Tall-y periodik-kʋdã n moon koɛɛgã sõma

D sã n zamd d periodik-kʋdã wall d lobd-ba, pa nafd ned baa a yembr ye. Woto yĩnga, segdame tɩ d modg tɩ nebã paam-b n karme. Periodik ning tõe n kɩtame tɩ ned tʋlg n bãng sɩdã, n sɩng pʋʋsg ne a Zeova yʋʋre. (Rom. 10:13, 14) Ad sagls a wãn sẽn tõe n sõng-d tɩ d tõog n tall periodik-kʋdã n moon koɛɛgã.

• Y sã n wa moond koɛɛgã zĩig y sẽn pa wae n moondẽ, n ta zak n pa mik ned yiri, y tõe n yãka periodik-kʋdr n bao zĩig zakã rãmb sẽn na wa yãẽ n dɩgle.

• Y sã n moond biis yalsg zĩigẽ pa rẽ bɩ tẽr gaarẽ, y tõe n sokda nebã n get b sã n data sebr n karme, la y wilg periodik-kʋd toor-toor tɩ b yãke.

• Y sã n dabd logtor yiri, pa rẽ bɩ tigingã mooneg zĩis a taab nebã sẽn wae n zĩ n gũudẽ, y tõe n zãa periodik-kʋd n kõ-b tɩ b karme. La y segd n deng n kosa zĩigã rãmb sore. Y sã n mik tɩ b zoe n dʋʋga sɛb wʋsgo, yɩta sõma tɩ y ra rɩgl ye.

• Y sã n wa segend n na n tɩ kaag neb y sẽn zoe n seg koe-moonegã sasa, bɩ y ges sõsg sã n bee periodik-kʋdã pʋgẽ n tõe n yɩ b ned kam fãa noogo. Wala makre, yaa zak soab wall ned sẽn wae n togd sor bɩ? A nonga zẽed koob bɩ? Woto tõe n sõng-y lame tɩ y ges sõsg sã n bee periodik-kʋdã pʋgẽ n zems ne-ba.

• Y sã n da kẽnd n kõt-a ned periodik rãmbã n le pa mikd-a, y sã n wa yã-a, bɩ y wilg-a periodik-kʋd nins a sẽn pa paamã.