ZÃMSGÃ YĨNGA 21
YƖƖLL 107 D tall nonglem wa a Zeova
Y sẽn tõe n maan to-to n paam ned n kẽ kãadem
“Ãnda n tõe n paam pʋg-sõngo? A yõodã yɩɩda koray-rãmb hal zĩig sẽn zãre.”—YEL. 31:10.
D SẼN NA N BÃNGE
D na n yãa Biiblã sagls sẽn tõe n sõng ned t’a paam ned sẽn zems ne-a n kẽ kãadem, la tigingã neb a taabã sẽn tõe n teel sẽn dat-b n kẽ kãadmã to-to.
1-2. a) Nand tɩ kiris-ned sẽn pa kẽ kãadem sɩng ned baoobo, bõe yell la a segd n tagse? b) Bõe la kiris-neb nins sẽn pa kẽ kãadmã kẽer maanda, tɩ d na n gom rẽ yell sõs-kãngã la sõsg ning sẽn pʋgdã pʋgẽ? (Ges-y tẽngr notã.)
YÃMB nongẽ lame n kẽ kãadem bɩ? Baa ne sẽn pa tɩlɛ tɩ d kẽ kãadem n yaool n paam sũ-noogã, kiris-neb wʋsg sẽn pa kẽ kãadem nongẽ lame n kẽ kãadem. Kẽer yaa kom-bɩɩse, tɩ sãndã yaa kãsemba. La nand tɩ y sɩng ned baoobo y segd n deng n segla y menga. Wala makre, y segd n modgame tɩ yãmb ne a Zeova zoodã tar pãnga, y segd n bãnga y meng sõma, la y tõe n ges zak yelle.a (1 Kor. 7:36) Y sã n maan woto y sã n wa kẽ kãadem, y tõe n paama sũ-noogo.
2 La yɩl n paam ned sẽn zems ne-f n kẽ kãadem pa wae n yaa nana ye. (Yel. 31:10) La baa y sã n wa yã ned sẽn wõnd a zemsa ne-yã, yɩl n sɩng a soabã roob sẽn na yɩl tɩ y wa kẽ kãadmã tõeeme n pa yɩ nana ye.b Sõs-kãngã pʋgẽ, d na n yãa sagls sẽn tõe n sõng kiris-neb nins sẽn pa kẽ kãadmã tɩ b paam ned b sẽn tagsd tɩ zemsa ne-ba, la sẽn tõe n sõng-b tɩ b sɩng taab roob sẽn na yɩl n wa kẽ kãadem. D na n yãa tigingã neb a taabã sẽn tõe n sõng sẽn dat-b n wa kẽ kãadmã to-to.
Y SẼN TÕE N MAAN TO-TO N PAAM NED SẼN ZEMS NE-Y N KẼ KÃADEM
3. Kiris-ned sã n wa rat n bao ned n kẽ kãadem, bõe ne bõe yell la a segd n deng n tagse?
3 Y sã n dat n wa kẽe kãadem, yɩta sõma tɩ y reng n bao n bãng zʋg-sõma nins y sẽn baood pag wall rao nengẽ, n yaool n sɩng ned baoobo. Sã n pa rẽ y tõe n yãa ned sẽn zems ne-y n pa bãnge, wall y sɩng ned sẽn pa zems ne-y roobo. La yaa vẽeneg tɩ y segd n baoo ned sẽn deeg lisgu. (1 Kor. 7:39) La pa ned sẽn deeg lisg yĩng bal n kɩt t’a zems ne yãmb ye. Woto wã, sok-y y meng yaa: ‘Bõe ne bõe la m dat n wa maane? Zʋg-sõma-bʋs la m get tɩ yaa tɩlɛ tɩ m pagã wall m sɩdã talle? Mam sẽn dat t’a soabã yɩ to-to wã pa loog noor sɩda?’
