Y sẽn tõe n bao n bãng taab to-to, tɩ sõng-y tɩ y yãk yam-sõngo

1-2. Bõe la neb kẽer yeel baoo n bãng taabã wɛɛngẽ?

Y TÕE n paama sũ-noog wʋsg y sẽn wat n dood taabã sasa. Yãmb ne ned sã n dooda taaba, sãmbg kae tɩ y ratame tɩ yɩ sõma ye. Neb wʋsg paama sũ-noog b sẽn wa n baood n na n bãng taabã. A Saaraa sẽn yaa Etiopi saam-bi-poakã yeelame: “Maam ne m sɩdã sẽn wa n baood n bãngd taabã yɩɩ sũ-noog wakate. Rẽ naaga bũmb nins sẽn kõ maan sũ-noog wʋsg n yɩɩdã. D ra mi n gomda bũmb toor-toor sẽn tar yõod wʋsg yelle, la d ra wae n sõsd n laadẽ me. Mam sẽn wa n bãng tɩ m paama ned sẽn nong maam tɩ ma-me nong-a wã, yɩ-m-la noog wʋsgo.”

² La a Alɛgsi sẽn yaa Peyiba saam-biigã yeelame: “Maam ne m pagã sẽn wa n baood n bãngd taabã yɩɩ sũ-noog sasa, la d maoo ne zu-loees me.” Sõs-kãngã pʋgẽ, d na n yãa zu-loees kẽer neb nins sẽn dood taabã sẽn tõe n paame, la Biiblã sagls sẽn tõe n sõng-ba. Sẽn paase, d na n yãa tigingã neb a taabã sẽn tõe n teel nin-kãens to-to.

BAO N BÃNG TAABÃ YÕODO

3. Bao n bãng taabã yõod yaa bõe? (Yel-bũnã 20:25)

³ Yaa sɩd tɩ bao n bãng taabã tõe n yɩɩ sũ-noog wakate, la yaa bũmb sẽn tar yõod wʋsgo. Bala a tõe n baasa ne kãadem. Neb a yiib kãadem daare, b pʋlemda a Zeova taoor tɩ b na n nonga taab la b waoogd taab b yõor tɛka. Nand tɩ d maan pʋlenga, d segd n deng n tagsa a zug neere. (Karm-y Yel-bũn 20:25.) Yaa vẽeneg tɩ yaa woto me ne pʋleng ning d sẽn maand kãadmã daarã. Neb a yiib sã n bao n bãng taab sõma, sõngd-b lame tɩ b bãng n yãk yam-sõngo. B tõe n yãka yam n kẽ kãadem, wall b yãk yam n bas tɩ sa. Neb a yiib sẽn dood taab sã n wa yãk yam n na n bas tɩ sa, pa rat n yeel tɩ b sẽn bao n bãng taabã pa yãk neng ye. Talla yõodo. Sõng-b lame tɩ b bãng n yãk yam.

4. Bõe yĩng tɩ d segd n tall tags sẽn zems bao n bãng taabã wɛɛngẽ?

⁴ Bõe yĩng tɩ tar yõod tɩ d tall tagsg sẽn zems bao n bãng taabã wɛɛngẽ? Ned sẽn pa kẽ kãadem sã n tar tagsg sẽn zems bao n bãng taabã wɛɛngẽ, a pa na n dood ned n yaool n miẽ t’a pa rat n kẽ kãadem ne-a ye. La pa sẽn pa kẽ-b kãadmã bal n segd n tall tagsg sẽn zems bao n bãng taabã wɛɛngẽ ye. Yaa tõnd fãa. Wala makre, neb kẽer tagsdame tɩ neb a yiib sã n dood taaba, yaa tɩlɛ tɩ b kẽ kãadem ne taaba. Tagsg a woto namsda neb nins sẽn nan pa kẽ kãadmã. Bõe yĩnga? A Melisa sẽn yaa Etazĩni saam-bi-poak sẽn pa kẽ kãadmã yeelame yaa: “Saam-biig ne saam-bi-poak sã n dood taaba, neb kẽer tagsdame tɩ yaa tɩlɛ tɩ b kẽ kãadem. Rẽ kɩtame tɩ ned sã n wa rood a to, baa a sã n wa getẽ t’a soabã pa zems ne-a, a pa rat n bas tɩ sa ye. Sãnda pʋd n pa rat n sɩng meng ye. Nebã sẽn get yɛlã to-to wã tõe n waa ne yɩɩr wʋsgo.”

