“A Poll pʋʋsa Wẽnnaam bark la a keng a pɛlga”

Rom tigingã neb sẽn wʋm t’a Poll watame wã, b yãka saam-biis tɩ b kẽng kilo 64 zĩigẽ n tɩ seg-a. B sẽn modg woto wã yɩɩ a Poll noogo. Biiblã yeelame t’a Poll “sẽn yãnd-bã, a pʋʋsa Wẽnnaam bark la a keng a pɛlga.” (Tʋʋ. 28:15) Yaa sɩd t’a Poll ra gilgd n kengda tigimsã neb raoodo, la a sẽn wa n be bãens roogã, yaa yẽ raood la b keng-yã.—2 Kor. 13:10.

Rũndã-rũndã, tigims sull yel-gɛtbã gilgdame n kengd saam-biisã raoodo. Bãmb me mi n yaame, b mi n maanda yɩɩre, la b mi n koms raood wa b tẽed-n-taasã. Tigims sull yel-gɛtã ne a pagã sã n wa na n kaag y tigingã, bõe la y tõe n maan n keng b pɛlga, tɩ y “naag taab n paam raood paoosgo”?—Rom. 1:11, 12.

• 

  Kẽnd-y koe-moonegã tigissã. Tigims sull yel-gɛtã sã n neẽ tɩ koe-moondbã mongda b mens bũmb kẽer sẽn na yɩl tɩ semen sẽn yaa zallã naf-b sõma, kengda a raoodo. (1 Tes. 1:2, 3; 2:20) Tags-y n ges-y y sã n pa tõe n yɩ sõngr so-pakd a kaagrã kiuugu. Y tõe n moona ne yel-gɛtã wall ne a pagã, wall y sã n tar Biibl zãmsa, y tõe n kosa b nin-yend t’a yãag-yã. B sã n moond ne neb toɛy-toɛya, noom-b lame, wala makre, sẽn nan sɩng-b koɛɛgã mooneg paalmã, la koe-moondb nins minim sẽn pa waoogã.

• 

  Reeg-y-b sõma. Y tõe n kõ-b-la gãag zĩiga, wall y segl rɩɩb n kõ-ba. Woto, y wilgda tigims sull yel-gɛtã ne a pagã tɩ y nong-b lame. B pa baood tɩ y maan bõn-bɛd ye.—Luk 10:38-42.

• 

  Kelg-y-yã a saglsã la y tũ. Tigims sull yel-gɛtã sẽn nong tõndã, a sõngd-d-la sẽn na yɩl tɩ d bãng n tʋm a Zeova tʋʋmdã sõma. Wakat ninga, yaa tɩlɛ t’a wilg-d bũmb d sẽn maand tɩ pa sõma vẽeneg-vẽenega. (1 Kor. 5:1-5) D sã n sulg d meng n sak-a, noom-a lame.—Ebre. 13:17.

• 

  Wilg-y tɩ y sũur nooma ne-ba. Wilg-y tigims sull yel-gɛtã ne a pagã b sẽn maand bũmb ninsã sẽn nafd-y to-to wã. Y tõe n yeel-b-la rẽ, wall y gʋls-b n togse.—Kol. 3:15.