Ġona*
1 U l-kelma taʼ Ġeħova bdiet ġejja għand Ġona+ bin Amittaj, tgħid: 2 “Qum, mur Ninwe+ l-belt il-kbira, u xandar kontriha li l-ħażen tagħhom telaʼ sa quddiemi.”+
3 U Ġona qam u ħarab minn quddiem Ġeħova+ lejn Tarsis;+ u niżel lejn Ġaffa+ u sab bastiment sejjer Tarsis. Għalhekk, ħallas il-passaġġ u telaʼ fuqu, sabiex imur man-nies taʼ fuq il-bastiment lejn Tarsis u jaħrab minn quddiem Ġeħova.
4 U Ġeħova tefaʼ riħ qawwi fuq il-baħar,+ u qamet tempesta kbira+ fuq il-baħar; u l-bastiment kien għoddu tfarrak. 5 U l-baħħara bdew jibżgħu u bdew isejħu għall-għajnuna, kull wieħed lill-alla tiegħu.+ U bdew iwaddbu l-baħar l-affarijiet li kienu fuq il-bastiment, sabiex iħaffuh.+ Imma Ġona kien niżel u daħal ġewwanett taħt il-gverta tal-bastiment, u hemmhekk imtedd u raqad fil-fond.+ 6 Sa fl-aħħar il-kaptan tal-bastiment mar ħdejh u qallu: “Int kif irqadt? Qum, sejjaħ lill-alla tiegħek!+ Forsi l-Alla l-veru juri li jimpurtah minna, u ma ngħibux.”+
7 Imbagħad bdew jgħidu lil xulxin: “Ejjew ħa nitfgħu x-xorti,+ sabiex insiru nafu minħabba min għandna dan il-gwaj.”+ U baqgħu jitfgħu x-xorti, u fl-aħħarnett ix-xorti waqgħet fuq Ġona.+ 8 Għalhekk, huma qalulu: “Għidilna, jekk jogħġbok, minħabba min għandna dan il-gwaj?+ X’inhu xogħlok, u minfejn ġej? Liema hu pajjiżek, u minn liema poplu int?”
9 Għal dan, qalilhom: “Jien Ebrew,+ u nibżaʼ+ minn Ġeħova l-Alla tas-smewwiet,+ li għamel il-baħar u l-art niexfa.”+
10 U l-irġiel bdew jibżgħu ħafna, u qalulu: “X’għamilt?”+ Għax l-irġiel saru jafu, billi kien qalilhom hu, li kien qed jaħrab minn quddiem Ġeħova. 11 Imbagħad qalulu: “X’għandna nagħmlulek,+ sabiex il-baħar jikkalmalna?” Għax iktar ma jmur, il-baħar kien qed jitqawwa. 12 Għaldaqstant qalilhom: “Erfgħuni u waddbuni l-baħar, u l-baħar jikkalmalkom; għax naf li minħabba fija ġiet fuqkom din it-tempesta kbira.”+ 13 Imma l-irġiel ipprovaw jgħaddu mit-tempesta, sabiex jieħdu l-bastiment lura lejn l-art niexfa; imma ma rnexxilhomx, għax il-baħar baqaʼ jitqawwa kontrihom.+
14 U bdew isejħu lil Ġeħova u jgħidu:+ “O Ġeħova, jekk jogħġbok, ħa ma ngħibux minħabba dan ir-raġel! U tqigħedx fuqna demm innoċenti,+ ladarba int innifsek, O Ġeħova, għamilt dak li għoġbok tagħmel!”+ 15 Imbagħad refgħu lil Ġona u xeħtuh il-baħar; u l-baħar beda jbatti mill-furja tiegħu.+ 16 Għalhekk, l-irġiel bdew jibżgħu ħafna minn Ġeħova,+ u offrew sagrifiċċju lil Ġeħova+ u għamlu xi wegħdi.+
17 Issa Ġeħova bagħat ħuta kbira biex tiblaʼ lil Ġona,+ u Ġona baqaʼ fil-ġewwieni tal-ħuta tlett ijiem u tliet iljieli.+
2 Imbagħad Ġona talab lil Ġeħova Alla tiegħu mill-ġewwieni tal-ħuta+ 2 u qal:
“Fin-niket tiegħi sejjaħt lil Ġeħova,+ u hu wiġibni.+
Minn żaqq il-Qabar* għajjatt għall-għajnuna.+
Int smajt leħni.+
3 Meta tfajtni fl-abbissi, fil-qalba taʼ baħar miftuħ,+
Imbagħad dawruni l-kurrenti.
Il-ħalel u l-imwieġ kollha tiegħek—minn fuqi għaddew.+
4 U min-naħa tiegħi għedt, ‘Jien tkeċċejt minn quddiem għajnejk!+
Kif qatt nistaʼ nerġaʼ nħares lejn it-tempju qaddis tiegħek?’+
5 L-ilmijiet tant dawruni li ruħi kważi għerqet;+ l-ilmijiet fondi bdew jingħalqu fuqi.
Il-ħaxix tkebbeb maʼ rasi.
