Ãnda rãmb la sõs-kãngã na n yɩ noogo?
1. D sã n wa karemd Gũusg Gasgã la Réveillez-vous ! wã, bõe la d segd n maane, la bõe yĩnga?
1 B sẽn segend Gũusg Gasgã la Réveillez-vous ! wã sõss to-to wã yaa sẽn na yɩl tɩ dũniyã gill neb tʋlg n kelg koe-noogã. Rẽ n so tɩ seb-kãensã sõssã gomd bũmb toor-toor yelle. D sã n wa karemd-ba, d segd n bao n bãnga neb nins gom-zug fãa sẽn na n yɩ noogo, la d mao tɩ b rãmbã paam n karme.
2. Tõnd sɛbã sõss bʋs n tõe n yɩ neb kẽer noogo?
2 Yãmb da sõsa ne y tʋmd-n-taag bũmb Biiblã sẽn yet zug tɩ Gũusg Gasg ning d sẽn nan paamã gomd rẽ yell bɩ? Y yãa sõsg sẽn gomd zakã pʋgẽ vɩɩmã yell tɩ tõe n sõng y roagd bɩ? Y mii ned sẽn magd n na n kẽng tẽn-zẽng tɩ Réveillez-vous ! wã gomd tẽn-kãng yell bɩ? Gũusg Gasgã wall Réveillez-vous ! wã goma bũmb sẽn na n yɩ lɛɛbd kẽer noogo, wall goosneema wã biru sãnda neb noog yãmb moonegã zĩigẽ bɩ? Makre, seb-kãensã a yembr sã n goma kʋʋlmã sẽn wat ne zu-loees ninsã yelle, tõe n yɩɩ tʋʋm noy nins sẽn get sẽn kʋʋl-bã yellã noogo. Sã n yaa tʋʋm-wẽnsã la bi-beerã yell la a gomda, tõe n yɩɩ polɩɩs-rãmbã la zãndarm-dãmbã noogo.
3. Togs-y kibar sẽn wilgd tɩ d sã n bao d sɛbã sõss sẽn na n yɩ neb kẽer noog n kõ b rãmbã, womda biisi.
3 Rẽ sẽn womd biis ninsi: Afirikdisiid saam-biig a ye ne a pag sẽn paam yʋʋmd 2011 zĩ-likr kiuug Réveillez-vous ! wã sẽn gom kambã wubr yellã, b boola b moonegã zĩig lekoll-dãmb 25 ne telefõnne, tɩ bãmb 22 sak n deeg Réveillez-vous ! wã n pʋɩ b karen-biisã. Tẽn-kãng saam-biig a to ne a pag me maana woto. B pʋɩya Réveillez-vous ! kãng wʋsg lekoll-dãmb pʋsẽ b moonegã zĩigẽ. Lekoll a ye meng pʋd n yãka yam n naag-a b semennã karengã pʋgẽ. Tõnd saam-biigã ne a pagã togsa b kibarã tigims sull yel-gɛt a yembre, t’a sagl tigims a taab tɩ bãmb me maan woto. Neb wʋsg gʋlsa filiyallã biru n kos Réveillez-vous ! kãng tɩ paooge, tɩ yɩ tɩlae tɩ b lebs n yiis-a n paase!
4. Bõe yĩng tɩ d rat tɩ neb wʋsg paam d sɛbã n karme?
4 Tõnd sɛbã wilgda yɛl nins sẽn maand dũniyã zugã võore, la b sagend nebã tɩ b teeg Biiblã la Wẽnnaam Rĩungã. Yaa seb-kãens bal n “moond fãagr koɛɛga.” (Ezai 52:7) Woto kɩtame tɩ d rat tɩ neb wʋsg paam-b n karme. Bũmb sẽn tõe n sõng-d tɩ d maan rẽ, yaa d sã n wa karemd sõsg fãa, bɩ d bao n bãng sõsgã sẽn na n yɩ neb nins noogo.