4. Bõe la neb kẽer sẽn dat n wa kẽ kãadem pʋʋsd n kotẽ?
4 Y sã n dat n wa kẽe kãadem, yaa vẽeneg tɩ y pʋʋsa a Zeova rẽ yĩnga. (Fili. 4:6) Yaa sɩd t’a Zeova pa pʋlem ned baa a ye pag bɩ sɩd ye. La a pa maand a toog kae ne y sẽn dat bũmb ninsã la y tagsa wã ye. Y sã n wa rat ned n kẽ kãadem, a tõe n sõng-y lame. Woto wã, bɩ y ket n togsd-a y sẽn dat bũmb ninsã, la bũmb ning sẽn be y sũurẽ wã. (Yɩɩn. 62:8) Pʋʋs-y Wẽnnaam n kos sũ-mar la yam. (Zak 1:5) A Zãc sẽn yaa saam-biig sẽn nan pa kẽ kãadem n be Etazĩni wã wilga bũmb nins a sẽn pʋʋsd n kotẽ wã n yeel yaa: “Mam togsda a Zeova zʋg-sõma nins m sẽn dat tɩ pag ning m sẽn na n wa kẽ kãadem ne wã tallã. M pʋʋsdame n kõtẽ t’a sõng-m tɩ m seg pag m sẽn tõe n wa kẽ kãadem ne. Sẽn paase, m kota a Zeova t’a sõng-m tɩ m bɩɩs zʋg-sõma sẽn na n kɩt tɩ m wa yɩ sɩd-sõngo.” A Taniya sẽn yaa Sirlãnka saam-bi-poakã yeelame yaa: “Mam sẽn baood ned n na n wa kẽ kãadmã, m kota a Zeova t’a sõng-m tɩ m kell n maan sɩd ne-a, n tall yam-sõngo, la m kell n tall sũ-noogo.” Baa sã n wa kaoosdẽ tɩ y nan pa paam ned n na n kẽ kãadem, a Zeova pʋlmame t’a na n kell n sõng-y lame tɩ y paam bũmb nins sẽn yaa tɩlɛ ne-yã, la a sõng-y tɩ y neẽ tɩ b nand-y lame.—Yɩɩn. 55:22.
5. Bõe la kiris-ned sẽn nan pa kẽ kãadem tõe n maane, n bãng kiris-neb a taab sẽn nan pa kẽ kãadem la sẽn nong a Zeova? (1 Korẽnt rãmbã 15:58) (Ges-y fotã me.)
5 Biiblã sagenda tõnd tɩ d tall “tʋʋm wʋsg Zu-soabã tʋʋmdã pʋgẽ.” (Karm-y 1 Korẽnt rãmb 15:58.) Y sã n tʋmd a Zeova tʋʋmdã wʋsgo, la y wae n be ne saam-biis la saam-bi-pogs buud toor-toore, y na n paam n bee ne neb sẽn kengd y raoodo. La pa rẽ bal ye. Y na n paam n bãnga neb a taab sẽn pa kẽ kãadem la sẽn lʋɩɩsd a Zeova tʋʋmdã taoor wa yãmba. Y sã n maand y sẽn tõe fãa n na n noog a Zeova sũuri, y na n paama sũ-noog hakɩɩka.
Y sã n tʋmd a Zeova tʋʋmdã wʋsgo, la y wae n be ne kiris-neb buud toor-toore, y tõe n bãnga neb a taab sẽn dat n kẽ kãadem wa yãmba (Ges-y sull a 5)
6. Kiris-ned sã n baood ned n na n kẽ kãadem n nan pa paame, bõe la a pa segd n yĩmi?
6 La y segd n gũusame tɩ ra wa lebg y sẽn baood ned n na n kẽ kãadmã n pak-y n yɩɩd ye. (Fili. 1:10) Yaa yãmb ne a Zeova zoodã sã n tara pãng la y paamd sũ-noog hakɩɩka, la pa be ne y kẽe kãadem bɩ y pa kẽ kãadem ye. (Mat. 5:3) Y sã n nan pa kẽ kãadem, y tara lohorem n tõe n tʋm Wẽnnaam tʋʋmdã wʋsgo. (1 Kor. 7:32, 33) Ra sãam-y y sẽkã ye. A Zesika sẽn yaa saam-bi-poak sẽn be Etazĩni n kẽ kãadem a sẽn wa n kolg yʋʋm pis-naasã yeelame: “M da tʋmda Wẽnnaam tʋʋmã wʋsgo. Rẽ sõnga maam tɩ m kell n tall sũ-noogo, baa sẽn da kaoosd tɩ m nan pa paam ned n kẽ kãadmã.”
