It-​Tieni lill-​Korintin

1 Pawlu, appostlu+ taʼ Kristu Ġesù bir-​rieda t’Alla, u Timotju,+ ħuna, lill-​kongregazzjoni t’Alla li hemm f’Korintu, flimkien mal-​qaddisin+ kollha li hemm fl-​Akaja* kollha:+

2 Qalb tajba mhix mistħoqqa u paċi lilkom mingħand Alla Missierna u l-​Mulej Ġesù Kristu.+

3 Ikun imbierek Alla u Missier+ il-​Mulej tagħna Ġesù Kristu, il-​Missier taʼ kull ħniena tenera+ u l-​Alla taʼ kull faraġ,+ 4 li jfarraġna fit-​tribulazzjoni kollha tagħna,+ biex inkunu nistgħu nfarrġu+ lil dawk li jkunu f’kull xorta taʼ tribulazzjoni bil-​faraġ li aħna stess qed niġu mfarrġin bih minn Alla.+ 5 Għax bħalma s-​sofferenzi għall-​Kristu joktru fina,+ hekk ukoll, permezz tal-​Kristu, joktor il-​faraġ li niksbu.+ 6 Issa jekk għandna t-​tribulazzjoni, dan hu għall-​faraġ u s-​salvazzjoni tagħkom;+ jew jekk qed niġu mfarrġin, dan hu għall-​faraġ tagħkom li jaħdem biex jgħinkom tissaportu l-​istess sofferenzi li nsofru aħna wkoll.+ 7 U għalhekk it-​tama tagħna għalikom hi qawwija, għax nafu li bħalma intom qed tieħdu sehem fis-​sofferenzi, bl-​istess mod se tieħdu sehem ukoll fil-​faraġ.+

8 Għax, ħuti, ma nixtiqukomx ma tkunux tafu bit-​tribulazzjoni li ġarrabna fid-​distrett taʼ l-​Asja:+ kif konna taħt pressjoni estrema iktar milli nifilħu, u b’hekk lanqas saħansitra minn ħajjitna ma konna ċerti.+ 9 Fil-fatt, ġo fina ħassejna li konna ngħatajna s-​sentenza tal-​mewt. Dan kien biex il-​fiduċja tagħna+ ma tkunx fina nfusna, imma fl-​Alla li jqajjem il-​mejtin.+ 10 Minn ħaġa daqstant kbira bħalma hi l-​mewt ħelisna u għad jeħlisna;+ u fih nittamaw li wkoll ikompli jeħlisna.+ 11 Intom ukoll tistgħu tgħinu billi titolbu għalina bil-​ħerqa,+ sabiex ħafna jroddu ħajr+ għan-​nom tagħna għal dak li jingħatalna b’qalb tajba bis-​saħħa tat-​talb taʼ ħafna wċuħ.+

12 Għax b’dan niftaħru, u l-​kuxjenza tagħna dwar dan tixhed,+ li fid-​dinja, u speċjalment magħkom, ġibna ruħna bil-​qdusija u s-​sinċerità li ġejja minn Alla, mhux bl-​għerf+ tal-​laħam imma bil-​qalb tajba mhix mistħoqqa t’Alla. 13 Għax, tabilħaqq, m’aħna niktbulkom xejn ħlief affarijiet li tafuhom sew jew li tagħrfuhom; u li nittama li tkomplu tagħrfuhom sat-​tmiem,+ 14 bħalma għaraftu wkoll, sa ċertu punt, li għandkom għalfejn tiftaħru bina, bħalma aħna wkoll ikollna għalfejn niftaħru+ bikom f’jum il-​Mulej tagħna Ġesù.+

15 Għalhekk, b’din il-​fiduċja, qabel kont bi ħsiebni niġi għandkom,+ biex tkunu tistgħu tifirħu għat-​tieni+ darba, 16 u wara waqfa qasira magħkom, immur il-​Maċedonja,*+ u nerġaʼ niġi għandkom+ mill-​Maċedonja u tiġu+ biċċa mit-​triq miegħi lejn il-​Lhudija. 17 Meta kelli dan il-​ħsieb, ma qgħadtx nieħu l-​affarijiet biċ-​ċajt,+ hux hekk? Jew dak li nkun bi ħsiebni nagħmel, inkun bi ħsiebni nagħmlu skond il-​laħam,+ biex inkun nistaʼ ngħid “Iva, Iva” u “Le, Le”?+ 18 Imma tistgħu tafdaw f’Alla li l-​kliem li għednielkom m’huwiex Iva u fl-​istess ħin Le. 19 Għax l-​Iben t’Alla,+ Kristu Ġesù, li ġie pridkat fostkom permezz tagħna, jiġifieri, permezz tiegħi u taʼ Silvanu* u taʼ Timotju,+ ma sarx Iva u fl-​istess ħin Le, imma l-​Iva sar Iva fil-​każ tiegħu.+ 20 Għax il-​wegħdi+ kollha t’Alla, huma kemm huma, saru Iva permezz tiegħu.+ Għalhekk ukoll permezz tiegħu ngħidu “Amen”+ lil Alla biex nagħtuh glorja. 21 Imma hu Alla li jiggarantixxi li intom u aħna taʼ Kristu; u kien hu li dilikna.+ 22 Immarkana wkoll bis-​siġill tiegħu+ u tana fi qlubna l-​garanzija+ taʼ dak li għandu jiġi, jiġifieri, l-​ispirtu.+

