D sõng sẽn pa sakd-b tao-tao tɩ d zãms-b Biiblã yetame sebrã
1. Bõe yĩng tɩ pa nebã fãa n sakd tao-tao tɩ d zãms-b Biiblã yetame sebrã?
1 Ned sã n dat n lebg a Zeova Kaset soaba, a segd n bãnga Biiblã. La neb kẽer sẽn pa tẽed Kiristã, b pa sak n deeg tɩ Biiblã yaa Wẽnnaam Gomd ye. Sãnda pa tẽed baa bilf tɩ Wẽnd beeme, n pa nand Biiblã me ye. Bõe n sõng neb sẽn da pa rat n zãms Biiblã yetame sebrã tɩ b wa sak tɩ d zãms-ba? Sõs-kãngã sẽn kõt sagls ninsã tika tẽns na maan 20 koe-moondb goama.
2. Ned sã n yeel t’a pa tẽed tɩ Wẽnd beeme, bõe la d segd n bao n bãnge, la bõe yĩnga?
2 Ned sã n yeel t’a pa tẽed tɩ Wẽnd beeme ye: Ned sã n yeel t’a pa tẽed Wẽnde, yɩta sõma tɩ d reng n bao n bãng a sẽn pa tẽedã võore. Yaa a sẽn tẽed evolisiõ wã yĩng bɩ? Yaa nebã sẽn wẽgd taabã wall tũudum kẽer neb pʋ-likã n kɩt t’a pa le tẽed Wẽnnaam bɩ? Rẽ yĩnga a sẽn yit tẽng ningã, b gɩdgame tɩ ned ra tũ Wẽnnaam bɩ? Tõe me t’a pa tẽed fasɩ tɩ Wẽnd kae, la a zɩ n tags tɩ tara yõod t’a bao Wẽnnaam ye. Koe-moondb wʋsg mikame tɩ b sã n sok a soabã a sã n da tẽeda woto hal daar zãra, kɩtdame t’a togs a sẽn pa tẽedã võore. A sã n wa togsd rẽ bɩ y kelg-a la y ra kʋʋg a goamã ye. D sã n bãng a sẽn pa tẽedã võore, d bãngda d sẽn na n leok to-to, la sebr ning d sẽn tog n kõ-a.—Yel. 18:13.
3. Wãn to la d tõe n wilg tɩ d pa paoog d kɛlgdã?
3 Y sã n na n leok y kɛlgdã bɩ y gũus n da paoog-a ye. Ad Etazĩni koe-moond sẽn yeele: “D segd n sak n deegame tɩ ned fãa tara sor n na n tẽ a sẽn date. Wall tɩ d modg nebã tɩ b tẽ d goamã, yɩta sõma tɩ d sok-b sogsg sẽn na n kɩt tɩ b tags n bãng tɩ d sẽn yet-bã yaa sɩda.” Tigims sull yel-gɛt a yembr yeelame tɩ kɛlgdã sã n togs a tagsg n sa, a sokd-a-la woto: “Yãmb zoe n tagsame tɩ b sẽn yet ka wã tõe n yɩɩ sɩd bɩ?” Rẽ poore, a wilgd-a-la bũmb ning a sẽn dat t’a bãngã.
4. Wãn to la d tõe n sõng wall budist-rãmbã?
4 Naoor wʋsgo, budist-rãmbã pa tẽed tɩ Wẽnd beeme ye. Gãrãnd Bertayn koe-moondb kẽer sã n seg nin-kãensã, b wae n tikda La paix et le bonheur durables : comment les trouver sebrã n sõs ne-ba. B sã n tɩʋʋs sõsgã n sa, b tikda sebrã sak ning gom-zug sẽn yaa “ Existe-t-il vraiment un Créateur Très-Haut ?” wall “ Un guide bénéfique pour tous les humains ” sakã n sõse. Rẽ poore, b tõe n goma Biiblã yetame sebrã yell n yeel b kɛlgdã woto: “Yaa sɩd tɩ yãmb pa tẽed tɩ Wẽnd beeme ye. La y sã n zãms Biiblã, a saglsã na n naf-y lame.” Etazĩni so-pakd sẽn moond koɛɛgã sinoa-rãmbã yeela woto: “Tõnd moonegã zĩig neb wʋsg nonga sɛb karengo. Woto kɩtame tɩ d sã n kõ-b sebr n lebg n na n tɩ kaag-ba, d mikdame tɩ b zoe n karm-a-la zãnga. La b tõeeme n pa wʋmd Biiblã zãmsg sẽn dat n yɛɛlg ye. Rẽ n so tɩ mam sã n seg-b pipi, m kõt-b-la Koe-noog sebrã. Bala, b sẽn gʋls-a to-to wã kɩtame tɩ d tõe n tall-a n sõs ne ned nana-nana.” Etazĩni tigims sull yel-gɛt a ye sẽn kaagd tigims nins sẽn gomd sinoaamdã yeelame tɩ b tõe n wilga sinoa-rãmbã Biiblã yetame sebrã pipi segbã. La a paasame tɩ sẽn são yaa d sẽn na n sɩng zãmsgã ne sak a 2 wã sẽn gomd Biiblã yellã. Bala, sak a 1 wã gomda Wẽnnaam yelle.
