Yãmb modgdame n na n paam zãmsg sõma a Zeova nengẽ bɩ?
1. A Zeova tagsg yaa bõe zãmsgã wɛɛngẽ?
1 A Zeova sẽn yaa tõnd “karen-saamb” sẽn ka to wã ratame tɩ d yɩ neb sẽn paam zãmsg sõma. (Ezai 30:20) A sɩnga a karen-saamdã a Bi-riblã naaneg poor bala. (Zã 8:28) Baa a Ãdem kɩɩsgã poore, a Zeova pa bas ninsaalbã zãmsg ye. A sẽn nong-bã yĩnga, a wilgd-b-la b sẽn segd n maanega.—Ezai 48:17, 18; 2 Tɩm. 3:14, 15.
2. Zãmsg tʋʋm-bʋg la b tʋmd rũndã-rũndã?
2 Rũndã-rũndã, a Zeova kɩtame tɩ b zãmsd neba, hal tɩ yaa tʋʋm-kãseng buud sẽn zɩ n zĩndi. Wala a Ezai sẽn da pĩnd n dɩk makr n bilgã, dũniyã gill zugu, neb milyõ rãmb n kaoog n kẽnd a ‘Zeova roog tãngã’ zugu. (Ezai 2:2) Bõe yĩng tɩ b kaoog n kẽnd be? B ratame n paam tɩ Wẽnnaam a Zeova yɩ b karen-saamba, n zãms-b a soayã! (Ezai 2:3) Yʋʋmd 2010 pʋgẽ, a Zeova Kaset rãmbã rɩka sẽn yɩɩd lɛɛr dãmb milyaar a 1 la pʋɩ-sʋka, n moon koɛɛgã la b zãms nebã bũmb nins sẽn be Biiblã pʋgẽ wã. Sẽn paase, semen fãa, a Zeova Kaset rãmbã Rĩung rotã sõor sẽn yɩɩd 105000 wã sẽn be dũniyã gill zugã pʋsẽ, nebã paamda zãmsgo, n bãngd Wẽnnaam la a raabã. Tʋm-tʋmd sẽn tũud sɩd la sẽn tar yamã yiisda sɛb buud-goam sõor sẽn yiid 500 pʋgẽ nebã zãmsg yĩnga.
3. Wãn to la zãmsg ning a Zeova sẽn kõtã sõng yãmb mengã?
3 D rɩta Wẽnnaam zãmsgã yõod sõma: D sẽn paam tɩ Wẽnnaam zãmsd tõndã sɩd nafda tõnd wʋsgo! Kɩtame tɩ d bãng tɩ Wẽnnaam tara yʋʋre, la tɩ tõnd yell pak-a lame. (Yɩɩl 83:18, MN; 1 Pɩɛ. 5:6, 7) D bãnga sogsg wʋsg sẽn tar yõod leoore. Wala makre: Bõe yĩng tɩ ãdem-biisã namsdẽ, la b kiidẽ? D na n maana wãn n paam sũ-noog hakɩka? Vɩɩmã yõod yaa bõe? Sẽn paase, a Zeova kõo tõnd sagls sẽn tõe n sõng tõnd tɩ “d vɩɩmã yɩ noogo.”—Zer. 7:23.
4. a) Sõdg-y lekoll kẽer a Zeova sẽn kɩt tɩ b lugl a nin-buiidã yĩnga? b) Bõe yĩng tɩ d segd n modg n paam zãmsg sõma a Zeova nengẽ?
4 A Zeova leb n kɩtame tɩ b lugl lekoll rãmb a nin-buiidã yĩnga, sẽn na yɩl n sõng neb kẽer tɩ b tõog n tʋm a tʋʋmdã sõma n paase. Seb-neng a 4-6 pʋgẽ, b sõdgda lekoll rãmb siglgã sẽn lugli. Baa tõnd yɛlã sẽn yaa to-to wã sã n kɩt tɩ d pa tõe n kẽng lekoll kãensã, rẽ yĩnga d dɩta zãmsg nins d sẽn zoe n tõe n paamã nafa bɩ? Dũni kãngã pʋgẽ, karen-saamb dãmbã la neb a taabã nong n sagenda kom-bɩɩsã tɩ b karem n zãage. Rẽ yĩnga d sẽn mi rẽ wã, d sagenda kom-bɩɩsã tɩ b modg n wa kẽes b mens Wẽnnaam tʋʋmã pʋgẽ, n paam zãmsg ning sõmblem sẽn ka to wã bɩ? D sã n modg n paam zãmsg sõma a Zeova nengẽ, na n kɩtame tɩ d vɩɩmã yɩ noog masã menga, la kɩt tɩ d wa paam vɩɩm sẽn ka sate.—Yɩɩl 119:105; Zã 17:3.