RENG-Y N GŨUS-Y N GES-Y-YÃ A SOABÃ MANESMÃ
7. Y sã n yã ned tɩ y yamã kẽ-a, bõe yĩng tɩ y segd n gũus n ges a soabã wakat bilfu, n yaool n togs-a sẽn be y sũurẽ? (Yel-bũnã 13:16)
7 Y sã n wa yã ned n tagsdẽ t’a tõe n yɩɩ pʋg-sõng wall sɩd-sõngo, bõe la y tõe n maane? Y segd n yɩɩ tao-tao n yeel a soabã tɩ y rat-a lame bɩ? Biiblã yeelame tɩ yam soab tʋmda ne bãngre. (Karm-y Yel-bũn 13:16.) Rẽnd yɩta sõma tɩ y maag y yĩng n ges a soabã wakat bilfu, n yaool n togs-a sẽn be y sũurẽ wã. A Ogistẽ sẽn be Peyiba wã yeelame: “F yamã tõe n kẽe ned zĩig pʋgẽ. La tõeeme n pa kaoos la f toeem yam ye. Rẽnd y sã n bao weer n gũus a soabã n gese, y pa na n tik bũmb sẽn pa na n kaoos n sɩng ned roob ye.” Sẽn paase, y sã n gũus n ges a soabã, y tõe n yãame t’a pa zems ne yãmb ye.
8. Kiris-ned sẽn pa kẽ kãadem sã n yã ned t’a yamã kẽ-a, wãn to la a tõe n gũus a soabã n gese? (Ges-y fotã me.)
8 Wãn to la y tõe n gũus ned ning y yamã sẽn kẽ wã n gese? Tigissã sasa, wall yãmb ne y tẽed-n-taasã sã n mi n tigim taab n na n kok pemsem, y tõe n gũus n gesa a soabã zʋgã la a manesmã sẽn yaa to-to, la a tẽebã sã n tara pãnga. A zo-rãmbã yaa nin-bʋs buudu? Bõe yell la a nong n gomda? (Luk 6:45) A sẽn magd n na n wa maan bũmb ninsã zemsa ne yãmb rẽndã bɩ? Y tõe n goma a yell ne a tigingã kãsem-dãmba, wall ne kiris-neb a taab tẽeb sẽn bɩ la sẽn mi-a sõma. (Yel. 20:18) Y tõe n bao n bãnga a sã n tara yʋ-noog la zʋg-sõma. (Rut 2:11) Y sã n wa gũusd n get a soabã, bɩ y gũus n da wa maan bũmb sẽn na n sãam a sũur ye. Rẽ baoodame tɩ y gũus n da wa yaa sẽg-sẽg ne a soabã, wall y baood n na n bãng bũmb fãa a soabã zug ye.
Nand tɩ y togs ned bũmb ning sẽn be y sũurẽ wã, bɩ y reng n maag yĩng n gũus a soabã n gese (Ges-y sull a 7-8)