6 F’qiegħ il-muntanji nżilt.
L-istaneg taʼ l-art ngħalqu fuqi għal żmien indefinit.*
Imma int tellajtli ħajti mill-ħofra, O Ġeħova Alla tiegħi.+
7 Meta ruħi nfniet fija,+ kien f’Ġeħova li jien ftakart.+
Imbagħad it-talba tiegħi ġiet għandek, fit-tempju qaddis tiegħek.+
8 Dawk li jagħtu kas l-idoli foloz jitilqu s-sors tagħhom taʼ qalb tajba bl-imħabba.+
9 Imma ngħid għalija, b’leħen taʼ radd il-ħajr se noffrilek sagrifiċċji.+
Dak li wegħedt, se rroddu.+ Is-salvazzjoni hi taʼ Ġeħova.”+
10 Wara xi żmien, Ġeħova kkmanda lill-ħuta, u din qalgħet lil Ġona għal fuq l-art niexfa.+
3 Imbagħad il-kelma taʼ Ġeħova ġiet għand Ġona għat-tieni darba, tgħid:+ 2 “Qum, mur Ninwe l-belt il-kbira, u xandrilha+ dan li qed ngħidlek.”
3 Għalhekk, Ġona qam u mar Ninwe fi qbil mal-kelma taʼ Ġeħova.+ Issa Ninwe kienet belt kbira anki f’għajnejn Alla,+ b’distanza taʼ tlett ijiem mixi min-naħa għall-oħra. 4 U Ġona daħal fil-belt u meta kien mexa distanza taʼ jum qabad ixandar u jgħid: “Erbgħin jum ieħor biss, u Ninwe taqaʼ.”+
5 U n-nies taʼ Ninwe bdew ipoġġu l-fidi f’Alla,+ u ddikjaraw sawma u libsu l-ilbies taʼ l-ixkora,+ mill-akbar sa l-iżgħar wieħed minnhom. 6 Meta l-kelma waslet għand is-sultan taʼ Ninwe,+ dan qam minn fuq it-tron tiegħu u neħħa l-libsa uffiċjali tiegħu minn fuqu u tgħatta bl-ilbies taʼ l-ixkora u poġġa fuq l-irmied.+ 7 Iktar minn hekk, ħareġ proklama, u ordna li tixxandar f’Ninwe, skond id-digriet tas-sultan u tal-kbarat tiegħu, li tgħid:
“Ebda bniedem u ebda annimal domestiku, ebda merħla baqar u ebda merħla nagħaġ m’għandha dduq xi ħaġa. Ħadd minnhom m’għandu jiekol. Lanqas għandhom jixorbu ilma.+ 8 U ħa jitgħattew bl-ixkora, il-bniedem u l-annimal domestiku; u ħa jsejħu lil Alla b’saħħa u jerġgħu lura,+ kull wieħed minn triqtu l-ħażina u mill-vjolenza taʼ idejhom. 9 Min jaf jekk l-Alla l-veru jaġixxix differenti u jiddispjaċih+ u jreġġaʼ lura r-rabja taħraq tiegħu, u b’hekk ma ngħibux?”+
10 U l-Alla l-veru ra l-għemejjel tagħhom,+ li kienu daru lura minn triqithom il-ħażina;+ u b’hekk l-Alla l-veru ddispjaċieh+ mill-gwaj li kien qal li se jġib fuqhom; u ma ġabux.+
4 Iżda dan xejn m’għoġbu lil Ġona,+ tant li għadab għall-aħħar. 2 Għaldaqstant talab lil Ġeħova u qal: “O Ġeħova, mhux għalhekk inkwetajt jien meta kont f’arti? Kien għalhekk li għall-ewwel ħrabt lejn Tarsis;+ għax kont naf li int Alla grazzjuż u ħanin,+ bil-mod biex tirrabja u għani fil-qalb tajba bl-imħabba,+ u li jiddispjaċik mill-gwaj.+ 3 U issa, O Ġeħova, jekk jogħġbok, ħudli ruħi,+ għax aħjar immut milli ngħix.”+
4 Iżda Ġeħova qallu: “Għandek għalfejn tagħdab daqshekk?”+
5 Imbagħad Ġona ħareġ mill-belt u qagħad bil-qiegħda lejn il-lvant tal-belt; u hemmhekk għamel għarix għalih biex ipoġġi taħtu għad-dell+ sakemm jara x’kien se jiġri mill-belt.+ 6 Għaldaqstant, Alla Ġeħova għamel li titlaʼ siġra tal-qargħa bomblija għal fuq Ġona, ħalli tagħmillu d-dell fuq rasu u teħilsu mill-istat miżerabbli tiegħu.+ U Ġona feraħ ferm bis-siġra.
7 Imma meta beda jżernaq l-għada, l-Alla l-veru bagħat dudu+ biex jolqot lis-siġra; u din nixfet.+ 8 U ġara li, malli x-xemx bdiet tiddi, Alla bagħat ukoll riħ jaħraq mil-lvant,+ u x-xemx baqgħet tisreġ fuq ras Ġona, tant li beda jħossu ħażin;+ u baqaʼ jitlob li ruħu tmut, u kemm-il darba qal: “Aħjar immut milli ngħix.”+
9 U Alla qal lil Ġona: “Għandek għalfejn tagħdab daqshekk minħabba s-siġra?”+
Għal dan, hu qal: “Għandi għalfejn nagħdab daqshekk, tant li rrid immut.” 10 Imma Ġeħova qallu: “Int, min-naħa tiegħek, iddispjaċiek għas-siġra, li ma kontx int li tħabatt għaliha jew kabbartha u li nibtet u għabet f’lejl wieħed. 11 Allura jien, min-naħa tiegħi, m’għandux jiddispjaċini għal Ninwe l-belt il-kbira,+ li fiha hemm iktar minn mija u għoxrin elf bniedem li lanqas biss jafu d-differenza bejn idhom il-leminija u x-xellugija, minbarra li hemm ħafna annimali domestiċi?”+