Lekoll kẽer a Zeova siglgã sẽn lugli
Kareng la gʋlsg zãmsg lekolle
• A yõodã yaa bõe? Yaa sẽn na yɩl n sõng nebã tɩ b bãng kareng la gʋlsgo, n tõog n karemd Biiblã la b zãmsd-a, la b tõog n zãms neb a taab me.
• Kaoosda wakat a wãna? Bee ne nebã minim la b yɛlã sẽn yaa to-to.
• Maanda yɛ? Rĩungã roogẽ.
• Ãnd n tõe n kẽnge? Koe-moondbã, la Biiblã karen-biis nins sẽn sɩng tigissã waoongã.
• Maanda wãn n kẽ? Yaa tigingã kãsem dãmb n get tigingã yɛl sẽn yaa to-to wã n sigli, la b sagl neb nins fãa sẽn datã tɩ b wa gʋls b yʋy.
Wẽnnaam tʋʋmdã lekolle
• A yõodã yaa bõe? Yaa sẽn na yɩl n sõng koe-moondbã tɩ b tõog n moon koe-noogã sõma la b zãms neb a taaba.
• Kaoosda wakat a wãna? Yaa wakat fãa.
• Maanda yɛ? Rĩungã roogẽ.
• Ãnd n tõe n kẽnge? Koe-moondbã fãa, la neb nins me sẽn wat tigissã n pa vaandẽ, n sak Biiblã sẽn yet bũmb ninsã la b tũud rẽ wã.
• Maanda wãn n kẽ? Togs-y Wẽnnaam tʋʋmdã lekoll yel-gɛtã.
Buud-gom-zẽng zãmsg lekolle
• A yõodã yaa bõe? Yaa sẽn na yɩl n sõng koe-moondb tɩ b tõog n moon koe-noogã buud-gom-zẽng pʋgẽ.
• Kaoosda wakat a wãna? Kiis a naas bɩ a nu. Nong n yaa sibr yibeoog fãa, lɛɛr a ye wall a yiib pʋgẽ.
• Maanda yɛ? Nong n yaa Rĩung roog pʋgẽ.
• Ãnd n tõe n kẽnge? Koe-moondb sẽn kõt mak-sõngo, sẽn baood n na n taas koe-noogã neb sẽn gomd buud-gom-zẽnga.
• Maanda wãn n kẽ? Yaa Betɛllã n get yɛlã sẽn yaa to-to wã n sigli.
Rĩungã rot meebo
• A yõodã yaa bõe? Yaa sẽn na yɩl n sõng ne Rĩungã rot meeb la b manegre. Pa lekoll ye. La ne rẽ maasem, neb nins sẽn sõngd ne yamleoogã tõe n paama bãngr la minim, n wa tõog n tɩ sõng ne meeb tʋʋm a taaba.
• Kaoosda wakat a wãna? Bee ne ned fãa sẽk la a yɛl sẽn yaa to-to.
• Maanda yɛ? Yãmb babgẽ zĩis ning fãa b sẽn met Rĩungã roogo. B mi n yãka b neb kẽer tɩ b kẽng zĩ-zãrgẽ, n tɩ sõng neb sabaab rãmb sẽn paame.
• Ãnd n tõe n kẽnge? Rap la pagb sẽn deeg lisgu, tɩ b tigingã kãsem dãmb me sak tɩ b sɩd kõta mak-sõngo. Pa tɩlae tɩ b tar rot meeb minim ye.