23 Issa nsejjaħ lil Alla bħala xhud+ kontra ruħi stess li għadni ma ġejtx Korintu sabiex neħlishielkom.+ 24 Mhux għax aħna s-​sidien+ tal-​fidi tagħkom, imma aħna ħaddiema sħabkom+ għall-​ferħ tagħkom, għax intom iżżommu weqfin+ bil-​fidi+ tagħkom.

2 Għax ngħid għalija hekk iddeċidejt, li ma nerġax niġi għandkom b’qalbi sewda.+ 2 Għax jekk insewdilkom qalbkom,+ min ikun hemm biex iferraħni ħlief dak li nkun sewwidtlu qalbu? 3 U għalhekk ktibt dan, biex meta niġi ma nsewwidx qalbi+ minħabba dawk li jmissni nifraħ bihom;+ għax għandi fiduċja+ fikom ilkoll li l-​ferħ li għandi hu tagħkom ilkoll. 4 Għax b’ħafna tribulazzjoni u diqa taʼ qalb ktibtilkom b’ħafna dmugħ,+ mhux biex insewdilkom qalbkom,+ imma biex tkunu tafu l-​imħabba li għandi speċjalment għalikom.

5 Issa jekk xi ħadd ġab swied il-​qalb,+ ma ġabux lili, imma lilkom ilkoll sa ċertu punt—biex ma nkunx aħrax wisq f’dak li ngħid. 6 Din iċ-​ċanfira+ mogħtija mill-​maġġuranza hi biżżejjed għal bniedem bħal dan, 7 u għalhekk, għall-​kuntrarju, issa għandkom taħfrulu+ b’qalb tajba u tfarrġuh, li ma jmurx dan jinbelaʼ għax ikun sewwed qalbu żżejjed.+ 8 Għaldaqstant inħeġġiġkom biex terġgħu turuh imħabbitkom.+ 9 Għax għalhekk ukoll qed niktbilkom, biex inkun ċert jekk intomx ubbidjenti f’kollox.+ 10 Kulma taħfru b’qalb tajba lil xi ħadd, jien naħfirhulu wkoll.+ Fil-​fatt, ngħid għalija, kulma ħfirt b’qalb tajba, jekk ħfirt xi ħaġa, kien minħabba fikom quddiem Kristu; 11 biex Satana ma jegħlibniex,+ għax il-​pjanijiet tiegħu nafuhom.+

12 Issa meta wasalt Troas+ biex inxandar l-​aħbar tajba dwar il-​Kristu, u nfetaħli bieb fil-​Mulej,+ 13 ma kellix serħan fl-​ispirtu tiegħi peress li ma sibtx lil ħija Titu,+ imma sellimtilhom u tlaqt il-​Maċedonja.+

14 Imma ħajr lil Alla li dejjem imexxina+ f’parata trijonfali fi sħubija+ mal-​Kristu u jagħmel ir-​riħa taʼ l-​għarfien dwaru tinxtamm f’kull post permezz tagħna!+ 15 Għax għal Alla aħna riħa tfuħ+ taʼ Kristu fost dawk li qed jiġu salvati u fost dawk li qed jinqerdu;+ 16 għal dawn taʼ l-​aħħar riħa li tiġi mill-​mewt għall-​mewt,+ għal dawk taʼ l-​ewwel riħa li tiġi mill-​ħajja għall-​ħajja. U min hu kwalifikat biżżejjed għal dan?+ 17 Aħna; għax ma nagħmlux negozju mill-​kelma t’Alla+ bħalma jagħmlu ħafna,+ imma qed nitkellmu bis-​sinċerità, iva, bħala nies mibgħutin minn Alla, quddiem Alla, u fi sħubija maʼ Kristu.+

3 Qed nerġgħu nibdew nirrikkmandaw lilna nfusna?+ Jew forsi, bħal xi wħud, neħtieġu ittri+ taʼ rakkomandazzjoni għalikom jew mingħandkom? 2 Intom stess l-​ittra tagħna,+ minquxa fi qlubna u magħrufa u tinqara mill-​bnedmin kollha.+ 3 Għax jidher ċar li intom ittra taʼ Kristu mingħandna bħala ministri,+ mhux miktuba bil-​linka imma bl-​ispirtu+ t’Alla ħaj, mhux fuq twavel tal-​ġebel,+ imma fuq twavel tal-​laħam, fil-​qlub.+