9. Y sã n yã ned tɩ y yam kẽ-a, y segd n kɩsa sɩd ne bõe n yaool n tɩ gom ne a soabã?
9 Wakat a wãn la y segd n gũus ned n gese, n yaool n tɩ togs-a sẽn be y sũurẽ wã? Y sã n yɩ tao-tao n tɩ gom ne a soabã, nebã tõe n wa getame tɩ y yaa ned sẽn pa tagsd tɩ bɩ la a yaool n yãk yam ye. (Yel. 29:20) La y sã n bas tɩ kaoos wʋsgo, b tõe n wa tagsame tɩ y yaa ned yam sẽn yuusdi, sẽn yɩɩd fãa sã n mik t’a soabã bãngame tɩ y yamã kẽ-a lame. (Koɛ. 11:4) Tẽeg-y me tɩ pa tɩlɛ tɩ y kɩs sɩd tɩ y na n kẽe kãadem ne neda, n yaool n togs-a sẽn be y sũurẽ wã ye. La y segd n kɩsa sɩd tɩ yãmb mengã segl n saa kãadem yĩnga, la t’a soabã tõe n yɩɩ ned sẽn zems ne yãmba.
10. Y sã n wa bãng tɩ ned rat-y lame tɩ y yaool n pa rat a soabã, bõe la y segd n maane?
10 La y sã n wa neẽ tɩ ned rata yãmba, y maanda wãna? Sã n mik tɩ y pa rat a soabã, bɩ y modg tɩ y manesmã wilg rẽ vẽenega. Y sã n maan t’a soabã tẽed tɩ y rat-a lame tɩ yaool n pa woto, pa sõma ye.—1 Kor. 10:24; Efɛɛ. 4:25.
11. Y sã n segd n sõnga ned t’a paam pag bɩ sɩda, bõe la y pa segd n yĩmi?
11 Tẽns kẽer pʋsẽ, mi n yaa ned sẽn pa kẽ kãadem roagdb wall neb a taab n baood pag bɩ sɩd n kõ-a. Tẽns sãnda pʋsẽ, ned sẽn nan pa kẽ kãadem roagdb wall a zo-rãmb tõe n yãa ned b sẽn tagsd tɩ zemsa ne-a, n bao weer tɩ yẽ ne a soabã seg taaba, n ges b sã n na n bao n bãnga taab n paase. Ned sã n kos yãmb tɩ y sõng-a t’a paam pag wall sɩda, yɩta sõma tɩ y bao n bãng a soabã ne ned ning y sẽn na n bao wã fãa sẽn nong la b sẽn date. Y sã n wa yã ned y sẽn tagsd tɩ zemsa ne-a bɩ y bao n bãng a soabã sõma, a zʋg-sõma wã, la sẽn yɩɩd fãa, a sã n tara zood sõma ne a Zeova. Ned sẽn tar zood sõma ne a Zeova tara yõod n yɩɩd a sẽn na n tar ligdi, a sẽn na n karem n zãag wall a yʋʋrã sẽn na n yi. Tẽeg-y me tɩ yaa neb a yiibã n segd n yãk b sã n na n kẽe kãadem ne taaba.—Gal. 6:5.
Y SẼN TÕE N SƖNG TAAB ROOB TO-TO
12. Y sã n yã ned tɩ y yamã kẽ-a, wãn to la y tõe n togs a soaba?
12 Y sã n dat tɩ yãmb ne ned bao n bãng taab sẽn na yɩl n wa kẽ kãadem, wãn to la y tõe n togs a soabã sẽn be y sũurẽ wã?d Y tõe n kõo a soabã sɛk zĩig y sẽn pa na n yɩ y yembre, wall y bool a soabã ne telefõn tɩ y sõse. Togs-y-yã a soabã vẽeneg tɩ y yamã kẽ-a lame, la tɩ y ratame tɩ y bao n bãng taab n paase. (1 Kor. 14:9) A soabã sã n dat bɩ y kõ-a weer t’a tɩ tags la a yaool n wa leoke. (Yel. 15:28) A sã n pa rat-y-yã, bɩ y ra modg-a ye.