5. D sã n dat n sõng ned sẽn pa tẽed tɩ Wẽnd beeme, bõe yĩng tɩ d segd n tall sũ-mare?
5 D sã n dat n sõng ned t’a wa sak n tẽ tɩ Wẽnd beeme, rɩkda sẽka, tɩ d segd n tall sũ-mare. Tõe tɩ sɩngrẽ wã, d pa na n tõog t’a sak ye. La bilf-bilfã, tõe t’a wa yeel tɩ wõnda Wẽnd beeme, wall a yeel t’a mii bũmb ning sẽn tõe n kɩt tɩ ned wa sak n deeg tɩ Wẽnd beeme wã.
6. Yaa bõe n mi n kɩt tɩ neb kẽer pa nand Biiblã?
6 Neb nins sẽn pa nand Biiblã: Naoor wʋsgo, nina tõe n sak n deegame tɩ tõe tɩ Wẽnd beeme, la a pa rat n bãng Biiblã sẽn yete, bala, a pa tẽed tɩ yaa Wẽnnaam Gomd ye. Tõe t’a sẽn vɩ zĩig ningã neb pa tẽed Kiristã, t’a getẽ tɩ Biiblã yaa kiris-neb sebre. Wall a sẽn vɩ tẽng ningã nebã wʋsg yetame tɩ b yaa kiris-neb n yaool n pa tũud Kiristã goamã, tɩ kɩt t’a tagsdẽ tɩ Biiblã sagls ka yõod ne yẽ ye. Wãn to la d tõe n sõng ned a woto t’a wa nand Biiblã n sak meng tɩ b zãms-a Biiblã yetame sebrã?
7. Bõe la d tõe n maan n sõng nebã tɩ b wa nand Biiblã?
7 Gɛrɛs filiyallã yeela woto: “D sã n dat n sõng neb nins sẽn pa nand Biiblã, sẽn yaa sõma n yɩɩd yaa d sẽn na n lak-a n karem n wilg-ba. Koe-moondb wʋsg mikame tɩ Biiblã koɛɛg tara pãnga, n kẽed ned n yɩɩd bãmb mengã goama. (Heb. 4:12) Neb wʋsg sẽn yã Wẽnnaam yʋʋrã Biiblã pʋgẽ, yɩɩ sabab tɩ b bao n na n bãng Biiblã n paase.” Ẽnd filiyallã me yeela woto: “Ẽndu-rãmbã nong n bãnga vɩɩmã võore, la ned sẽn lebgd bũmb ning a kũum poorã. Biiblã sẽn pʋlem tɩ wakat n wat tɩ bu-welsg pa na n le zĩndã me noom-b lame.” Koe-moondbã sã n nong n gomd bũmb sẽn pak nebã yelle, b paamdame n wilg Wẽnnaam Rĩungã sẽn na n wa ne toeeng ning dũniyã zugã.
