Karm-y sɛb siglgã sẽn yiis tɩ gomd yik n kẽng zĩig b sẽn datẽ koe-moondb n paasã yellã. Yɩta sõma tɩ y reng n tɩ maan rasem wʋsg tẽng ning y sẽn yãk n dat n kẽngã. Y sã n sɩd rat n yik n kẽnga zĩig a to, y tõe n gʋlsa Betɛllã n paam kibay n paase. La y pa segd n tool y lɛtrã y toor ye. Y segd n kɩsa y tigingã kãsem dãmba, tɩ b paas bãmb me sẽn tagsd bũmb ningã n yaool n toole.—Ges-y Organisés pour faire la volonté de Jéhovah sebrã neng 111-112.
13. Bõe la Betɛllã na n maan n sõng yãmba, la bõe la yãmb mengã segd n maane?
13 Betɛllã na n toola yãmb kibay zĩig ning y sẽn dat n kẽngã wɛɛngẽ, sẽn na yɩl n sõng-yã. La pa Betɛllã n na n sõng yãmb tɩ y tõog n ta be, bɩ n bao gãag zĩig n kõ-y ye. Yaa yãmb mengã n segd n ges rẽ yelle, nand tɩ y yik n kẽnge. Ned sã n dat n yik n kẽng zĩig a to, a segd n tõog n gesa a meng yelle.—Gal. 6:5.
14. Bõe la neb nins sẽn pa tõe n yik n kẽng zĩig a to wã tõe n maane?
14 Y sã n pa tõe n yik n kẽng zĩig a to: Baa y sã n pa tõe n yik n kẽng zĩig a to bɩ y ra koms raood ye. Tõe tɩ kʋɩlen-kãseng a to ‘paka yãmb taoor tɩ y tʋm tʋʋmd sẽn be nafre.’ (1 Kor. 16:8, 9) Tõe tɩ y tigims sull yel-getã mii zĩis sẽn pa zãr ne y sakã, b sẽn datẽ koe-moondb n paase. Y tõe n tɩ sõnga tiging bɩ sull sẽn maand b tigissã ne buud-gomd a to me. Y tõeeme me n kell n pa y tigingã pʋgẽ n yɩ so-pakda, bɩ n moon wʋsg n paase. Y yɛlã sẽn yaa to-to fãa, sẽn tar yõodã yaa y sẽn na n moond koɛɛgã ne y sũur fãa.—Kol. 3:23.
15. Koe-moond sã n wa rat n yik n kẽng zĩig b sẽn datẽ koe-moondb n paase, d manesem segd n yɩɩ wãn-wãna?
15 Yãmb mii koe-moond sẽn dat n yik n kẽng zĩig b sẽn datẽ koe-moondb n paas bɩ? Kɩt-y t’a bãng tɩ y sũur yaa noog ne a sẽn dat n maanã, la y teel-a. A Poll sẽn wa n yit Siiri Ãntiosã, rẽ tɩ Rom la Alɛgsãndri sẽn yãk b toogo, tẽn-kãng n da yaa bedr n yɩɩd Rom soolmã tẽns a taabã. Tẽngã sẽn da yaa bedrã yĩnga, beenẽ tigingã ra rata a Poll sõngre. Dẽnd a Poll sã n looge, b sũur da na n sãamame. La Biiblã pa wilgd tɩ saam-biisã makame n na n kɩt t’a Poll ra loog ye. B pa tags bãmb tẽngã yell bal ye. B ninga b yamẽ tɩ “pʋʋgã yaa dũniyã.”—Mat. 13:38.
16. Bõe yĩng tɩ y segd n tags n ges y sã n tõe n kẽnga tẽng a to?
16 A Poll ne a tũud-n-taasã sẽn sak n kẽng Masedoanã, b paama bark wʋsgo. B sẽn wa n be Filipã, b moona a Lidi, la a Zeova “paka a sũur t’a reeg a Poll sẽn togs bũmb ninsã fãa.” (Tʋʋ. 16:14) Tags-y n ges a Poll ne a tũud-n-taasã sũur sẽn yɩ noog to-to, a Lidi ne a zakã rãmb fãa sẽn deeg lisgã! Zĩis wʋsgo, neb sẽn yaa pʋ-peelem dãmb wa a Lidi n be n nan pa wʋm Rĩungã koɛɛgã ye. Yãmb sã n kẽng Masedoane, rat n yeel tɩ zĩig b sẽn datẽ koe-moondb n paase, tõe tɩ y na n yãa nin-kãensã buudu, n sõng-ba.