• Maanda wãn n kẽnge? Y segd n deega seb-vãoog [Construction des Salles du Royaume — Questionnaire pour les volontaires (S-82)] kãsem dãmbã nengẽ n gʋls n kõ-ba.
So-pakrã tʋʋmd lekolle
• A yõodã yaa bõe? Yaa sẽn na yɩl n sõng so-pakdbã tɩ b tõog n ‘tʋm b tʋʋmdã neere.’—2 Tɩm. 4:5.
• Kaoosda wakat a wãna? Semen a yiibu.
• Maanda yɛ? Yaa Betɛllã n yãkd zĩigã. La naoor wʋsgo, yaa Rĩung roog pʋgẽ.
• Ãnd n tõe n kẽnge? Yaa so-pakdb sẽn kaoos tʋʋmdẽ wã yʋʋmd bɩ sẽn yɩɩd rẽ.
• Maanda wãn n kẽnge? B yãkda so-pakdb nins sẽn segd n kẽngã, tɩ b tigims sull yel-gɛtã togs-ba.
Betɛllẽ tʋm-tʋm-paalsã lekolle
• A yõodã yaa bõe? Yaa sẽn na yɩl n sõng sẽn nan wa-b paalmã tɩ b tʋʋmdã tall bark la kõ-b sũ-noogo.
• Kaoosda wakat a wãna? Semen piig la a yoobe, la b maand-a-la lɛɛr a ye semen fãa.
• Maanda yɛ? Betɛllẽ wã.
• Ãnd n tõe n kẽnge? Yaa sẽn nan lebg-b Betɛllẽ tʋm-tʋmdb paalmã, la sẽn wa-b n na n tʋm be ne yamleoog n kaoos yʋʋmd bɩ sẽn yɩɩd rẽ wã.
• Maanda wãn n kẽnge? Yaa Betɛllã tʋm-tʋmdb nins sẽn nan wa paalmã fãa n kẽngde.
Rĩungã tʋʋmd lekolle
• A yõodã yaa bõe? Yaa sẽn na yɩl n zãms kãsem dãmbã la kãsemb-sõngdbã tɩ b bãng n ges tigingã nebã la a tʋʋmã yelle. (Tʋʋ. 20:28) Sã n maan yʋʋm a wãn fãa, Siglgã taoor lʋɩtb Sull kɩtdame tɩ b maan lekoll kãngã.
• Kaoosda wakat a wãna? Yʋʋm a wãnã sẽn loogã pʋgẽ, b maan-a-la raar a ye la pʋɩ-sʋk ne kãsem dãmbã, tɩ kãsemb-sõngdbã nengẽ yɩ daar a ye.
• Maanda yɛ? Nong n yaa Rĩung roog pʋgẽ wall tigis-kãseng roogẽ.
• Ãnd n tõe n kẽnge? Kãsem dãmbã ne kãsemb-sõngdbã.
• Maanda wãn n kẽnge? Yaa tigims sull yel-gɛtã n togsd kãsem dãmbã la kãsemb-sõngdbã.
Tigingã kãsem dãmb lekolle*
• A yõodã yaa bõe? Yaa sẽn na yɩl n sõng tigingã kãsem dãmbã tɩ b tʋm b tʋʋmdã sõma.
• Kaoosda wakat a wãna? Rasem a nu.
• Maanda yɛ? Yaa Betɛllã n yãkde, la nong n yaa Rĩungã roog pʋgẽ wall tigis-kãseng roogẽ.
• Ãnd n tõe n kẽnge? Yaa kãsem dãmbã bala.
• Maanda wãn n kẽnge? Betɛllã n togsd kãsem dãmbã.
Tigims sul la distrik yel-gɛtbã ne b pagbã lekolle*
• A yõodã yaa bõe? Yaa sẽn na yɩl n sõng tigims sul la distrik yel-gɛtbã tɩ b bãng n sõng tigimsã sõma, la b wɩng ne ‘koɛɛgã mooneg la nebã zãmsgã,’ la b tõog n ges tigimsã neb yell sõma.—1 Tɩm. 5:17; 1 Pɩɛ. 5:2, 3.
• Kaoosda wakat a wãna? Kiis a yiibu.