BAO-Y N BÃNG-Y TAAB SÕMA

5-6. Neb sã n dood taaba, bõe la b segd n modg n bãng taab zugu? (1 Pɩyɛɛr 3:4)

⁵ Y sã n dooda neda, bõe n tõe n sõng-y tɩ y bãng y sã n na n kẽe kãadem ne a soabã, wall y na n basame tɩ sa? Bao-y n bãng-y taab sõma. Nand tɩ y sɩng taab roobo, yaa vẽeneg tɩ y zoe n bãnga bũmb kẽer y to wã zugu. La masã, y paama weer n tõe n bao n bãng ‘bũmb ning sẽn be a sũurẽ wã.’ (Karm-y 1 Pɩyɛɛr 3:4.) Rẽ baoodame tɩ y maneg n bao n bãng a soabã ne a Zeova zoodã sẽn yaa to-to, a zʋgã la a sẽn get yɛlã to-to wã. Tar-n-tarẽ, y wat n tõe n leoka sogsg kẽere. Wala makre, ‘A na n yɩɩ pʋg-sõng wall sɩd-sõng bɩ?’ (Yel. 31:26, 27, 30; Efɛɛ. 5:33; 1 Tɩm. 5:8) ‘D na n tõog n nonga taab la d get taab yell sõma sɩda? D ned kam fãa na n tõog n maana sũ-mar ne a to wã pãn-komsem toor-toorã sɩda?’b (Rom. 3:23) Y sã n wa baood n bãngd taaba, tẽeg-y tɩ pa y yɛlã sã n wõnda taab n tar yõod n yɩɩd ye. Yaa y ned kam fãa sã n tõe n toeem tɩ zems ne a to wã.

⁶ Y sã n wa rood taaba, bõe me la y segd n bao n bãng y to wã zugu? Yɩta sõma tɩ y gom bũmb kẽer sẽn tar yõod yelle, nand tɩ y nonglmã paam pãnga. Wala makre, y ned kam fãa sẽn magd n na n wa maan bũmb ninsã. Y ned kam fãa tõe n tara a zu-loeese. Tõe n yɩɩ bãaga, ligd zu-loees wall yɛl sẽn paam-a tɩ ket n namsd-a. Y segd n goma rẽ yell bɩ? Pa bũmbã fãa yell la y segd n gom sɩngrẽ wã ye. (Ges-y Zã 16:12.) Y to wã sã n wa rat n tɩ y gom bũmb ning yell tɩ y getẽ tɩ yɩta sõma tɩ y bas tɩ kaoos bilf tɩ y yaool n gom rẽ yelle, bɩ y togs-a. La sã n wa kaoosdẽ, y to wã na n dat n bãnga rẽ sẽn na yɩl n yãk yam tɩ zemse. Rẽnd wat n yɩɩ tɩlɛ tɩ y pelg y pʋg n gom rẽ yelle.

7. Bõe la neb sẽn dood taab tõe n maan n bãng taaba? (Ges-y zĩ-gũbrã me: “Y sã n dood ned sẽn be zĩ-zãrgẽ.”) (Ges-y fot-rãmbã me.)

⁷ Bõe la y tõe n maan n bãng y to wã sẽn sɩd yaa ned ning buudã? Bũmb y sẽn tõe n maan tɩ sõng-y sõma yaa y sẽn na n pelgd y pʋg n sõsd ne taaba, n sokd taab sogsgo, la y maagd yĩng n kelgd taaba. (Yel. 20:5; Zak 1:19) Sẽn na yɩl n maan rẽ, naagd-y taab n maand bũmb kẽer sẽn na n kɩt tɩ y sõsd ne taaba. Y tõe n naagda taab n dɩtẽ, wall y mi n naag taab n yi n kẽn n kok pemsem, la y naagd taab n moond koɛɛgã. Y sã n mi n tũ taab n tɩ kaag y zakã rãmb wall y zo-rãmba, tõe n sõng-y lame tɩ y maneg n bãng taab sõma. Sẽn paase, naag-y taab n maan bũmb kẽer sẽn na n kɩt tɩ y bãng y to wã manesem sẽn yaa to-to ne neb buud toor-toore, la yɛl buud toor-toor taoore. Ges-y-yã a Ogistẽ sẽn be Peyiba wã sẽn maan to-to. A goma yẽ ne a pag a Alisiya sẽn wa n baood n bãngd taab sasa wã yelle, n yeel yaa: “D baoo bũmb kẽer sẽn na n sõngd tɩ d maneg n bãng taab n paase. Mi n yaa bũmb maaneg sẽn pa toogo, wala naag taab n segl rɩɩbo, pa rẽ bɩ n tʋm tʋʋm-bõones a taaba. Tʋʋm a woto sasa, ned kam fãa nee a to wã zʋg-sõma la a pãn-komsem.”