4 Issa permezz tal-​Kristu għandna din ix-​xorta taʼ fiduċja+ f’Alla. 5 Mhux għax aħna minna nfusna kwalifikati biżżejjed biex inqisu li xi ħaġa ġejja minna stess,+ imma l-​fatt li aħna kwalifikati biżżejjed ġej minn Alla,+ 6 li kkwalifikana biżżejjed biex inkunu ministri taʼ patt ġdid,+ mhux taʼ liġi miktuba,+ imma taʼ l-​ispirtu;+ għax il-​liġi miktuba tikkundanna għall-​mewt,+ imma l-​ispirtu jagħti l-​ħajja.+

7 Iktar minn hekk, jekk il-​liġi li ġġib il-​mewt+ u li tnaqqxet b’ittri fil-​ġebel+ ġiet bi glorja,+ tant li wlied Israel ma setgħux iħarsu fiss lejn wiċċ Mosè minħabba l-​glorja taʼ wiċċu,+ glorja li kellha tinġieb fix-​xejn, 8 għala m’għandux l-​amministrar taʼ l-​ispirtu+ jkun ferm iktar bil-​glorja?+ 9 Għax jekk il-​liġi li tamministra l-​kundanna+ kienet glorjuża,+ kemm iktar joktor bil-​glorja+ l-​amministrar tal-​ġustizzja!+ 10 Fil-fatt, anki dak li darba ntgħamel glorjuż tneżżaʼ mill-​glorja f’dan ir-​rigward,+ minħabba l-​glorja li tisbqu.+ 11 Għax jekk dak li kellu jinġieb fix-​xejn twassal bil-​glorja,+ kemm iktar kellu jkun bil-​glorja dak li jibqaʼ!+

12 Għalhekk, billi għandna tama bħal din,+ qed naġixxu b’ħafna libertà tal-​kelma, 13 u m’aħniex nagħmlu bħal meta Mosè kien ipoġġi velu+ fuq wiċċu, biex ulied Israel ma jħarsux fiss lejn it-​tmiem+ taʼ dak li kellu jinġieb fix-​xejn. 14 Imma l-​qawwa mentali tagħhom kienet imdallma.+ Għax sal-​ġurnata taʼ llum l-​istess velu jibqaʼ mniżżel meta jinqara l-​patt il-​qadim,+ għax dan jinġieb fix-​xejn permezz taʼ Kristu.+ 15 Fil-fatt, sa llum, kulmeta jinqara Mosè,+ ikollhom velu fuq qlubhom.+ 16 Imma meta jduru lejn Ġeħova, il-​velu jitneħħa.+ 17 Issa Ġeħova hu l-​Ispirtu;+ u fejn hemm l-​ispirtu+ taʼ Ġeħova,+ hemm il-​libertà.+ 18 U lkoll kemm aħna,+ waqt li b’wiċċna mingħajr velu nirriflettu bħall-​mirja l-​glorja taʼ Ġeħova,+ nitbiddlu+ fl-​istess xbieha+ minn glorja għal glorja akbar,+ eżatt bħalma jagħmilna Ġeħova,+ l-​Ispirtu.

4 Għalhekk, ladarba għandna dan il-​ministeru+ skond il-​ħniena li ntweriet magħna,+ ma naqtgħux qalbna; 2 imma issa li warrabna kulma jsir minn taħt li hu taʼ mistħija,+ ma nimxux bil-​makakkerija, lanqas inniġġsu l-​kelma t’Alla,+ imma billi nuru l-​verità, quddiem Alla aħna nsiru eżempju tajjeb għall-​kuxjenza taʼ kull bniedem.+ 3 Issa, jekk l-​aħbar tajba li nxandru hi tassew moħbija b’velu, hi moħbija għal dawk li qed jinqerdu,+ 4 li fosthom l-​alla taʼ din is-​sistema+ għema l-​imħuħ taʼ dawk li ma jemmnux,+ biex ma jarawx jiddi+ d-​dawl+ taʼ l-​aħbar tajba+ glorjuża dwar il-​Kristu, li hu x-​xbieha+ t’Alla. 5 Għax m’aħniex nippridkaw lilna nfusna imma lil Kristu Ġesù bħala l-​Mulej,+ u lilna nfusna bħala l-​ilsiera tagħkom+ għal Ġesù. 6 Għax kien Alla li qal: “Ħa jiddi d-​dawl mid-​dlam,”+ u idda fi qlubna biex idawwalhom+ bl-​għarfien glorjuż+ dwar Alla permezz taʼ wiċċ Kristu.+

7 Madankollu, għandna dan it-​teżor+ f’reċipjenti+ tal-​fuħħar,+ sabiex il-​qawwa+ iktar min-​normal tkun t’Alla+ u mhux minna nfusna.+ 8 Aħna magħfusin b’kull mod,+ imma mhux marsusin li ma nistgħux niċċaqalqu; mifxulin, imma mhux li m’għandniex assolutament minfejn noħorġu;+ 9 persegwitati, imma mhux abbandunati;+ mitfugħin maʼ l-​art,+ imma mhux meqrudin.+ 10 Dejjem u kullimkien nissaportu f’ġisimna t-​trattament tal-​mewt li ngħata lil Ġesù,+ sabiex il-​ħajja taʼ Ġesù tkun tidher ukoll f’ġisimna.+ 11 Għax aħna l-​ħajjin dejjem qed ninġiebu wiċċ imbwiċċ mal-​mewt+ għal Ġesù, sabiex il-​ħajja taʼ Ġesù tkun tidher ukoll fil-​laħam mortali tagħna.+ 12 Għaldaqstant, il-​mewt qed taħdem fina, imma fikom qed taħdem il-​ħajja.+