8. Kiris-neb ne yʋʋrã manesem kɩtame tɩ neb kẽer tar tags-kɛg Biiblã zugu. Wãn to la d tõe n sõng nin-kãense?
8 Kiris-neb ne yʋʋrã manesem sã n kɩtame tɩ ned pa nand Biiblã, yɩta sõma tɩ d sõng-a t’a bãng tɩ nin-kãensã pa tũud Biiblã, la tɩ b golemda a goamã. Ẽnd filiyallã yeela woto: “Sẽn na yɩl n sõng neb kẽere, mi n yaa tɩlae tɩ d togs-b tɩ kiris-neb ne yʋʋrã taoor dãmb pa tũud Biiblã goam ye.” Filiyallã paasame tɩ naoor wʋsgo, ẽndu-rãmbã sã n karem Quel est le but de la vie ? Comment le découvrir ? sebrã sak a 4 soabã sẽn wilgd tũudmã taoor dãmb sẽn bao n na n golem Biiblã goama, la b pʋd n mak a menesgã, lingd-b lame. Berzɩll so-pakd a yembr nong n yeta nebã tɩ b bao n bãng Biiblã, la a paas woto: “Neb wʋsg yãka yam n maan rẽ. Y sã n sak n na n zãms Biiblã ne tõndo, pa rat n yeel tɩ y lebga tõnd tũudmã ned ye. Bũmb ning y sẽn na n bãngã me na n ling-y lame.”
9. Bõe yĩng tɩ baa neb kẽer sã n nan pa rat n bãng Biiblã sẽn yetã bɩ d pa segd n koms raoodo?
9 A Zeova geta ned kam fãa sũuri. (1 Sãm. 16:7; Yel. 21:2) A sõngda sũ-tɩrs rãmbã tɩ b wat tũudum hakɩkã pʋgẽ. (Zã 6:44) Nin-kãensã wʋsg ra zɩ n paam tɩ b wilg-b Wẽnnaam sẽn yaa a soaba, wall b ra pa mi Biiblã ye. Tõnd koe-moonegã kõt-b-la weer tɩ b tõe n “paam fãagr la b bãng sẽn yaa sɩda.” (1 Tɩm. 2:4) Woto yĩnga, baa neb kẽer sã n nan pa rat n bãng Biiblã sẽn yetã, bɩ y ra koms raood ye. Y sã n tara sebr a to wall DVD ne yãmb buudã gomde, y tõe n tall-a lame n sõng ned t’a tʋlg n kelg koɛɛgã n paase. Tarẽ-n-tarẽ, y na n wa tõog n zãms-a-la Biiblã sɩd yetame tɩ bõe? sebrã. Yaa seb-kãng la d tar n zãmsd Biiblã ne nebã n yɩɩda.
[Zĩ-gũbri, seb-neng a 4]
Ned sã n yeel t’a pa tẽed Wẽnnaam, ad y sẽn tõe n maane:
• Sok-y-yã-a: “Yãmb da sɩng n tẽeda woto bɩ?”
• A sã n yaa budist bɩ y tik La paix et le bonheur durables : comment les trouver sebrã neng a 9-12 wã n sõs ne-a.
• Sã n yaa ned sẽn tẽed evolisiõ wã, video la seb-kãensã tõe n sõng-a lame:
Réveillez-vous ! wã sõss nins gom-zug sẽn yaa “ Hasard ou conception ? ” wã.
Les merveilles de la création révèlent la gloire de Dieu video wã.
Une vie pleinement satisfaisante : Comment ? sebrã sak a 4; La vie a-t-elle été créée ? wall Cinq questions à se poser sur l’origine de la vie sebrã.
• Sã n yaa wẽgbã la namsgã n kɩt t’a soabã pa tẽed Wẽnde, seb-kãensã tõe n sõng-a lame:
Y a-t-il un Créateur qui se soucie de vous ? sebrã sak 10.
Wẽnnaam sɩd maanda yɩɩr tõnd yĩng bɩ? sebrã babg a 6 ne Quel est le but de la vie ? Comment le découvrir ? sebrã sak a 6.
• A sã n wa sak n deeg tɩ tõe tɩ Wẽnnaam beeme, bɩ y sɩng Biiblã yetame sebrã zãmsg ne-a. Yɩta sõma tɩ y sɩng ne sak a 2 wã, wall sak a to sẽn zems ne-a.
[Zĩ-gũbri, seb-neng a 5]
Ned sã n yeel t’a pa tẽed Biiblã, ad y sẽn tõe n maane:
• Y tõe n tika La vie : comment est-elle apparue ? Évolution ou création ? sebrã sak 17 la sak 18 n sõs ne-a.
• A sã n yaa ẽndu bɩ y tik Pourquoi adorer Dieu en amour et en vérité ? sebrã n sõs ne-a.
• A sã n yaa zʋɩf bɩ y sõs ne-a Connaîtrons-nous un jour un monde sans guerre ? sebrã neng a 3-11.