8. Bõe yĩng tɩ tar yõod tɩ neb sẽn baood n bãngd taab naagd taab n zãmsd Biiblã?

⁸ Y sã n naagd taab n zãmsd Biiblã, tõe n sõng-y lame me tɩ y bãng taaba. Y sã n wa kẽ kãadem, y segd n baooda sẽk y zak pʋgẽ Biibl zãmsgã yĩnga. Rẽ la Wẽnnaam na n ning y kãadmã barka. (Koɛ. 4:12) Woto wã, pa zems tɩ y baood sẽk n naagd taab n zãmsd Biiblã y sẽn wat n baood n bãngd taabã sasa sɩda? Yaa sɩd tɩ neb sẽn dood taab nan pa pag ne a sɩda, tɩ saam-biigã nan pa saam-bi-poakã zu-soab ye. La y sã n naagd taab n zãmsd Biiblã n pa vaandẽ, tõe n sõnga y ned kam fãa t’a bãng a to wã tẽeb sẽn yaa to-to. A Mags ne a pag a Liiza sẽn be Etazĩni wã goma naag taab n zãms Biiblã nafa a to yell n yeel yaa: “D sẽn wa n sɩng taab roobã bala, d baoo sɛb sẽn gomd bao n bãng taabã yelle, kãadmã la zak pʋgẽ vɩɩmã yell n sɩng zãmsgo. Seb-kãens sõnga tõnd tɩ d gom bũmb wʋsg sẽn tar yõod yelle. Sã n da pa tũ ne rẽ, ra na n yɩɩ toog tɩ d sɩng bõn-kãens yell goama.”

BŨMB A TAAB Y SẼN SEGD N GOM B YELLE

9. Bõe n tõe n sõng neb sẽn baood n na n bãng taab tɩ b bãng n yãk neb nins b sẽn na n togsã?

⁹ Ãnd dãmb la y segd n togs tɩ y rooda taaba? Yaa yãmb y yiibã n segd n yãk y sẽn na n togs b rãmbã. Sɩngrẽ wã, y tõe n yãka yam n na n togs neb a wãn bala. (Yel. 17:27) Rẽ na n sõng-y lame tɩ y gil yɩɩre, la sogsgo. La y sã n pa togs ned baa a ye, y tõe n wa soosdame n pa rat tɩ ned bãng ye. Rẽ me tõe n waa ne yelle. Rẽnd yɩta sõma tɩ y togs neb sẽn tõe n kõ-y sagl-sõma, la b maan bũmb a taab n sõng-yã. (Yel. 15:22) Tõe n yɩɩ y zakã neb kẽere, y zo-rãmb tẽeb sẽn bɩ, wall tigingã kãsem-dãmbã.

10. Bõe n tõe n sõng neb sẽn dood taab tɩ b ra wa maan bũmb sẽn na n sãam a Zeova sũuri? (Yel-bũnã 22:3)

¹⁰ Bõe n tõe n sõng-y tɩ y ra wa maan bũmb n sãam a Zeova sũuri? Y nonglmã pãng sã n wa paasdẽ, y yamã me na n kẽeda taab n paasdẽ. Bõe n tõe n sõng-y tɩ y kell n yɩ yɩlem yel-manesmã wɛɛngẽ? (1 Kor. 6:18) Zãag-y y mens ne gom-dẽgdo, ra be-y zĩig yãmb y yiibã bala, la ra yũ-y rãam wʋsg ye. (Efɛɛ. 5:3) Bõn-kãens tõe n paasa pag ne rao lageng tʋlsmã pãnga, la kɩt tɩ yɩ toog tɩ y maan sẽn yaa tɩrga. Yɩta sõma tɩ y mi n bao weer n sõs ne taab n ges y sẽn na n maan to-to n wilg tɩ y waoogda taaba, la tɩ y sakda a Zeova noyã. (Karm-y Yel-bũn 22:3.) D ges bũmb ning sẽn sõng a Davɩɩd ne a Alima sẽn be Etiopi wã. B yeelame: “D ra wae n bee zĩis nebã sẽn waoogẽ, wall ne d zo-rãmba. D pa tol n yɩ d yembr mobill pʋgẽ, wall roog pʋgẽ ye. Rẽ sõnga tõnd tɩ d gil bũmb toor-toor sẽn da tõe n kɩt tɩ d paam makre.”

