D sẽn segd n tall manesem ning ne ned b sẽn yiis tigingã pʋgẽ

Tõnd ned bɩ d zoa sã n maan yel-wẽnd n pa tek yam n kos sugr tɩ b yiis-a tigingã pʋgẽ, sɩd sãamda d sũur wʋsgo. Tõnd sẽn na n tũ Biiblã noy yel-kãngã wɛɛngẽ wã na n wilga d sã n sɩd nonga Wẽnnaam, la d sã n sakd-a lame.a Bɩ d leok sogsg kẽer yiisgã wɛɛngẽ.

Manesem bʋg la d segd n tall ne ned b sẽn yiis tigingã pʋgẽ? Biiblã yeta woto: “[Bɩ] y ra maan tũud-n-taar ne ned sẽn boond a meng tɩ ba-biig n yaool n yaa nin-yoaada walla zoe-bõn soaba walla bõn-naands pʋʋsda walla nin-tʋʋsa walla rã-yũuda walla fãad ye, hal tɩ yãmb da sak n dɩ ne ned a woto ye.” (1 Korẽnt dãmba 5:11) Biiblã paasame tɩ: “Ned ninga fãa sẽn bʋdgd n ka paad Kirist zãmsg pʋgẽ, . . . bɩ y ra reeg yẽnda yãmb yiri la y ra pʋʋs yẽnda ne kãab sõma ye. Tɩ bõe, ned ninga sẽn pʋʋs yẽnda ne kãab sõma, a lagemda ne yẽnda a tʋʋm wẽnsã pʋgẽ.” (2 Zã 9-11) Tũudmã wɛɛngẽ, d pa tar lagem-n-taar ne neb nins b sẽn yiis tigingã pʋgẽ wã ye. Zood me pa le be d sʋk ye. Yʋʋmd 1981, yʋʋm-sar kiuug rasem 15 Gũusg Gasgã seb-neng 23 yeela woto: “Tõnd fãa miime tɩ pʋʋsem tõe n yɩɩ sõsg sɩngre, la neb sã n sõsd ne taaba, b tõe n wa lebga zo-rãmba. Tõnd na sak n sɩng bũmb sẽn na n kɩt tɩ d wa lebg ned b sẽn yiis zoa sɩda?”

Yaa tɩlae tɩ d lak d mens ne-b fasɩ bɩ? N-ye! Bʋʋm wʋsg yĩng n kɩt tɩ d segd n lak d mens fasɩ ne-ba. Pipi, d wilgdame tɩ d sakda Wẽnnaam la d tũud a Gomdã sẽn yetã. Tõnd pa segd n sak a Zeova sẽn wat n yaa nana bal ye. Baa sã n wa yaa toog me d segd n sak-a lame. Tõnd sẽn nong Wẽnnaamã yĩng n kɩt tɩ d sakd a noyã, la d miime t’a yaa tɩrlem la nonglem soaba, la t’a noyã fãa yaa tõnd nafr yĩnga. (Ezai 48:17; 1 Zã 5:3) Yiib-n-soaba, d sã n lak n bas yel-wẽn-maand sẽn pa rat n tek yam n kos sugri, d kogenda d mense, d kogenda tigingã neb fãa, la d sõngdame n kɩtdẽ me tɩ tigingã yʋʋr da sãam ye. (1 Korẽnt dãmba 5:6, 7) Tãab-n-soaba, tõnd sã n sak Biiblã noor n maan woto, tõe n sõnga ned ning b sẽn yiisã. D sã n teel sard ning bʋ-kaoor sullã sẽn dɩkã, tõe n kɩtame tɩ yel-wẽn-maandã tags sõma, tɩ baa a sẽn da pa sak kãsem dãmbã sõngrã, bɩ a toeem yam masã. Neb nins a sẽn nongã sẽn lak n bas-a wã tõe n kɩtame t’a zĩnd n tagse, n bãng t’a sẽn maanã sɩd yaa wẽnga, n tek yam n maan a sẽn segd n maaneg fãa n lebg n wa a Zeova nengẽ.—Luk 15:17.

B sã n yiis tõnd zak neda d maanda wãna? Sã n wa yaa woto, rogmã tõe n kɩtame tɩ yellã sɩd lebg toog ne-do. D segd n talla manesem bʋg ne d ned b sẽn yiisi? D pa tõe n sõdg yɛlã fãa seb-kãngã pʋgẽ ye. La d na n goma yɛl a yiib yell bala.

Wakat ninga, ned ning b sẽn yiisã tõe n yaa d zakã ned tã-tã wala d paga, d sɩda, d biiga, d yao bɩ d kẽema. Yiisgã sẽn pa yẽesd rogmã yĩnga, d tõe n ket n maanda yɛl kẽer ne taaba. La ne a manesmã a wilgame t’a sãama zems-n-taar ning Wẽnnaamã tũub sẽn da kɩt tɩ be yẽ ne a zakã rãmb sʋkã. Rẽnd zakã neb nins sẽn ket n sakd a Zeova wã pa segd n sak t’a naag-b n maan Wẽnnaam tũudmã yɛl ye. Wala makre, ned ning b sẽn yiisã pa segd n naag zakã rãmb n maan Biibl zãmsg ye. La a sã n yaa biig yʋʋm sẽn ket n paoodẽ, a roagdbã segd n ket n sagend-a lame la b kibind-a. Rẽ n so tɩ roagdbã tõe n zãms Biiblã ne b biigã.b—Yelbũna 6:20-22; 29:17.

Ned ning b sẽn yiisã tõeeme n yaa d roagda, la a pa be zak a ye ne tõnd ye. Baa ne sẽn yaa tɩlae wakat ning tɩ d naag taab n welg d zakã yellã, d lagem-n-taarã segd n talla koaka. D pa segd n bao bʋʋm n na n maan tũud-n-taar ne d ned b sẽn yiis tigingã pʋgẽ, sẽn pa be zak a ye ne-d ye. D sẽn dat n kell n sak a Zeova la a siglgã yĩnga, d na n tũu Biiblã sẽn yet bũmb ning neb nins b sẽn yiisã wɛɛngẽ wã. Woto tõe n sõnga yel-wẽn-maandã t’a sak kiblgã tɩ naf-a.c—Hebre dãmba 12:11.