• Y sã n dat n wilg ned t’a bãng Biiblã sagls tũub yõodo, video la seb-kãensã tõe n sõng-y lame:
Réveillez-vous ! wã sõss nins gom-zug sẽn yaa “ De l’aide pour les familles ” wã.
La Bible : une force dans votre vie video wã.
Koe-noog sẽn yit Wẽnnaam nengẽ! sebrã zãmsg a 9 ne 11 wã, Un livre pour tous sebrã neng 22-26, n paas Une vie pleinement satisfaisante : Comment ? sebrã sak a 2.
Y sã n seg budist-rãmbã, La voie qui mène à la paix et au bonheur sebrã neng a 3-7 wã tõe n sõng-y lame.
Y sã n seg moeemba, y tõe n tika La Vraie foi — Le chemin qui mène au Bonheur sebrã sak a 3 wã n sõse.
Y sã n moonda zĩig nebã sẽn pa nand Biiblã, yɩta sõma tɩ y ra yãg n wilg tɩ sagls nins y sẽn taasd-bã yita Biiblã pʋgẽ ye. Bas-y tɩ y kaagr a wãn poor bɩ y yaool n wilg-ba.
• Y sã n dat n wilg Biiblã bãngr-goam sẽn pids to-to, ad bũmb nins sẽn tõe n sõng-yã:
La Bible : un récit historique exact, des prophéties dignes de foi video wã.
Un livre pour tous sebrã neng 27-29.
• A soabã sã n wa tar sokr n dat n bãng Biiblã sẽn yet rẽ wɛɛngẽ bɩ y sɩng Biiblã yetame sebrã zug sõsg ne-a.
[Foto seb-neng 6]
Kɛlgdã sã n yeel t’a pa tẽed Wẽnnaam, y tõe n yeela woto:
• “M tõe n bõos n wilg-y-la bũmb ning sẽn kɩt tɩ mam wa kɩs sɩd tɩ naand n be wã bɩ?” Rẽ poor bɩ y sõs ne-a Comment raisonner sebrã neng 72-74. Wall y rɩk sɛk n lebg n tɩ kõ-a sebr y sẽn karem tɩ yɩ-y noogo.
• “Sã n mikame tɩ Wẽnnaam beeme, yãmb nongẽ lame t’a manesem yɩ wãn ne ãdem-biisã?” Kɛlgdb wʋsg leokdame tɩ b ratame t’a nong nebã, n nong tɩrlem, n yaa nimbãan-zoɛta, la a pa bakd ned ye. Sã n yaa rẽ bɩ y lak Biiblã n wilg-a tɩ Wẽnnaam yaa woto bal kɛpɩ. (Y tõe n tika Biiblã yetame sebrã sak a 1 n sɩng sõsg sull a 6 soabã zug n tar n dabda.)
Kɛlgdã sã n yeel tɩ yẽ pa tẽed Biiblã, y tõe n yeela woto:
• “Neb wʋsg me pa tẽed Biiblã ye. Kẽer yetame tɩ Biiblã ne siãnsã goam pa tũud taaba, wall t’a saglsã tũub yaa toogo. Yãmb zoe n karma Biiblã bɩ? [Bas-y t’a leoke. Rẽ poor bɩ y lak Un livre pour tous sebrã neng a 3 wã n wilg-a sɩngr goamã, la y kõ-a sebrã.] Tũudum kẽer sẽn golemd Biiblã goamã kɩtame tɩ wʋsg pa nand-a ye. Y sã n data, nindaare, d tõe n gesa sebrã neng a 4 ne a 5 wã zĩigẽ n yãk makr a ye n sõs a zugu.”
• “Neb wʋsg me n yet tɩ b pa tẽed Biiblã ye. M tõe n bõos n wilg-y-la bũmb m sẽn karem Biiblã pʋgẽ tɩ yɩ-m noog bɩ? [Karm-y Zoob 26:7 wall Ezai 40:22 wã sẽn wilgd tɩ Biiblã zemsa kɛpɩ ne siãns hakɩkã.] Biiblã tara sagls me sẽn nafd zagsã rãmba. Y sã n data, nindaare, m na n wilg-y-la kẽere.”
• “Bark y sẽn wilg y tagsgã. Wẽnnaam sã n kɩt tɩ b gʋls sebr ninsaalbã yĩnga, yãmb tagsdame tɩ sebrã na n goma bõe yelle?” Rẽ poor bɩ y wilg a soabã Biiblã goam sẽn zems ne a leoorã.