D sõng Biibl karen-biisã tɩ b lebg koe-moondba
1 Matɩe 28:19, 20 pʋgẽ, a Zezi bobla a karen-biisã tʋʋm-kãsenga. A wilg-b-la b sẽn tõe n maan karen-biis wʋsg to-to, sẽn na yɩl tɩ karen-bi-kãens me wa tõog n maan karen-biis a taaba. Woto fãa ra na n kɩtame tɩ b wa tõog n moon Wẽnnaam Rĩungã koe-noog dũniyã gill zug saabã wakate, sẽn dat n yeel tɩ tõnd wakatã.—Mat. 24:14.
2 Neb nins tõnd sẽn zãmsd Biiblã tõe n yɩɩ d mens kamba, bɩ neb a taaba. D rat n sɩd sõnga nin-kãens tɩ b bãng tɩ b segd n sõnga neb a taabã me tɩ b lebg a Zezi Kirist karen-biisi.—Luk 6:40.
3 D sõng-b tɩ b moon koɛɛgã: Sagl-y neb nins y sẽn zãmsd Biiblã tɩ b wilg b sẽn zãmsd bũmb ninsã neb a taabã me. Togsd-y-b koe-moonegã pʋgẽ kiba-noodo. Sõng-y y kambã hal b yãadmẽ tɩ b naagd-y n moond koɛɛgã sõma wa b sẽn tõe tɛka. (Yɩɩl 148:12, 13) Wilg-y y goamã la y manesmã pʋgẽ tɩ y nanda koe-moonegã.—1 Tɩm. 1:12.
4 A Zeova tʋmda neb nins sẽn sakd n tũud a noyã tɩ b tɩ moond a koɛɛgã. Yaa sɩd tɩ neb nins sẽn nan sɩngd koɛɛgã moonegã minim pa ta koe-moondb nins sẽn zoe n deeg-b lisgã ye. La nin-kãensã segd n tẽe Biiblã zãms-yẽgã, la b tõog n wilg neb a taab me. (Ges-y Organisés sebrã neng 79-82.) B segd n laka b mens fasɩ ne “Babilon kãsengã” la politikã yɛla, la b modg n kẽnd tigissã wakat fãa.—Wil. 18:2, 4; Zã 17:16; Heb. 10:24, 25.
5 Y sã n tẽedame tɩ ned y sẽn zãmsd Biiblã tõe n yɩɩ koe-moond sẽn nan pa reeg lisgu, bɩ y tɩ togs y tigingã yel-gɛtbã taoor-lʋɩta. A na n kɩtame tɩ kãsem dãmb a yiib zĩnd ne yãmb la karen-biigã, n sõs n bãng a sã n tõe n yɩ koe-moonda, sẽn na yɩl n naag tigingã neb n moon koe-noogã. Karen-biigã sã n yãagd-y koɛɛgã mooneg pʋgẽ, y na n tõog n kell n sõng-a lame t’a bãngrã paase.