“M segd n yikame n kẽng zĩig a to bɩ?”

¹ Sẽn na yɩl n tũ noor ning a Zezi sẽn kõ n yeel tɩ b ‘kẽng n maan neba buud fãa tɩ b yɩ . . . karem-biisã,’ a Zeova sõgen dãmb wʋsg sẽn tar yẽesem yikame n kẽng n na n tɩ sõgen zĩig ning ratem sẽn yaẽ kãseng n yɩɩdã. (Mat. 28:⁠19) B rɩkda togs-n-taar ne a Polle, sẽn sak booll kãngã wã: “Wa-y Masedoan soolem n wa sõng tõndo.” (Tʋʋ. 16:⁠9) Wãn to la b tõe n maan dẽ vẽenega?

² Maand-y yɛlã ball-balle: Yãmb tara mooneg zĩig b sẽn maand wakat-wakat bal yãmb tigingã pʋgẽ bɩ? Sã n yaa woto, y tõe n modg n tʋma zĩ-kãense. Sẽn deng tɩ y kẽng zĩig a to, tɩ yã-y yãmb kẽem dãmbã n bãng b sã n tagsdame tɩ y segla sõma n tõe n loog zĩig a to. Y tõeem me n sʋk y bab-sak sull yel-gɛtã n bãng a sã n mii tiging sẽn pẽ y sẽn tõe n tɩ yalg y ministɛɛrã be. Sẽn paase, y sã n geelg yɛlã neer poore, tõe tɩ y tʋll n tɩ sõng yãmb tẽngã babg a to pʋgẽ, bɩ tẽng a to. Y sã n tʋlla woto, yãmb ne y tigingã kẽem dãmb sull segd n gʋlsa zĩig ning yãmb sẽn dat n tɩ sõgena filialle, n wilg yãmb sẽn yitẽ la y yɛl sẽn yaa to-to teokarasi wã wɛɛngẽ. Yɩtẽ-la yam bũmb tɩ y reng n tɩ ges zĩigã n bãng y sã n na n dɩka sard n tɩ zĩnd be wakat fãa.

³ Yɩ-y gũusdb tẽng a to zĩndgã wɛɛngẽ: Tõnd saam-biis wʋsg sõor sẽn tar paasg yikdame n debd tẽns a taaba, b sẽn dat vɩɩm sẽn tar naar n yɩɩd bɩ yolsg ne weoogrã yĩnga. Wakat kãng pʋgẽ, nin-wẽns n kãab saam-biis kẽer tɩ b na n sõng-b lame tɩ b tilg tẽn-paalgẽ wã n zãmb-b n deeg b ligd n bas-b zaalem. Wakat kẽere nin-kãensã makdame meng n na n modg sãambã n kẽes manesem wẽns yembd pʋgẽ. La b sã n zãgse, nin-wẽn-kãensã basd-b-la woto bal tẽng ning b sẽn kẽ wã pʋgẽ tɩ b bãng b sẽn kẽedẽ. Dẽ, sãana sẽn be yell ning pʋgẽ wã lebgda wẽng n yɩɩd a sẽn da yaa to-to a ba-yirã. Tõe n wa yaa tɩlae tɩ b kos saam-biis zĩig n gãand bɩ n kos tɩ b sõng-ba. Rẽ wata ne zɩɩb n kõt kiris-neb zags a taab sẽn maood ne b mens zu-loeese. Yikr a woto b sẽn ka tags tɩ bɩ la b yik kɩtame tɩ zags kẽer neb welg n tɩ be toor ne taaba, tɩ zags me pãng koms tẽebã wɛɛngẽ.—⁠1 Tɩm. 6:8-11.

⁴ Y sã n dat n yik n kẽng zĩig a to y meng nafr yĩng bala, bãng-y tɩ y sẽn beẽ fãa, y na n sega zu-loeese. Yaa nana tɩ f tõog zu-loees zĩig ning fo sẽn zoe n wʋmdẽ neba buud-goam la b rog-n-mikã, n yɩɩd f sẽn na n lebs n sɩng paalem zĩigẽ f sẽn ka minim.