13. Ned sã n yeel yãmb t’a rat-y lame, y manesem segd n yɩɩ wãna? (Kolos rãmbã 4:6)
13 La ned sã n wa yeel-y t’a rat-y lame yẽ? Naoor wʋsgo, yɩl tɩ ned yeel a to t’a rat-a lame baooda raoodo. Woto wã, bɩ y leok-a ne bʋgsem la waoogre. (Karm-y Kolos rãmb 4:6.) Y sã n dat t’a kõ-y weer tɩ y tɩ tags n yaool n leok-a, bɩ y togs-a. La ra bas-y tɩ kaoos ye. (Yel. 13:12) Y sã n pa rat a soabã bɩ y togs-a vẽenega, la ne bʋgsem. A Hãns sẽn yaa saam-biig sẽn be Otrisã wilga a sẽn leok to-to, saam-bi-poak sẽn wa n yeel-a t’a yamã kẽ-a lame. Ad a sẽn yeelã: “Mam leok-a-la ne bʋgsem, la m wilg-a-la vẽeneg tɩ m pa rat-a ye. Mam maana woto zĩig pʋgẽ, bala m da pa rat t’a wa tagsdẽ tɩ m tõe n wa sakame ye. Rẽ tɛk me, m gũusdame n da wa maan bũmb wall m yeel gomd sẽn na n kɩt t’a tags tɩ tõe tɩ m toeema yam ye.” La sã n mik tɩ yãmb me rata a soabã bɩ y togs-a, la y sõs y sẽn na n bao n bãng taab to-to wã zugu. Y minimdã la bũmb a taab tõe n kɩtame tɩ y sẽn dat rẽ wɛɛngẽ wã yɩ toor ne y to wã.
WÃN TO LA KIRIS-NEB A TAABÃ TÕE N TEEL SẼN PA KẼ-B KÃADMÃ?
14. Wãn to la d tõe n teel sẽn pa kẽ-b kãadmã ne d no-goamã?
14 Wãn to la tõnd fãa tõe n teel kiris-neb nins sẽn pa kẽ kãadem n yaool n dat n wa kẽ kãadmã? Bũmb a ye d sẽn tõe n maan yaa d sẽn na n gũusd ne d no-goamã. (Efɛɛ. 4:29) Tõnd ned kam fãa tõe n soka a meng yaa: ‘Mam wae n maanda kʋʋsem kãadmã wɛɛngẽ ne neb nins sẽn dat n wa kẽ kãadmã bɩ? Mam sã n yã saam-biig sẽn yaa ra-kõor sẽn sõsd ne saam-bi-poak sẽn pa kẽ kãadem, m yɩta tao-tao n tags tɩ b rooda taab bɩ?’ (1 Tɩm. 5:13) Sẽn paase, d pa segd n maan tɩ kiris-ned sẽn nan pa kẽ kãadem wa tagsdẽ t’a sẽn pa kẽ kãadmã, bũmb paoog-a a bada. A Hãns sẽn yaa saam-biig ning yell d sẽn zoe n gomã yeelame: “D tẽed-n-taas kẽer mi n yeelame yaa: ‘Bõe yĩng tɩ fo nan pa kẽ kãadem? Fo pa le yaa bi-bɩɩg ye.’ Goam a woto tõe n kɩtame tɩ sẽn nan pa kẽ-b kãadmã getẽ tɩ b pa nand-ba, la tõe n kɩt me tɩ b maneg n dat ne b sũur fãa n kẽ kãadem.” Sẽn são yaa d sẽn na n tũnugd ne segb buud fãa n pẽgd kiris-neb nins sẽn pa kẽ kãadmã.—1 Tes. 5:11.
15. a) Y sã n wa rat n sõng ned t’a paam pag bɩ sɩda, wãn to la y tõe n tũ sagl ning sẽn be Rom dãmb 15:2 pʋgẽ wã? (Ges-y fotã me.) b) Bõe la video wã sõng-y tɩ y bãnge?
