D keng taab raoodo
1. Tigims sull yel-gɛtbã sẽn kaagd tigimsã yaa zu-noog d sẽn paamd n maand bõe?
1 Tʋm-tʋmd a Poll gʋlsa lɛtr n tool Rom tigingã n yeel-b woto: “Yãmb yamleoog tara maam tɩ mam dat n yã yãmba, tɩ mam tõe n kõ yãmb kũun sẽn yaa yãmb sɩɩs rẽnda tɩ y kɩ yẽga. La sẽn yɩɩda tɩ mam sã n ta yãmb sʋka, tõnd na lagem taab n paam daood ne tẽeb ninga sẽn yaa yãmb dẽnd ne mam dẽndã.” (Rom 1:11, 12) Rũndã-rũndã, tigims sull yel-gɛtbã sẽn kaagd tigimsã me yaa zu-noog d sẽn paamd n kengd taab raoodo.
2. Bõe yĩng tɩ b togsd tigims sull yel-gɛtã waoong pĩnda?
2 Tigingã: Tigims sull yel-gɛtã sã n na n tɩ kaag tiginga, b rengd n togsa tigingã neb tɩ ket kiuug a tã. Woto sõngda tõnd tɩ d maneg d sẽka n tõog n dɩ a kaagrã nafa. (Ef. 5:15, 16) Sã n mikame tɩ d tʋmdame, d tõe n bõosa d tʋʋmã taoor soab sor n tõog n kẽes d mens koe-moonegã pʋgẽ kaagrã semen sasa. Neb kẽer manegda b sẽka n tõog n yɩ sõngr so-pakdb kiuug ning yel-gɛtã sẽn na n kaag-bã pʋgẽ. Y sã n da segendame n dat n tog sore, y tõe n viiga y so-taokã sẽn na yɩl n zĩnd kaagrã sasa.
3. Bõe la d fãa yembr-yembr tõe n maan kaagrã sasa n paam tɩ b keng d raoodo?
3 Sẽn yɩɩd fãa, tigims sull yɛl-getã kaagda tõnd sẽn na yɩl n keng d fãa yembr-yembr raoodo, la a kõ-d zãmsg koe-moonegã pʋgẽ. Yel-gɛtã sã n tara paga, y tõe n tũu yẽ wall a pagã n moon koɛɛgã. Tigims sull yel-gɛtã nongame n moond koɛɛgã ne tigingã koe-moondbã fãa, baa ne neb nins sẽn nan pa tõe n moon koɛɛgã sõma wã bɩ neb nins sẽn dat n paam minim n paasã. Tõnd fãa tõe n gesa a sẽn moond to-to wã n dɩk a togs-n-taar la d tũ sagls nins fãa a sẽn na n kõ-dã. (1 Kor. 4:16, 17) D sã n segl rɩɩb n bool-a t’a wa naag-d n dɩ, d na n paama sor n keng taab raood n paase. (Heb. 13:2) Sẽn mik t’a sõssã fãa tika yɛl sẽn pak tigingã zugã yĩnga, d segd n kelga sõma.
4. Bõe la tõnd tõe n maan n keng d tigims sull yel-gɛtã raoodo?
4 Tigims sull yel-gɛtã: Tʋm-tʋmd a Poll me ra tara zu-loees wa saam-biis nins a sẽn da sõngdã. Rẽ n so t’a me ra baood tɩ b keng-a raoodo. (2 Kor. 11:26-28) Rom tigingã neb sẽn wʋm t’a Poll sẽn da be bãens roogã wata b nengẽ wã, kẽer kẽnga Apiyus Forum sẽn yaa kilo 74 ne Rommã n tɩ sɛg-a. “A Poll sẽn yã bãmba, yẽ pʋʋsa Wẽnnaam bark n keng a sũuri.” (Tʋʋ. 28:15) Tõnd me tõe n kenga d tigims sull yel-gɛtã raoodo. D teel-a ne yẽesem a kaagrã sasa n wilg tɩ d waoogd-a-la hal wʋsgo. (1 Tɩm. 5:17) D wilg tɩ d tara mi-beoog a sẽn modgd n kaagd tõndã yĩngã. Yẽ ne a pagã sã n yã tɩ tõnd tara tẽebo, nonglem la sũ-mare, b sũy na n yɩɩ noog wʋsgo.—2 Tes. 1:3, 4.
5. Rũnda-rũndã, bõe yĩng tɩ d fãa rat tɩ b keng d raoodo?
5 Ãnd n be n pa rat tɩ b keng a raood tood wakat kãensã pʋsẽ? (2 Tɩm. 3:1) D yãk yam n kẽes d mens zãng kaagrã semen tʋʋm pʋsẽ ne d tigims sull yel-gɛtã. Tõnd fãa, sẽn dat n yeel tɩ tigims sull yel-gɛtbã la tigimsã koe-moondbã tõe n kengã taab raood ne sũ-noogo. D sã n maand woto, d na n kell n ‘sagla taab la d sõng taaba.’—1 Tes. 5:11.