Kom-bɩɩs sẽn yãgd wa fɩtl dãmba
1. Wãn to la Biiblã wilg tɩ kiris-nebã na n yɩɩ toore, la wãn-wãn la gom-kãensã pidsd kom-bɩɩs nins sẽn yaa kiris-nebã zut rũndã-rũndã?
1 A Zezi yeela a karen-biisã woto: “Yãmb yaa dũniyã vẽenem.” (Mat. 5:14, 16) A karen-biisã ra na n yɩɩ wala tẽng sẽn be tãng zug n yãgd ne wĩntoogã vẽenem. Rũndã-rũndã, kom-bɩɩs wʋsg sẽn yaa kiris-neb n ‘yãgd wa fɩtl dãmb dũniyã pʋgẽ’ ne b yel-manesmã sẽn yaa sõma wã la b sẽn kõt kasetã ne yẽesmã maasem.—Fil. 2:15; Mal. 3:18.
2. So-bʋs la y tõe n tũnug n kõ y karen-saam dãmbã la y karen-bi-taasã kasetã?
2 Lekollẽ wã: Wãn-wãn la y tõe n kõ kasetã lekollẽ wã? Kom-bɩɩs kẽer tũnuga ne sõss b sẽn sõsd b karen-dotẽ wã n kõ kaseto. Sõs-kãens kẽer gomda dorgã la lebg-m-meng-m-toorã bɩ evolisiõ wã yelle. Saam-bi-poak a yembr tũnuga ne devoaar sẽn gomd terorismã yell n kõ kaset n wilg tɩ yaa Wẽnnaam Rĩungã bal n na n kɩt tɩ terorismã sa. A karen-saambã sũur yɩɩ noog wʋsg ne bũmb ning a sẽn wilg a devoaarã pʋgẽ wã, tɩ rẽ kɩt t’a paam sor n kõ kasetã n paase.
3. Lekollẽ wã, wãn-wãn la y tõe n tũnug ne y yel-manesmã n kɩt tɩ y vẽenemã yãge?
3 Sor a to y sẽn tõe n tũnug n yãg wa fɩtl dãmb yaa y yel-manesmã la y sẽn manegd d mens to-to wã. (1 Kor. 4:9; 1 Tɩm. 2:9) Karen-biisã la karen-saam dãmbã sã n neẽ tɩ y yaa toor ne y taabã, tõe n kɩtame tɩ kẽer sak sɩdã y yel-manesmã sẽn yaa sõma wã yĩnga, la kõ-y sor tɩ y taas-b sɩd ning sẽn be Biiblã pʋgẽ wã. (1 Pɩɛ. 2:12; 3:1, 2) Yel-manesem sẽn yaa sõma tallg tõe n yɩɩ toog ne-yã, la y sã n modge, a Zeova na n ning-y-la bark wʋsgo. (1 Pɩɛ. 3:16, 17; 4:14) Sẽn na yɩl tɩ y taabã tʋlg n kelg koe-noogã, y tõe n karemda sɛb sẽn tik Biiblã zug vʋʋsgã wakate, wall y rɩgl-b zĩig neb sẽn na yã-ba.
4. Kasetã kũun lekollẽ wã nafa kẽer la bʋse?
4 Y sã n yãgd wa fɩtl dãmb lekollẽ wã, kengda y tẽebã la kɩtdẽ tɩ y tõe n zẽk y zug y sẽn balemd a Zeova wã yĩnga. (Zer. 9:24) Y sã n yãgd wa fɩtla, kogend-y lame. Saam-bi-poak a yembr yeela woto: “Mam sẽn gomd m tẽebã yellã sẽn nafd maam zĩig ningã yaa tɩ rẽ kɩtame tɩ karen-biisã pa makd n na n modgd-m tɩ m maan yɛl sẽn kɩɩsd Biiblã sẽn yetã ye.”
5. a) Wãn-wãn la kom-bɩɩs kẽer yalgd b koe-moonegã? b) Bõe la yãmb yãk yam n dat n maan tẽebã wɛɛngẽ y vɩɩmã pʋgẽ?
5 B koe-moonegã yalgre: Sor a ye kom-bɩɩs wʋsg sẽn tũnugd ne n yãgd wa fɩtl dãmb yaa b sẽn yalgd b koe-moonegã. Saam-biig a yembr sẽn karem kolɛɛs n sa, a kẽnga tẽng Rĩungã koe-moondb raab sẽn da beẽ wʋsgo. A tɩ naaga tiging sẽn paood n tar kãsem soab a ye bala. A gʋlsa a zoa n yeel woto: “Ka nooma maam. Koe-moonegã tara yamleoogo! Zak fãa pʋgẽ, tõnd sõsd n tata minit 20, bala nebã tʋll n kelga bũmb ning fãa d sẽn tar n na n togs-ba.” A paasa woto: “Mam datame tɩ kom-bɩɩsã fãa maan woto, n paam sũ-no-kãngã buudu. Bũmb kae n yaa sõma n yɩɩd d sẽn na n dɩk d sẽn tarã fãa n sõgen a Zeova ye.”
6. Bõe n kɩt tɩ yãmb sũur noom ne y tigingã kom-bɩɩse?
6 Ad d sũur sɩd nooma ne kom-bɩɩsã sẽn yãgd wa fɩtl dãmb dũniyã pʋgẽ wã! (1 Tes. 2:20) Y sẽn sõgend a Zeova ne y sũy fãa, ne y sɩɩs fãa, ne y yam fãa la ne y pãngã fãa wã, y na n paama bark wʋsg ‘masã zãmaan-kãngã pʋgẽ, la dũni ning sẽn watã pʋgẽ y na paam vɩɩm sẽn ka sɛta.’—Mark 10:29, 30; 12:30.