13 Issa minħabba li għandna l-​istess spirtu taʼ fidi bħal dak li dwaru hemm miktub: “Jien eżerċitajt il-​fidi, u għalhekk nitkellem,”+ aħna wkoll neżerċitaw il-​fidi, u għalhekk nitkellmu, 14 għax nafu li dak li qajjem lil Ġesù jqajjem lilna wkoll flimkien maʼ Ġesù u jippreżentana flimkien magħkom.+ 15 Għax kollox hu għalikom,+ sabiex il-​qalb tajba mhix mistħoqqa li ntweriet bl-​abbundanza tkompli toktor minħabba r-​radd il-​ħajr taʼ ħafna oħrajn għall-​glorja t’Alla.+

16 Għalhekk, ma naqtgħux qalbna, imma anki jekk il-​bniedem li aħna minn barra qed jispiċċa, żgur li l-​bniedem li aħna minn ġewwa+ qed jiġġedded minn jum għall-​ieħor. 17 Għax għalkemm it-​tribulazzjoni hi mumentanja+ u ħafifa, iġġibilna glorja taʼ kobor bla qjies li hi għal dejjem;+ 18 waqt li ma nżommux għajnejna fuq l-​affarijiet li jidhru, imma fuq dawk li ma jidhrux.+ Għax dawk li jidhru huma temporanji,+ imma dawk li ma jidhrux huma għal dejjem.+

5 Aħna nafu li jekk tiġġarraf+ id-​dar tagħna fuq l-​art,+ din it-​tinda,+ se jkollna bini mingħand Alla, dar li mhix magħmula bl-​idejn,+ għal dejjem+ fis-​smewwiet. 2 Għax f’din id-​dar fejn ngħixu aħna tabilħaqq nokorbu,+ peress li nixtiequ bil-​ħeġġa li nilbsu dik li għandna mis-​sema,+ 3 u b’hekk, billi nkunu lbisnieha tassew, ma ninstabux għarwenin.+ 4 Fil-fatt, aħna li qegħdin f’din it-​tinda nokorbu għax imtaqqlin; mhux għax irridu ninżgħuha, imma għax irridu nilbsu l-​oħra,+ biex dak li hu mortali jinbelaʼ mill-​ħajja.+ 5 Issa dak li ħejjiena għal dan hu Alla,+ li tana l-​garanzija+ taʼ dak li għandu jiġi, jiġifieri, l-​ispirtu.+

6 Aħna għalhekk dejjem mimlijin kuraġġ u nafu li dment li għandna darna fil-​ġisem m’aħniex preżenti mal-​Mulej,+ 7 għax aħna nimxu bil-​fidi, mhux b’dak li jaraw għajnejna.+ 8 Imma aħna mimlijin kuraġġ u ninsabu kuntenti ferm li ma nibqgħux preżenti fil-​ġisem u mmorru noqogħdu mal-​Mulej.+ 9 Għalhekk, qed nagħmluha wkoll il-​mira tagħna li, sew jekk noqogħdu miegħu u sew jekk m’aħniex preżenti miegħu,+ inkunu aċċettabbli għalih.+ 10 Għax ilkoll irridu nidhru quddiem it-​tron tal-​ġudizzju tal-​Kristu,+ biex kull wieħed jieħu ħlasu għal dak li għamel permezz tal-​ġisem, skond dak li jkun ipprattika, sew jekk tajjeb u sew jekk ħażin.+

11 Għalhekk, peress li nafu x’inhu l-​biżaʼ+ tal-​Mulej, nibqgħu nipperswadu+ lill-​bnedmin, imma dak li aħna jidher ċar għal Alla. Madankollu, nittama li dak li aħna jidher ċar ukoll għall-​kuxjenzi tagħkom.+ 12 M’aħniex qed nerġgħu nirrikkmandaw+ lilna nfusna lilkom, imma qed nagħtukom raġuni biex tiftaħru bina,+ sabiex tkunu tistgħu twieġbu lil dawk li jiftaħru bid-​dehra taʼ barra,+ u mhux bil-​qalb.+ 13 Għax jekk ma konniex f’sensina,+ dan kien għal Alla; jekk aħna moħħna f’loku,+ dan hu għalikom. 14 Għax l-​imħabba li għandu l-​Kristu ġġegħelna, peress li dan iġġudikajna, li bniedem wieħed miet għal kulħadd;+ mela, allura, kollha mietu; 15 u miet għal kulħadd biex dawk li jgħixu ma jgħixux iktar għalihom infushom,+ imma għal dak+ li miet għalihom u ġie mqajjem.+