15 La d sã n yã saam-biig n tagsdẽ t’a zemsa ne saam-bi-poak ninga, bõe la d tõe n maane? Biiblã sagenda tõnd tɩ d tagsd sẽn noom d taabã yelle. (Karm-y Rom dãmb 15:2.) Neb wʋsg sẽn nan pa kẽ kãadem pa rat tɩ neb a taabã sõng-b tɩ b seg saam-biig wall saam-bi-poak b sẽn tagsd tɩ zemsa ne-ba, tɩ d pa segd n modg-b n maan dẽ ye. (2 Tes. 3:11) Neb kẽer tõe n data sõngre, la b sã n pa kos tõndo, d pa segd n kẽes d toog ye.e (Yel. 3:27) Sãnda ratame tɩ b sõng-ba, la ra yɩ vẽeneg-vẽeneg ye. A Lidiya sẽn yaa saam-bi-poak sẽn nan pa kẽ kãadem n be Alemayn wã yeelame: “Y tõe n boola saam-biigã ne saam-bi-poakã la neb a taaba. Maan-y bũmb sẽn na n kõ saam-biigã ne saam-bi-poakã weer tɩ b seg taaba, la y bas sẽn ketã ne-ba.”
Y sã n bool neb wʋsgo, tõe n kõo kiris-neb sẽn nan pa kẽ kãadem weer tɩ b seg taaba (Ges-y sull 15)
16. Bõe la kiris-neb nins sẽn pa kẽ kãadmã pa segd n yĩmi?
16 D kẽe kãadem tɩ d pa kẽ kãadem me, d fãa vɩɩmã tõe n yɩ-d-la noogo. (Yɩɩn. 128:1) Woto wã, y sã n dat n kẽe kãadem n nan pa paam neda, bɩ y kell n lʋɩɩs a Zeova tʋʋmdã taoore. Saam-bi-poak a ye sẽn be Makawo t’a yʋʋr boondẽ t’a Sẽntiya yeelame: “Y sã n tags wakat ning y sẽn na n zĩnd ne y sɩdã wall ne y pagã arzãnã pʋgẽ wã yelle, y mikdame tɩ wakat ning y sẽn gũ n yaool n kẽ kãadmã yaa koɛɛg wʋsgo. Maan-y sũ-noog y gũubã wakate, la y ra sãam y sẽkã ye.” La y sã n zoe n paama ned y sẽn tagsd tɩ zemsa ne-yã, tɩ y sɩng taab roob yẽ? Sõsg ning sẽn pʋgdã pʋgẽ, y na n yãa sagls sẽn tõe n sõng-yã.
YƖƖLL 137 Pagb sẽn sakd Wẽnnaam
a Y sã n dat n bãng y sã n segl n saame n tõe n kẽ kãadem, bɩ y kẽ jw.org pʋgẽ n karem sõsg ning gom-zug sẽn yaa: “Roobã—Pipi babgã: M segl n saame n na n do ned, kãadem yĩng bɩ?”
b GOMDÃ VÕORE: Sõs-kãngã la sõsg ning sẽn pʋgdã pʋgẽ, b sã n gomd roob yelle, yaa wakat ning pag ne rao sẽn na n dɩk n bao n bãng taab sõma sẽn na yɩl n bãng b sã n zemsa ne taab n tõe n kẽ kãadmã yell la b gomda. Tẽns kẽer pʋsẽ, b yetame tɩ bao n bãng taaba. Rẽ sɩngda ne wakat ning raoã ne pagã sẽn na n gom ne taab n wilg vẽeneg tɩ b yamã kẽe taaba, n tãag wakat ning b sẽn na n kẽ kãadem, wall b sẽn na n zems taab n yeel tɩ b bas tɩ sa.
c D toeema yʋy kẽere.
d Tẽns wʋsg pʋsẽ, wae n yaa saam-biig n sɩngd saam-bi-poak roobo. La saam-bi-poak sã n yãk yam n tɩ ro saam-biig me pa wẽng ye. (Rut 3:1-13) Y sã n dat vẽenem n paase, bɩ y ges yʋʋmd 2004 zĩ-likr kiuug rasem 22 Reveillez-vous ! wã sõsg ning gom-zug sẽn yaa: “Les jeunes s’interrogent . . . Comment lui dire ce que je ressens pour lui ?”
e Kẽ-y jw.org n ges video ning gom-zug sẽn yaa: B zaba tẽebã zabr n tõoge—Sẽn pa kẽ-b kãadmã.