11. Neb sẽn dood taab sã n wa rat n yãk yam b sẽn na n wilgd taab b nonglmã to-to wã wɛɛngẽ, bõe yell la b segd n tagse?

¹¹ Neb sẽn dood taab tõe n maana bũmb n wilg taab b nonglem bɩ? Y nonglmã pãng sã n wa paasdẽ, y tõe n yãka yam n wilgd taab y nonglem ne manesem sẽn zemse. La y sã n bas tɩ pag ne rao lageng tʋlsmã paam pãnga, tõe n yɩɩ toog tɩ y yãk yam sẽn zems y to wã wɛɛngẽ. (Sal. yɩɩl. 1:2; 2:6) Sẽn paase y sã n wa na n maan bũmb n wilg y to wã y nonglem, tõe n yɩɩ toog tɩ y tõog y meng n da maan bũmb sẽn pa noom a Zeova ye. (Yel. 6:27) Rẽ n so tɩ sɩngrẽ wã, y segd n sõsa ne taab n ges y sẽn na n wilgd taab y nonglem to-to tɩ pa kɩɩsd Biiblã noy ye.c (1 Tes. 4:3-7) Sok-y y mens yaa: ‘Tõnd sẽn be zĩig ningã nebã tagsg yaa wãn ne tõnd sẽn wilgd taab d nonglmã to-to wã? D sẽn maand bũmb ninsã tõe n neka pag ne rao lageng tʋlsem tõnd nin-yɛng nengẽ bɩ?’

12. Neb sẽn baood n na n bãng taab sã n mi n tar mo-yõsa, bõe yell la b segd n tagse?

¹² Wãn to la y tõe n welg zu-loees la mo-yõsa? Y sã n mi n tara mo-yõsa, rat n yeelame tɩ y to wã pa zems ne yãmb bɩ? Ayo. Pa wakat fãa la mo-yõs wilgd tɩ y to wã pa zems ne yãmb ye. Sẽn dood-b taabã fãa, la baa sẽn kẽ-b kãadmã fãa mi n tara mo-yõsa. Yaa neb sẽn waoogd taaba, la sẽn sakd n naagd taab n welgd b mo-yõsã kãadem n yɩt sõma. Rẽnd y sẽn welgd y zu-loeesã to-to rũndã-rũndã wã tõe n wilga y kãadmã sã n na n yɩɩ sõma. Sok-y y mens yaa: ‘D sã n wa pa zems taab bũmb ning wɛɛngẽ, d maagda d yĩng n gom rẽ yell ne waoogr bɩ? D sakd n deega d kongr nana-nana, la d maood ne d pãn-komsmã bɩ? D ned kam fãa sakd n basa a raab nana-nana, n kos sugri, la a kõ sugr bɩ?’ (Efɛɛ. 4:31, 32) La bao n bãng taabã sasa y sã n wae n kɩɩsd taab wall y zabd taab wakat fãa, tõe tɩ yɛlã pa na n toeem y kãadmã poor ye. Y sã n mik tɩ y to wã pa zems ne yãmba, sẽn yaa sõma ne yãmb y yiibã fãa yaa y sẽn na n yãk yam n bas tɩ sa.d

13. Bõe n tõe n sõng neb sẽn baood n na n bãng taab tɩ b bãng b sẽn na n tũ taab n kaoos to-to wã?

¹³ Y bao n bãng taabã segd n kaoosa wakat a wãna? Naoor wʋsgo, d sã n pa reng n tags sõma n yãk yam n maan bũmbu, pa baasd neer ye. (Yel. 21:5) Rẽnd y segd n tũu taab n kaoos tɩ sek y na bãng taab sõma. La y pa segd n bas tɩ kaoos zaalem ye. Biiblã yetame me yaa: “Ned sã n gũud bũmb tɩ kaoosd n pa watẽ, sãamda a sũuri.” (Yel. 13:12) Sẽn paase y sã n tũ taab n kaoos wʋsgo, pag ne rao lageng tʋlsmã tõe n wa paama pãnga, tɩ lebg toog tɩ y tõog y mense. (1 Kor. 7:9) Wall tɩ y tagsd y sẽn tũ taab n kaoos to-to wã yellã, sok-y y meng yaa: ‘Bõe la m ket n dat n bãng m to wã zug sẽn na yɩl n bãng n yãk yam?’