16 Għaldaqstant, minn issa ’l quddiem ma nafu lil ħadd skond il-​laħam.+ Saħansitra jekk konna nafu lil Kristu skond il-​laħam,+ żgur li issa ma nafuhx iktar hekk.+ 17 Għaldaqstant, jekk xi ħadd hu f’unjoni maʼ Kristu, hu ħolqien ġdid;+ l-​affarijiet qodma għaddew,+ ara, affarijiet ġodda bdew jeżistu.+ 18 Imma kollox hu minn Alla, li reġaʼ ħabbibna+ miegħu permezz taʼ Kristu u tana l-​ministeru+ tar-​rikonċiljazzjoni, 19 jiġifieri, li permezz taʼ Kristu,+ Alla kien qed jerġaʼ jħabbeb lid-​dinja+ miegħu,+ billi m’għaddilhomx nuqqasijiethom,+ u fada f’idejna l-​kelma+ tar-​rikonċiljazzjoni.+

20 Għalhekk, aħna+ ambaxxaturi+ li jissostitwixxu lil Kristu,+ bħallikieku Alla qed jitlob bil-​ħrara permezz tagħna.+ Bħala sostituti għal Kristu nitolbu bil-​ħniena:+ “Erġgħu tħabbu m’Alla.” 21 Lil dak li kien bla dnub+ għamlu dnub+ għalina, sabiex aħna nsiru l-​ġustizzja+ t’Alla permezz tiegħu.

6 Waqt li naħdmu flimkien miegħu,+ nitolbukom bil-​ħrara wkoll biex ma taċċettawx il-​qalb tajba mhix mistħoqqa t’Alla u titilfu l-​iskop tagħha.+ 2 Għax hu jgħid: “Fi żmien aċċettabbli smajtek, u f’jum taʼ salvazzjoni għentek.”+ Ara! Issa speċjalment hu ż-​żmien aċċettabbli.+ Ara! Issa hu jum is-​salvazzjoni.+

3 Bl-ebda mod m’aħna noħolqu xi raġuni għal tfixkil,+ biex ħadd ma jsib xi jgħid fil-​ministeru tagħna;+ 4 imma b’kull mod nirrikkmandaw+ lilna nfusna bħala ministri t’Alla billi nissaportu ħafna affarijiet, fit-​tribulazzjonijiet, fil-​bżonn, fid-​diffikultajiet,+ 5 fis-swat, fil-​ħabsijiet,+ fit-​taqlib, fit-​taħbit, fl-​iljieli bla rqad, fi żminijiet mingħajr ikel,+ 6 bis-safa, bl-​għarfien, bis-​sabar fit-​tul,+ bil-​qalb tajba,+ bl-​ispirtu qaddis, bl-​imħabba ħielsa mill-​ipokrisija,+ 7 bi kliem mimli verità, bil-​qawwa t’Alla;+ bl-​armi+ tal-​ġustizzja fuq il-​lemin u fuq ix-​xellug,* 8 bil-glorja u bid-​diżunur, b’fama ħażina u b’fama tajba; bħala qarriqin+ iżda ngħidu l-​verità, 9 bħala mhux magħrufin iżda qed niġu rikonoxxuti,+ bħala li qed immutu iżda, ara, qed ngħixu,+ bħala dixxiplinati+ iżda mhux mogħtijin għall-​mewt,+ 10 bħala mnikktin imma dejjem nithennew, bħala fqar imma nagħmlu lil ħafna sinjuri, bħala li m’għandna xejn iżda għandna kollox.+

11 Ftaħna fommna għalikom, Korintin, wessajna qalbna.+ 12 M’hemmx nuqqas taʼ wisaʼ għalikom fina,+ imma hemm nuqqas taʼ wisaʼ fl-​affezzjoni tenera tagħkom.+ 13 Għalhekk, biex tpattulna—inkellimkom bħallikieku tfal+—wessgħu qalbkom intom ukoll.

14 Tintrabtux taħt madmad li mhux indaqs maʼ dawk li ma jemmnux.+ Għax xi sħubija hemm bejn il-​ġustizzja u l-​ksur tal-​liġi?+ Jew x’għandu x’jaqsam id-​dawl mad-​dlam?+ 15 Iktar minn hekk, xi qbil hemm bejn Kristu u Beljal?*+ Jew x’sehem+ għandu min hu leali maʼ min ma jemminx? 16 U xi ftehim għandu t-​tempju t’Alla maʼ l-​idoli?+ Għax aħna tempju+ t’Alla ħaj; bħalma qal Alla: “Ngħammar fosthom+ u nimxi fosthom, u nkun Alla tagħhom, u huma jkunu l-​poplu tiegħi.”+ 17 “‘Għalhekk, oħorġu minn ġo nofshom, u nfirdu minn magħhom,’ jgħid Ġeħova, ‘u tibqgħux tmissu dak li mhux nadif’”;+ “‘u jien nilqagħkom.’”+ 18 “‘U nkun missier għalikom,+ u intom tkunu għalija wlied subien u bniet,’+ jgħid Ġeħova li Jistaʼ Kollox.”+

