Ket-y n moond-y wakat fãa
1 Tõnd vɩɩ tood wakate. Tẽns pʋsẽ gudgr la buud ne taab zaba, sabab-wẽns wala tẽn-digimdsi, sebdo, sa-bɛd la yɛl a taab sẽn kõt rabeem wae n maandame. Ninsaalbã buud fãa rata koe-noog n wʋm masã n yɩɩd pĩndã. Baasg zãnga, neb wʋsg toor kae ne tẽebã yɛl ye. Zĩis kẽere, tõe n yaa toog tɩ d yã nebã b yiya, la tõe tɩ yaa toog n yɩɩd meng tɩ d yã neb sẽn na n kelg-d bɩ sẽn dat n zãms Biiblã. La baa ne rẽ fãa, tara yõod tɩ d ket n moond Wẽnnaam Rĩungã a sẽn luglã koe-noogo.—Mat. 24:14.
2 D sẽn nong nebã yĩnga: Tõnd koe-moonegã wilgda nebã t’a Zeova nong-b lame. A ‘ka rat tɩ ned ba a ye sãam ye, a ratame tɩ nebã yam tek tɩ b kos sugri.’ (2 Pɩɛ. 3:9; Eze. 33:11) Rẽ n so t’a kõ noor wa a Zezi sẽn yeelã tɩ “yaa tɩlae tɩ koe-nooga reng n moon buuda fãa sʋka.” (Mark 13:10) Wẽnnaam yeta nebã tɩ b bao-a n wa paam n põs a Sʋɩtãan dũniyã sãoong sẽn watã wakate. (Zoɛll 3:1, 2, 5; Sof. 2:2, 3) Rẽ yĩnga d pa segd n tall mi-beoog ne a Zeova, a sẽn kõ tõnd me zu-noog tɩ d tõe n paam n põsã yĩng sɩda?—1 Tɩm. 1:12, 13.
3 Dũni gill moonegã rapoor wilgame tɩ yʋʋmd 2004 pʋgẽ wã, b sã n pʋɩ tɩ zemse, neb d sẽn zãms Biiblã kiuug fãa pʋgẽ sõor yɩɩ neb 6 085 387, tɩ semen fãa, sẽn na maan karen-bi-paals 5 000 reeg lisgu. Yaa a Zeova sẽn ning koe-moondbã sẽn kell n modg wʋsg n sõs ne nebã fãa b moonegã zĩisẽ barkã yĩng n kɩt tɩ b yã nin-kãensã sẽn dɩk b mens n kõ Wẽnnaamã kẽere. Ad b sɩd kõo tigimsã neb sũ-noogo, la d sẽn paam n yaa tʋmd-n-taas ne Wẽnnaam neba fãagr yĩngã, sɩd yaa zu-noog tɛkẽ n kõ-do!—1 Kor. 3:5, 6, 9.
4 Wẽnnaam yʋʋrã pẽgre: D ket n moonda nebã wakat fãa sẽn na yɩl n pẽg a Zeova zãmã sʋka, la d kɩt t’a yʋʋrã paam pẽgr ãdem-biisã fãa taoore. (Heb. 13:15) A Sʋɩtãan belga “dũniyã fãa” t’a nebã tẽed tɩ Wẽnnaam pa tõe n welg ninsaalbã zu-loeese, t’a toor kae ne ãdem-biisã sẽn namsdã, wall b tẽed meng tɩ Wẽnd pʋd n kae ye. (Wil. 12:9) Ne tõnd koe-moonegã maasem, d kɩtdame tɩ nebã bãngd sɩdã tõnd saasẽ Ba wã sẽn tar ziirã zugu. Bɩ d ket n pẽgd a yʋʋrã masã la wakat fãa.—Yɩɩl 145:1, 2.