Bʋʋm piig la a yiib sẽn kɩt tɩ d moond koɛɛgã

Bõe yĩng tɩ d moond zak-zaka, la d zãmsd nebã Biiblã? Rẽ yĩnga, bʋʋm kãsengã yaa sẽn na yɩl n sõng pʋ-peelem dãmbã tɩ b yã sor ning sẽn debd vɩɩm zĩigẽ wã bɩ? (Mat. 7:14) Bʋʋm piig la a yiibã d sẽn wilg tẽngrã sʋka, yẽ la pipi, la pa yẽ la bʋʋm kãsengã ye. Ne yãmb tagsgo, yaa bʋg la bʋʋm kãsengã?

1. Fãagda yõyã.—Zã 17:3.

2. Keoogda nin-wẽnsã.—Eze. 3:18, 19.

3. Pidsda gomd Biiblã sẽn pĩnd n togse.—Mat. 24:14.

4. Wilgda Wẽnnaam tɩrlmã. A Zeova sã n wa sãam nin-wẽnsã, ned kõn tõog n yeel t’a pa kõ-b weer sẽn na yɩl tɩ b tek ye.—Tʋʋ. 17:30, 31; 1 Tɩm. 2:3, 4.

5. Sõng nebã tɩ b bãng Wẽnnaamã yaa zɩɩb sẽn zao d zugu, bala a ra-b-la ne a Zezi zɩɩmã.—Rom 1:14, 15.

6. Kɩtdame tɩ d pa tar zɩɩm samd ye.—Tʋʋ. 20:26, 27.

7. Yaa tɩlae, tõnd mengã fãagr yĩnga.—Eze. 3:19; Rom 10:9, 10.

8. Yaa kaset tɩ d nonga d taabã. —Mat. 22:39.

9. Wilgdame tɩ d sakda a Zeova ne a biigã.—Mat. 28:19, 20.

10. Naaga bũmb nins d sẽn maand Wẽnnaam tũubã pʋgẽ wã.—Heb. 13:15.

11. Wilgdame tɩ d nonga Wẽnnaam.—1 Zã 5:3.

12. Sõngdame tɩ Wẽnnaam yʋʋrã paamd waoogre.—Ezai 43:10-12; Mat. 6:9.

Yaa vẽeneg tɩ bʋʋm a taab n kete. Wala makre, koɛɛgã mooneg kengda tõnd tẽebã, leb n yaa zu-zẽkr n kõ-do, bala d yaa Wẽnnaam tʋmd-n-taase. (1 Kor. 3:9) La bʋʋm kãsengã yaa 12 soabã. Nebã kelgd tɩ b pa kelgd me, koɛɛgã mooneg sõngdame t’a Zeova yʋʋrã paamd waoogre, la kɩtdẽ t’a tõe n leok sẽn paoogd-a yẽ wã. (Yel. 27:11) Sẽn yaa a soab fãa, bʋʋm waoog sẽn kɩt tɩ d na n kell n ‘zãms nebã la d moon koe-noogã n ka bas ye.’—Tʋʋ. 5:42.