NEB A TAABÃ SẼN TÕE N SÕNG TO-TO

14. Bõe la neb a taabã tõe n maan n sõng neb sẽn dood taaba? (Ges-y fotã me.)

¹⁴ D sã n mi neb sẽn baood n na n bãng taaba, bõe la d tõe n maan n sõng-ba? D tõe n bool-b lame tɩ b wa naag tõnd n dɩ, n naag tõnd d zak pʋgẽ Biibl zãmsgã sasa, wall n kok pemsem. (Rom. 12:13) D sã n maan woto, tõe n sõng-b lame tɩ b maneg n bãng taaba. Tõe tɩ b rata ned sẽn na n mi n be ne-ba, wall ned sẽn na n dɩk-b n kẽng zĩig ninga. Sã n yaa woto, y sã n tõe bɩ y sõng-ba. Y leb n tõe n bool-b-la y zakẽ wã, sẽn na yɩl tɩ b paam n sõs ne taab n yaool n da yɩ b yembr ye. (Gal. 6:10) A Alisiya sẽn yaa pag ning yell d sẽn zoe n gomã tẽega bũmb sẽn yɩ yẽ ne a sɩd a Ogistẽ noog yell n yeele: “D tẽed-n-taas kẽer yeela tõnd tɩ d sã n wa rat zĩig n sõs ne taab n yaool n pa yɩ d yembre, d tõe n wa bãmb zakẽ wã. Rẽ yɩ-d-la noog wʋsgo.” Neb sẽn dood taab sã n kos yãmb tɩ y wa pak-ba, y tõe n gesame tɩ b waoog-y lame. La y segd n gũusame tɩ b sã n wa rat n gom bũmb kẽer yell bɩ y lak bilfu, la y pa segd n loog n bas-b b yembr ye.—Fili. 2:4.

15. Bõe me la d tõe n maan n sõng neb sẽn dood taaba? (Yel-bũnã 12:18)

¹⁵ D leb n tõe n teela sẽn dood-b taabã ne d no-goama. Wakat ninga, d segd n gũusa ne d no-goamã. (Karm-y Yel-bũn 12:18.) Wala makre, d tõe n wa rat n togsa neb a taabã tɩ saam-biig ne saam-bi-poak n dood taaba. La tõe tɩ b rat n togsa nebã b toore. D pa segd n gomd b yell wʋsgo, wall d ningd-b tall b yam-yãkr kẽer wɛɛngẽ ye. (Yel. 20:19; Rom. 14:10; 1 Tes. 4:11) Sẽn paase, d pa segd n yeel bũmbu, pa rẽ bɩ d sok-b sokr sẽn na n kɩt tɩ b getẽ tɩ d pẽdgd-b lame tɩ b kẽ kãadem ye. Saam-bi-poak a ye yʋʋr sẽn boond t’a Eliiz ne a sɩdã yeelame yaa: “Nebã sã n da sokd tõnd sogsg d yi-kãadem kibsã wɛɛngẽ, tɩ tõnd d yiibã yaool n nan pa gom rẽ yelle, ra pa noom-d ye.”

16. Neb sẽn da rood taab sã n yãk yam n na n bas tɩ sa, d manesem segd n yɩɩ wãna?

¹⁶ La neb sẽn dood taab sã n yãk yam na n bas tɩ sa yẽ? D pa segd n feesd n na n bãng yɛlã sẽn yɩ to-to wã, wall d ningd b nin-yɛng taal ye. (1 Pɩy. 4:15) Saam-bi-poak yʋʋr sẽn boond t’a Leya yeelame: “Maam ne saam-biig n da rood taaba, n wa yãk yam n bas tɩ sa. La m wa n wʋma neb sẽn wẽed no-koeemd bũmb ning sẽn kɩt tɩ d bas taabã wɛɛngẽ. Rẽ sãama m sũur wʋsgo.” Neb a yiib sẽn da rood taab sã n wa yãk yam n na n bas tɩ sa, d pa segd n tags tɩ b yãka yam sẽn pa sõma ye. Naoor wʋsgo, rat n yeelame tɩ b sẽn bao n bãng taabã bõn-daabã pidame. Sõng-b lame tɩ b yãk yam sẽn yaa sõma ne-ba. Baasgo, yam-yãkrã tõe n sãama b sũur wʋsgo, la kɩt tɩ b tagsdẽ tɩ b yaa b yembre. Woto wã, d tõe n baoo d sẽn na n maan to-to n sõng-ba.—Yel. 17:17.

17. Bõe la neb sẽn dood taab segd n kell n maane?

¹⁷ Y sã n baood n na n bãng taaba, y tõe n paama zu-loees wa d sẽn yã wã, la y tõe n paama sũ-noog me. A Zesika yeelame: “Sɩd-sɩda, bao n bãng taabã yaa tʋʋm-saalga. La m sũur yaa noog d sẽn bao sẽk n modg n bao n bãng taab sõma wã.” Yãmb sã n dooda taaba, bɩ y kell n modg n bãng taab sõma. Y sã n maan woto, y bao n bãng taabã na n yãka nenga. Na n sõng-y lame tɩ y bãng n yãk yam sẽn yaa sõma.