Y SẼN TÕE N MAAN N DA LE KISG Y TAABÃ

3 | Da le kisg-y ned y sũurẽ ye

Biiblã sẽn yete:

“Bɩ y maneg y yamã tɩ kɩt tɩ y toeeme, n tõog n kɩs sɩd tɩ Wẽnnaam daabã yaa sõma, tɩ sakda ne bãmba, la tɩ zemsa zãnga.”—ROM DÃMBÃ 12:2.

Rẽ sẽn dat n yɛɛlga:

D sẽn tagsd bũmb nins yellã tara yõod Wẽnnaam nifẽ. (Zeremi 17:10) D segd n modgame tɩ d no-goamã la d tʋʋm-tʋʋmdɩ wã ra wilg tɩ d kisa ned ye. La rẽ bal pa sek ye. Bala kisgrã sɩngda d yamẽ wã la d sũurẽ wã. Dẽnd d segd n zãaga d meng ne tagsa buud fãa sẽn tõe n kɩt tɩ d wa kisg neda. Y sã n maan woto la y na n sɩd tõog n “maneg y yamã tɩ kɩt tɩ y toeeme,” la kɩt tɩ y ra le kisg ned ye.

Y sẽn tõe n maane:

Tags-y n ges-y yãmb sẽn get tẽng a to wall buud a to neb to-to. Sok-y y meng yaa: ‘M tagsg yaa wãn to ne nin-kãensã? Mam sẽn get nin-kãensã to-to wã tika bũmb ning mam sẽn mi b zugã bɩ? Bɩ tika bũmb nins nebã sẽn yet b zugã?’ Zãag-y y meng ne reezo sosiyo rãmba, film-dãmba, la reem sẽn kilsd kisgrã la nen-kɛglem tʋʋmã.

Wẽnnaam Gomdã tõe n sõng-d lame tɩ d da le kisg ned d sũurẽ ye

Pa wakat fãa la yaa nana tɩ d sak n deeg tɩ d tagsa wã pa sõma ye. La Wẽnnaam Gomdã tõe n sõng-d lame, tɩ d “bãng sũurã tagsa la a tʋlsem toor-toorã n welge.” (Ebre-rãmbã 4:12) Rẽ wã, bɩ y nong n karemd Biiblã. Ges-y yãmb tagsa wã sã n zemsa ne Biiblã sẽn yet bũmb ningã, la y maan y sẽn tõe fãa n toeem y tagsã wã tɩ zems ne rẽ. Wẽnnaam Gomdã tõe n sõng-d lame tɩ d zãag d meng ne kisgrã “sẽn vigl kãn-kãe” d yamẽ wã la d sũurẽ wã.—2 Korẽnt rãmbã 10:4, 5.

Ned vɩɩm kibare—A STEFEN

A toeema a tagsa wã

Nasaar-dãmb n da kis a Stefen ne a zakã rãmb hal tɩ ra pa nana ne-b ye. Kɩtame t’a Stefen tɩ naag politik sull a ye sẽn da zabd nebã drʋwa rãmb yĩnga. A wa n naag-b lame n tʋm tʋʋm sẽn wilgd tɩ b kisa nasaar-dãmbã. Ad a sẽn yeele: “Maam ne m zo-rãmbã ra mii n tɩ gesa filim sẽn wilgd yembsã sẽn da namsd to-to Amerik tẽngẽ wã. B sẽn da namsd nin-sablsã to-to wã kɩtame tɩ d sũurã puugi, tɩ d yik n zab ne nasaar-dãmb nins sẽn da be filmã roogẽ wã. D wa n kẽnga zĩig nasaar-dãmb sẽn beẽ, n na n tɩ zab ne-ba.”

A Stefen sẽn wa n sɩng Biiblã zãmsg ne a Zeova Kaset rãmbã, a tagsa wã toeema fasɩ. Ad a sẽn yeele: “Mam da nee neb wʋsg sẽn da kis taab b sẽn pa buud a yembr yĩnga. La a Zeova Kaset rãmbã sẽn da zemsd taab to-to wã linga maam wʋsgo. Wala makre, nasaara a ye sẽn yaa a Zeova Kaset soab sẽn wa n dat n tog sore, a tɩ basa a kambã ne nin-sabls sẽn yaa a Zeova Kaset rãmba, tɩ b ges b yelle. Sẽn paase, nasaar-dãmb n da reeg kamb sẽn yaa nin-sabls b zakẽ, b sẽn da pa tar zĩig n gãe wã yĩnga.” A Stefen wa n kɩsa sɩd t’a Zeova Kaset rãmbã nonga taab wa zak a ye neba, tɩ zems ne nonglem ning yell a Zeezi sẽn gom tɩ na n zĩnda kiris-neb hakɩɩkã sʋkã.—Zã 13:35.

Bõe n sõng a Stefen t’a tõog n bas nen-kɛglem tʋʋma, hal n pa le kis a taabã? Yaa Rom dãmb 12:2 sẽn yet bũmb ningã. A Stefen yeelame: “Mam bãngame tɩ m da segd n toeema m tagsa wã. Mam da segd n basa nen-kɛglem tʋʋmã, la m yɩ ned sẽn baood laafɩ, bala rẽ n da na n kɩt tɩ m vɩɩmã tall barka.” Yaa sẽn yɩɩd yʋʋm 40 la woto masã a Stefen sẽn tar sũ-noogo, a sẽn pa le kis nedã yĩnga.