• Maanda yɛ? Yaa Betɛllã n yãkd zĩigã.
• Ãnd n tõe n kẽnge? Yaa tigims sul la distrik yel-gɛtbã.
• Maanda wãn n kẽnge? Yaa Betɛllã n togsd tigims sul la distrik yel-gɛtbã ne b pagbã.
Biiblã zãmsg lekoll rakõapã yĩnga*
• A yõodã yaa bõe? Yaa sẽn na yɩl n zãms kãsem dãmb la kãsemb-sõngdb sẽn yaa rakõap tɩ b wa tõog n tʋm tʋʋm a taab n paase. Lekollã poore, b wʋsg kẽngda b tẽngã zĩis nins koe-moondbã sẽn pa waoogã. Kẽer me sã n tõe, b yãkd-b lame tɩ b kẽng tẽn-zẽms n tɩ moon koɛɛgã.
• Kaoosda wakat a wãna? Kiis a yiibu.
• Maanda yɛ? Yaa Betɛllã n yãkde, la nong n yaa tigis-kãseng roogẽ wall Rĩung roogẽ.
• Ãnd n tõe n kẽnge? Yaa rakõap sẽn tar yʋʋm 23 la 62 sʋka, n tar keelem la b rat n tʋm b tẽed-n-taasã yĩnga, la b rat me n tɩ moon koɛɛgã zĩis nins koe-moondbã sẽn pa waooge. (Mark 10:29, 30) Segd n yɩɩ rap sẽn yaa kãsem dãmb bɩ kãsemb-sõngdb n maan yʋʋm a yiib bɩ sẽn yɩɩd rẽ.
• Maanda wãn n kẽnge? B sã n na n maan lekoll kãngã yãmb babgẽ wã, rasem a yiib tigis-kãsengã sasa, b maanda tigsg ne neb nins sẽn dat tɩ b yãk-b tɩ b kẽngã. Tigs-kãng wakate, b togsd-b-la yɛl a taab lekoll kãngã wɛɛngẽ.
Biiblã zãmsg lekoll sẽn kẽ-b kãadmã yĩnga*
• A yõodã yaa bõe? Yaa sẽn na yɩl n sõng sẽn kẽ-b kãadem n pa wubd kambã tɩ b paam zãmsg sõma n tõog n tʋm wʋsg a Zeova siglgã pʋgẽ. Lekollã poore, b wʋsg kẽngda b tẽngã zĩis nins koe-moondbã sẽn pa waoogã. Kẽer me sã n tõe, b yãkd-b lame tɩ b kẽng tẽn-zẽms n tɩ moon koɛɛgã.
• Kaoosda wakat a wãna? Kiis a yiibu.
• Maanda yɛ? B sẽn nan maan lekoll kãngã yaa naoor a wãn bala, la yɩɩ Etazĩni, a Zeova Kaset rãmbã karen-do-kãsengã sẽn be Patɛrsonnã pʋgẽ (Centre d’enseignement des Témoins de Jéhovah). La b na n wa maand-a-la zĩis a taab me. Yaa Betɛllã n na n yãke, la na n yɩɩ tigis-kãseng roogẽ wall Rĩung roogẽ.
• Ãnd n tõe n kẽnge? Yaa pagb ne b sɩdb sẽn tar yʋʋm 25 la 50 sʋka. B segd n tara keelem la b tõe n tɩ moon koɛɛgã zĩis nins koe-moondbã sẽn pa waooge, la b na n sɩd sak n kẽng zĩig ning fãa b sẽn na n tʋm-ba. (Ezai 6:8) Sẽn paase, b kãadmã kõom segd n taa yʋʋm a yiibu. B segd n yaa so-pakdb sẽn na maan yʋʋm a yiib bɩ sẽn yɩɩd rẽ.
• Maanda wãn n kẽnge? B sã n na n maan lekoll kãngã yãmb babgẽ wã, daar a ye tigs-kãsengã sasa, b maanda tigsg ne neb nins sẽn dat tɩ b yãk-b tɩ b kẽngã. Tigs-kãng wakate, b togsd-b-la yɛl a taab lekoll kãngã wɛɛngẽ.