7 Għalhekk, maħbubin, ladarba għandna dawn il-​wegħdi+ ħa nitnaddfu+ minn kull tinġis tal-​laħam u taʼ l-​ispirtu,+ u nipperfezzjonaw il-​qdusija fil-​biżaʼ t’Alla.+

2 Agħmlu l-​wisaʼ għalina f’qalbkom.+ Lil ħadd m’għamilna ħsara, lil ħadd ma kkorrompejna, u minn ħadd ma pprofittajna ruħna.+ 3 Ma ngħidx dan biex nikkundannakom. Għax diġà għedtilkom li qegħdin fi qlubna, sew jekk ngħixu u sew jekk immutu.+ 4 Nistaʼ nitkellem magħkom b’libertà kbira. Inħossni kburi ħafna bikom.+ Jien mimli faraġ;+ qed infur bil-​ferħ fis-​sofferenzi kollha tagħna.+

5 Fil-fatt, meta wasalna l-​Maċedonja,+ ma sibniex serħan,+ imma bqajna nsofru+ b’kull mod u manjiera—kien hemm ġlied barra u biżaʼ ġewwa. 6 Madankollu Alla, li jfarraġ+ lill-​imgħakksin, farraġna bil-​preżenza taʼ Titu; 7 iżda mhux biss bil-​preżenza tiegħu, imma wkoll bil-​faraġ li hu kien tfarraġ bikom, għax reġaʼ qalilna+ dwar ix-​xewqa tagħkom, in-​niket tagħkom, iż-​żelu tagħkom għalija, u b’hekk jien thennejt bil-​wisq iktar.

8 Għalhekk, anki jekk sewwidtilkom qalbkom bl-​ittra tiegħi,+ ma jiddispjaċinix. U jekk għall-​ewwel iddispjaċieni, (qed nara li dik l-​ittra sewditilkom qalbkom, għalkemm għal ftit,) 9 issa nithenna, mhux għax sewwidtu qalbkom, imma għax is-​swied taʼ qalb wassalkom għall-​indiema;+ għax sewwidtu qalbkom fi qbil mar-​rieda t’Alla,+ biex f’xejn ma ssofru ħsara minħabba fina. 10 Għax is-​swied taʼ qalb fi qbil mar-​rieda t’Alla jġib l-​indiema għas-​salvazzjoni li ħadd m’għandu jiddispjaċih minnha;+ imma s-​swied taʼ qalb tad-​dinja jipproduċi l-​mewt.+ 11 Għax ara l-​fatt li sewwidtu qalbkom fi qbil mar-​rieda t’Alla+ x’ħeġġa kbira pproduċa fikom, iva, tindif mill-​ħtija, iva, għadab minħabba l-​ħażen, iva, biżaʼ t’Alla, iva, xenqa, iva, żelu, iva, korrezzjoni tal-​ħażen!+ F’kull aspett urejtu li intom safjin f’din il-​ħaġa. 12 Żgur li għalkemm ktibtilkom, dan m’għamiltux għal dak li għamel il-​ħażen,+ lanqas għal dak li sofra l-​ħażen, imma biex il-​ħeġġa tagħkom għalina tkun tidher fostkom quddiem Alla. 13 Huwa għalhekk li ġejna mfarrġin.

Madankollu, minbarra li tfarraġna, thennejna jerġaʼ wisq iktar minħabba l-​ferħ taʼ Titu, għax l-​ispirtu tiegħu+ ġie mserraħ minnkom ilkoll. 14 Għax jekk ftaħart xi ftit dwarkom miegħu, ma ġegħeltunix nistħi; imma bħalma għednielkom il-​verità f’kollox, hekk ukoll il-​ftaħir tagħna+ quddiem Titu deher ċar li hu veru. 15 Ukoll, l-​affezzjoni tenera tiegħu għalikom hi ħafna iktar kotrana, għax jiftakar l-​ubbidjenza tagħkom+ ilkoll, kif ilqajtuh bil-​biżaʼ u t-​tregħid. 16 Nithenna li b’kull mod nistaʼ nimtela bil-​kuraġġ minħabba fikom.+

8 Issa rridukom tkunu tafu, ħuti, dwar il-​qalb tajba mhix mistħoqqa t’Alla li ntweriet lill-​kongregazzjonijiet tal-​Maċedonja+ 2 li kienu għaddejjin minn prova kbira taʼ ħafna sofferenzi. Madankollu, minkejja l-​faqar bla qjies tagħhom, tqanqlu minn ferħ kbir u wrew li kienu għonja spiritwalment permezz tal-​ġenerożità kbira tagħhom.+ 3 Għax skond kemm setgħu,+ iva, nixhdilhom li kien saħansitra iktar milli setgħu, 4 minn jeddhom baqgħu jitolbuna bi ħrara kbira biex ikollhom il-​privileġġ li jagħtu b’qalb tajba u jieħdu sehem fil-​ministeru li kellu jsir lill-​qaddisin.+ 5 U mhux biss kif ittamajna, imma l-​ewwel taw ruħhom lill-​Mulej+ u mbagħad lilna permezz tar-​rieda t’Alla. 6 Dan wassalna biex ninkuraġġixxu lil Titu+ sabiex, bħalma kien hu li ta bidu għal dan fostkom, hekk ukoll ikun hu li jtemm dan l-​istess għoti b’qalb tajba min-​naħa tagħkom. 7 Madankollu, bħalma qed toktru f’kollox,+ fil-​fidi u l-​kelma u l-​għarfien+ u l-​ħeġġa kollha u f’din l-​imħabba li għandna għalikom, jalla toktru wkoll f’dan l-​għoti b’qalb tajba.

