Yãmb yiisda neb nins sẽn pa le naagd yãmbã y sʋk bɩ?
Ned sã n deeg lisg n lebg a Zeova Kaset soab n wa pa le moond koɛɛgã, bɩ a wa n laka a meng ne a tẽed-n-taasã, tõnd pa yiisd-a d sʋk ye. D modgdame n sõng-a, t’a lebs n sɩng Wẽnnaam tũubu.
Tõnd pa yɩt tao-tao n yiis ned sẽn maan yel-wẽn-kãseng tõnd sʋk ye. La ned sẽn deeg lisg n lebg a Zeova Kaset soab sã n kɩɩs Biiblã noy n pa tek yam, d yiisd-a-la d nin-buiidã sʋka. Biiblã yeta woto vẽenega: “Dig-y nin-wẽngã n yiis y sʋka.”—1 Korẽnt-rãmbã 5:13.
La b sẽn yiis ned ningã manesem tog n yɩɩ wãn ne a paga, bɩ a kamb sẽn ket n tũud a Zeova? Yaa sɩd tɩ tũudmã wɛɛngẽ, b pa le yaa saam-biis ye. La b ket n kĩi ne taaba. Dẽnd, b segd n ket n sõngda taab la b get taab yelle, wa zak neb sẽn tog n maan to-to wã.
Neb nins b sẽn yiis tigingã pʋgẽ wã tõe n ket n wata tõnd tigissã. B sã n data, kãsem-dãmbã tõe n sõng-b-la ne sagls sẽn tik Biiblã, tɩ b paam tɩ Wẽnnaam a Zeova lebs n deeg-b a nin-buiidã sʋka. Ned b sẽn yiis tigingã pʋgẽ sã n tek yam, la a wilg ne a tʋʋm t’a sɩd tʋll n tũu Biiblã saglsã, tõnd lebsd n deeg-a-la tigingã pʋgẽ, t’a le yaa a Zeova Kaset soaba.