Kibay neb sẽn togse

◼ Ostrali: A John yaa rao sẽn karem n zãage. A yãadmẽ, a ra kẽnda egiliiz. La a wa n yik n tẽeda ne a sũur fãa tɩ Wẽnd kae ye. So-pakd n kõ-a La vie a-t-elle été créée ? sebrã, tɩ kaagr a wãn poore, a kõ-a Cinq questions à se poser sur l’origine de la vie sebrã. So-pakdã ra ket n kẽnd n kõt-a-la periodik-paalã, tɩ sã n gomd naanegã yelle, wall Biiblã bãngr-goam yell bɩ a wilgd-a, sẽn na yɩl t’a tʋlg n bãng koɛɛgã n paase. A sẽn wa n mik t’a John sɩd rat n bãng n paasame wã, a kõ-a-la La Bible : Parole de Dieu ou des hommes ? sebrã. A John sẽn karem seb-kãngã n sa, a yeelame tɩ masã, yẽ pa tẽed fasɩ tɩ Wẽnd kae ye. So-pakdã goma ne a John Biiblã yetame sebrã yelle, n wilg-a sull a 8 wã sẽn be sebrã neng 20 wã, la sull 13-16 sẽn be seb-neng 23-24. Vɛrse nins b sẽn karem sul-kãens pʋgẽ wã yɩ a John noog wʋsgo, hal t’a yeel tɩ tõe t’a segd n maneg n zãmsa Biiblã.

◼ Megsik: Rao n yeel koe-moond tɩ yẽ pa tẽed tɩ Biiblã yaa Wẽnnaam n kɩt tɩ b gʋls ye. Koe-moondã kosame n na n wilg-a bũmb sẽn kɩt tɩ d tõe n kɩs sɩd tɩ Biiblã yaa Wẽnnaam Gomde. B sẽn sõs naoor a wãn poore, sõsgã kẽ-a lame. Sẽn yɩ-a noog n yɩɩd yaa Biiblã noyã la a saglsã. Ad a sẽn yeel koe-moondã: “Tõnd sẽn da wa n sɩng Biiblã karengã, mam da tagsdame t’a saglsã yaa wa sɛb a taabã sagls bala, t’a goamã ra pa kẽed-m ye. La masã, d sã n karemd a saglsã, sẽn yɩɩd fãa, yel-manesmã wɛɛngẽ, mam sũurã ningd-m-la taale.”

◼ Etazĩni: Saam-biig ne a pag n da yas zãma sʋk ne tõnd sɛbã n moond koɛɛgã, tɩ pag sẽn yit Taiwan wa b nengẽ. A ra tẽeda Wẽnnaam, la a tagsdame tɩ Biiblã yaa Erop soolmã neb sebre. A wa b nengẽ n na n deeg sɛbã, bala, baa a nug sẽn zãadã, a getame t’a vɩɩmã ka neng ye. Pagã tagsame tɩ Biiblã tõe n sõng-a lame t’a tõog t’a vɩɩmã tall võore. Saam-biigã ne a pagã talla Biiblã yetame sebrã ne La paix et le bonheur durables : comment les trouver sebrã n sɩng Biiblã zãmsg ne-a. B basa Biiblã yetame sebrã sak a 2 wã zãmsgo, n sɩng La paix et le bonheur durables sebrã sak ning gom-zug sẽn yaa “ Un guide bénéfique pour tous les humains ” wã. B sẽn sõs ne-a pipi sullã n tãag sull a 6, pagã mikame tɩ Biiblã yaa toor fasɩ ne tũudum sɛb a taaba. Saam-biigã ne a pagã wilg-a-la Biiblã bãngr-goam sẽn pidsi. Rẽ poore, a yeel-b-la woto: “Sebr baa a ye kae t’a goamã yaa sɩd la kɛpɩ wa Biiblã ye.”

◼ Zapõ: Rao n yeel koe-moond sẽn taas-a koɛɛgã tɩ yẽ pa tẽed tɩ Wẽnd beeme ye. La ne rẽ fãa, koe-moondã ra ket n kẽnd n kaagd-a lame, n tikd Réveillez-vous ! wã sõsg ning gom-zug sẽn yaa “ Hasard ou conception ? ” wã n sõsd ne-a koɛɛg-koɛɛga. Bilf-bilfã, raoã wa n yeelame tɩ tõe tɩ naand beeme. Rũndã-rũndã, a sak n deegame tɩ Wẽnd beeme. Koe-moondã zãmsd-a-la Koe-noog sẽn yit Wẽnnaam nengẽ! sebrã.

◼ Kanada: Pag n da wa n yi a zakẽ n na n kẽ a mobilli, tɩ saam-bi-poak kãab-a periodik-paala. Saam-bi-poakã wa n kẽngame n na n tɩ kaag-a, t’a yeel vẽeneg t’a pa rat n bãng n paase, tɩ bala yẽ pa tẽed Wẽnnaam baa bilf ye. La saam-bi-poakã pa koms raood ye. A yãka yam n lebg n na n tɩ kõ pagã Une vie pleinement satisfaisante : Comment ? sebrã. A sẽn tɩ mik pagã, a yeel-a lame tɩ baa ne a sẽn yeel yẽ t’a pa tẽed Wẽndã, a ra ket n tagsda a yelle, a sẽn mi t’a wubda a kambã a yembrã. A wilg-a-la sebrã neng a 4 sull a 6. Be, b wilgda zĩig ning roagdbã sẽn tõe n paam sagls sẽn yaa sõma. Rẽ poore, a kos-a lame t’a karem zãmsg a 2 soabã sẽn gomd kambã wubr yellã. Pagã sũur yɩɩ noog t’a sak n deeg sebrã.