Yãmb sogsgã leoore

◼ Tiging ning sẽn moond tõnd sẽn vɩ zĩig ningã pʋgẽ zĩndg yõod la bʋgo?

Yaa ne tigingã maasem la d paamd sagls sẽn kengd tõnd raoodo, sẽn ‘yikd tõnd ratem tɩ d maan nonglem la tʋʋm sõama.’ (Heb. 10:24, 25) Yaa ne tigingã maasem la d bãngd sɩdã la d paamd seglg sõma sẽn na yɩl n pids karen-biisã maaneg tʋʋmde. (Mat. 28:19, 20) Tigingã leb n kengda tõnd raood tɩ d tõog n yals kãn-kãe makr taoor ne kɩs-sɩda, la d tar yel-gɛtb sẽn tar nonglem sẽn sõngd tõnd tɩ d tõog n mao ne zu-loeesã la ne yɩɩrã toɛy-toɛyã sẽn tar paasgã. Vẽenega, tigingã sɩd sõngda sõma tɩ d yalsd kãn-kãe tẽebã wɛɛngẽ. La rẽ yĩnga, tiging ning sẽn moond tõnd sẽn vɩ zĩig ningã pʋgẽ zĩndg tara yõod bɩ?

Neba yɛl ka taab ye. Nina tʋʋma, a kẽed-n-taag sẽn ka be sɩdã pʋgẽ, bɩ bõn-zoambdg sẽn na n paam n wa tigissẽ wã kaalem yĩng tõe n kɩtame t’a yãk tiging ning a sẽn dat n zĩndẽ. Baasg zãnga yaa vẽeneg tɩ ned sã n be tiging ning sẽn moond a sẽn vɩẽ wã, yõod wʋsg n be tẽebã la zĩis a taab wɛɛngẽ. Yel-pakr wakate, kãsem dãmbã tõe n yãa koe-moondba fãa tao-tao. Yãmb sogsgã leoor nins sẽn loog-bã wilga nafa wʋsg nins rẽ sẽn tarã.—Yʋʋmd 1991 sig-noy kiuugu, yʋʋmd 1976 sa-sik kiuugu, tɩ b tõe n paam-b Watchtower Library—1999 Edition sẽn be CD-ROM pʋgẽ ne farende.

Naoor wʋsgo zemsame n yɩɩd tɩ d kẽngd tigissã zĩig ning sẽn pẽ tõnd zakã n yɩɩda, tɩ rẽ na n sõnga tõnd tɩ d tat pĩnda, n tõogd n sõsd ne neb a taabã la d get tʋʋm kẽer yelle, n lagemd ne nebã n yɩɩnd sɩngr yɩɩllã la d naagd pʋʋsgã pʋgẽ. Neb sẽn wilg raab ne sɩdã paalem sã n be sakã pʋgẽ, naoor wʋsgo yaa nana n yɩɩd ne-d tɩ d kẽng b nengẽ, n maan Biibl zãmsg ne-ba, la d tees-b tigiss zĩis nins sẽn zems ne-b n yɩɩdã.

D kɩsa sɩd tɩ zak soben dãmbã na n tagsa yel-kãngã zug neere, n mag yɛl nins sẽn kẽed sʋkã n bãng bũmb ning sẽn na n sõng n wa ne b zakã neer n yɩɩd tẽebã la yĩngã yɛl wɛɛngẽ wã.—1 Tɩm. 5:8.