Gileaad lekollã
• A yõodã yaa bõe? Yaa sẽn na yɩl n zãms so-pakdb la neb a taab sẽn kẽes b mens zãng Wẽnnaam tʋʋmdã pʋgẽ tɩ b tõog n lebg misioneer dãmba.
• Kaoosda wakat a wãna? Kiis a nu.
• Maanda yɛ? Yaa Etazĩni, a Zeova Kaset rãmbã karen-do-kãsengã sẽn be Patɛrsonnã pʋgẽ (Centre d’enseignement des Témoins de Jéhovah).
• Ãnd n tõe n kẽnge? Pagb ne b sɩdb sẽn yaa a Zeova Kaset rãmb sẽn ta yʋʋm a tãabo, sẽn wʋmd ãngilindi. Yʋʋmd ning b sẽn na n sɩng n kosã, segdame tɩ b tar yʋʋm 21 la 38 sʋka. B kãadmã kõom segd n taa yʋʋm a yiibu. B segd n kẽesa b mens zãng Wẽnnaam tʋʋmdã pʋgẽ sẽn ta yʋʋm a yiib bɩ sẽn yɩɩd rẽ. B segd n yaa neb sẽn tar keelem. Tõe n yɩɩ misioneer dãmb sẽn nan pa kẽnge, so-pakdb sẽn be tẽn-zẽnga, tigims sul la distrik yel-gɛtb ne b pagba, Betɛllẽ tʋm-tʋmdba, pʋg-sɩdb sẽn da zoe n paam n kẽng Wẽnnaam tʋʋmdã zãmsg lekoll wall Biiblã zãmsg lekoll rakõapã yĩngã, la pagb ne b sɩdb sẽn kẽng Biiblã zãmsg lekoll sẽn kẽ-b kãadmã yĩnga.
• Maanda wãn n kẽnge? Tẽns nins pʋsẽ b sẽn maand-a wã, rasem a tãab tigs-kãsengã sasa, b maanda tigsg ne neb nins sẽn dat tɩ b yãk-b tɩ b kẽngã. Tigs-kãng wakate, b togsd-b-la yɛl a taab lekoll kãngã wɛɛngẽ. Yãmb rasem a tãab tigs-kãsemsã sasa tɩ b sã n pa maand tigsg a woto, tɩ yãmb yaool n dat n kẽng lekoll kãngã, bɩ y gʋls lɛtr n tool Betɛllã tɩ y na paam kibay n paase.
Betɛll rãmbã yel-gɛtb ne b pagbã lekolle
• A yõodã yaa bõe? Yaa sẽn na yɩl n sõng Betɛll rãmbã ne siglgã biru rãmbã yel-gɛtb tɩ b tõog n ges b tʋʋmã yell neere. Rat n yeel tɩ Betɛllã zak yell gesgo, tigimsã tʋʋmã yell gesgo, tigims sulã la b moonegã zĩis yell gesgo, sɛbã lebgre, b yiisg la b toolgã yell gesgo, n paas tʋʋm a taaba.—Luk 12:48b.
• Kaoosda wakat a wãna? Kiis a yiibu.
• Maanda yɛ? Yaa Etazĩni, a Zeova Kaset rãmbã karen-do-kãsengã sẽn be Patɛrsonnã pʋgẽ (Centre d’enseignement des Témoins de Jéhovah).
• Ãnd n tõe n kẽnge? Yaa Betɛll rãmbã ne siglgã biru rãmbã yel-gɛtbã, la neb nins b sẽn dat n bobl tʋʋm-kãngã.
• Maanda wãn n kẽnge? Yaa Siglgã taoor lʋɩtb Sullã n boond nin-kãensã ne b pagbã.
[Tẽngr not rãmbã]
B nan pa maand lekoll kãngã tẽnsã fãa pʋsẽ ye.
B nan pa maand lekoll kãngã tẽnsã fãa pʋsẽ ye.
B nan pa maand lekoll kãngã tẽnsã fãa pʋsẽ ye.
B nan pa maand lekoll kãngã tẽnsã fãa pʋsẽ ye.