8 Qed ngħid dan mhux biex nikkmandakom+ imma minħabba l-​ħeġġa t’oħrajn u biex nara kemm hi ġenwina l-​imħabba tagħkom. 9 Għax intom tafu l-​qalb tajba mhix mistħoqqa tal-​Mulej tagħna Ġesù Kristu, li għalkemm kien għani sar fqir minħabba fikom,+ biex intom issiru għonja+ permezz tal-​faqar tiegħu.

10 U f’dan nagħti l-​opinjoni tiegħi:+ għax din il-​ħaġa hi taʼ benefiċċju għalikom,+ peress li sena ilu mhux biss kontu diġà bdejtu tagħmlu dan imma wkoll ridtu tagħmluh;+ 11 għalhekk, issa, temmu wkoll dak li bdejtu tagħmlu sabiex, bħalma kontu lesti li tagħmluh minn qalbkom, hekk ukoll ittemmuh skond ma tistgħu. 12 Għax jekk l-​ewwel ikun hemm ir-​rieda, din tkun speċjalment aċċettabbli skond dak li jkollu l-​individwu,+ mhux skond dak li ma jkollux. 13 Għax ma rridx li dan ikun faċli għal oħrajn,+ iżda iebes għalikom; 14 imma biex kulħadd ikun indaqs, bħalissa ż-​żejjed tagħkom jagħmel tajjeb għan-​nieqes tagħhom, sabiex iż-​żejjed tagħhom għad ukoll jagħmel tajjeb għan-​nieqes tagħkom, u b’hekk kulħadd ikun indaqs.+ 15 Bħalma hu miktub: “Min kellu ħafna ma kellux żejjed, u min kellu ftit ma kellux nieqes.”+

16 Issa rrodd ħajr lil Alla talli poġġa l-​istess ħeġġa għalikom f’qalb Titu,+ 17 għax tabilħaqq aġixxa meta ngħata l-​inkuraġġiment, imma peress li hu mimli ħeġġa, ġej għandkom minn jeddu. 18 Miegħu qed nibagħtu wkoll lill-​ħu li qed jiġi mfaħħar fil-​kongregazzjonijiet kollha għal dak li qed jagħmel għall-​aħbar tajba. 19 Mhux hekk biss, imma nħatar+ ukoll mill-​kongregazzjonijiet biex jivvjaġġa magħna minħabba din l-​għotja b’qalb tajba li trid tiġi amministrata minna għall-​glorja+ tal-​Mulej u bħala prova tar-​rieda tagħna.+ 20 B’hekk qed nevitaw li jkun hemm min isib xi ħtija+ fina rigward din il-​kontribuzzjoni ġeneruża+ li trid tiġi amministrata minna. 21 Għax aħna “nipprovdu onestament mhux biss quddiem Ġeħova imma wkoll quddiem il-​bnedmin.”+

22 Iktar minn hekk, qed nibagħtu magħhom lil ħuna li spiss u f’ħafna affarijiet sibnieh li għandu ħeġġa, imma li issa għandu ħafna iktar ħeġġa minħabba l-​fiduċja kbira tiegħu fikom. 23 Iżda jekk hemm xi dubju dwar Titu, hu sieħbi u ħaddiem miegħi+ għall-​interessi tagħkom; jew dwar ħutna, huma appostli tal-​kongregazzjonijiet u glorja taʼ Kristu. 24 Għalhekk, agħtuhom prova taʼ mħabbitkom+ u taʼ dak li ftaħarna+ bikom, quddiem il-​kongregazzjonijiet.

9 Issa dwar il-​ministeru+ għall-​qaddisin, ikun żejjed li niktbilkom, 2 għax naf bir-​rieda tagħkom li dwarha qed niftaħar bikom mal-​Maċedonin, li issa l-​Akaja ilha sena għal-​lest biex tgħin,+ u ż-​żelu tagħkom qanqal il-​biċċa l-​kbira minnhom. 3 Imma qed nibgħat lill-​aħwa, sabiex il-​ftaħir tagħna bikom f’dan ir-​rigward ma jkunx għalxejn, u tkunu tassew lesti,+ bħalma kont ngħid li se tkunu. 4 Inkella, kieku b’xi mod kellhom jiġu miegħi xi Maċedonin u ma jsibukomx lesti, aħna—biex ma ngħidx intom—niġu mġegħlin nistħu minn din il-​fiduċja tagħna. 5 Għalhekk, ħassejt il-​bżonn li ninkuraġġixxi lill-​aħwa biex jiġu għandkom minn qabel u jlestu l-​għotja ġeneruża tagħkom li wegħedtu minn qabel,+ sabiex b’hekk din tkun lesta bħala għotja ġeneruża u mhux bħala xi ħaġa mogħtija bilfors.+

6 Imma rigward dan, min jiżraʼ bil-​qjies+ jaħsad ukoll bil-​qjies; u min jiżraʼ bil-​kotra+ jaħsad ukoll bil-​kotra. 7 Ħa jagħmel kull wieħed bħalma jkun iddeċieda f’qalbu, mhux kontra qalbu+ jew bilfors, għax Alla jħobb lil min jagħti bil-​ferħ.+

8 Iktar minn hekk, Alla kapaċi jkattar għalikom il-​qalb tajba mhix mistħoqqa kollha tiegħu biex, waqt li dejjem u f’kollox ikollkom bis-​sħiħ kulma għandkom bżonn, ikollkom bl-​abbundanza għal kull għemil tajjeb.+ 9 (Bħalma hu miktub: “Hu qassam bil-​kotra, ta lill-​foqra, il-​ġustizzja tiegħu tibqaʼ għal dejjem.”+ 10 Issa dak li jagħti b’abbundanza ż-​żerriegħa lil dak li jiżraʼ u l-​ħobż għall-​ikel+ jagħtikom u jkattrilkom iż-​żerriegħa x’tiżirgħu u jżid il-​prodotti tal-​ġustizzja tagħkom.)+ 11 F’kollox qed tiġu mogħnijin għal kull xorta taʼ ġenerożità, li permezz tagħna tipproduċi espressjoni taʼ radd il-​ħajr lil Alla;+ 12 għax il-​ministeru taʼ dan is-​servizz pubbliku m’huwiex biss li nipprovdu bl-​abbundanza l-​bżonnijiet tal-​qaddisin+ imma wkoll li nkunu għonja b’ħafna espressjonijiet taʼ radd il-​ħajr lil Alla. 13 Permezz tal-​prova li jagħti dan il-​ministeru, huma jigglorifikaw lil Alla għax intom sottomessi lejn l-​aħbar tajba dwar il-​Kristu,+ bħalma tistqarru pubblikament li intom, u għax intom ġenerużi fil-​kontribuzzjoni li tagħtu lilhom u lil kulħadd;+ 14 u waqt li jitolbu bil-​ħerqa għalikom, jixxennqu għalikom minħabba l-​qalb tajba mhix mistħoqqa+ straordinarja li Alla wera magħkom.

15 Grazzi lil Alla għall-​għotja b’xejn tiegħu li ma tistax tiġi deskritta.+

10 Issa jien, Pawlu, nitlobkom bil-​ħrara minħabba l-​ħlewwa+ u l-​qalb tajba+ tal-​Kristu, għalkemm jien umli f’persunti fostkom,+ imma meta ma nkunx preżenti nkun qalbieni lejkom.+ 2 Tabilħaqq, nitlobkom bil-​ħniena biex meta nkun preżenti ma jkollix għalfejn nuża l-​qlubija b’dik il-​fiduċja li qed niddependi minnha biex nieħu azzjoni qalbiena+ kontra xi wħud li jqisuna bħallikieku konna qed nimxu skond dak li aħna fil-​laħam. 3 Għax għalkemm nimxu f’ġisem tal-​laħam,+ ma niggwerrawx skond dak li aħna fil-​laħam.+ 4 Għax l-​armi li niggwerraw bihom m’humiex tal-​laħam,+ imma huma qawwijin permezz t’Alla+ biex inwaqqgħu affarijiet li jkunu stabbiliti fis-​sod. 5 Għax qed inwaqqgħu r-​raġunamenti u kull kburija li tqum kontra l-​għarfien dwar Alla;+ u qed injassru kull ħsieb biex nagħmluh ubbidjenti lejn il-​Kristu; 6 u qed inżommu ruħna għal-​lest biex nikkastigaw kull diżubbidjenza,+ malli l-​ubbidjenza tagħkom tkun intweriet għalkollox.+

7 Intom tħarsu lejn l-​affarijiet skond kif jidhru minn barra.+ Jekk xi ħadd hu fiduċjuż fih innifsu li hu taʼ Kristu, ħa jerġaʼ jqis dan il-​fatt li, bħalma hu taʼ Kristu, hekk ukoll aħna taʼ Kristu.+ 8 Għax anki jekk niftaħar+ xi naqra żżejjed dwar l-​awtorità li tana l-​Mulej biex nibnukom u mhux biex inġarrfukom,+ ma niġix imġiegħel nistħi, 9 sabiex ma nidhirx li rrid inwerwirkom bl-​ittri tiegħi. 10 Għax jgħidu: “L-​ittri tiegħu huma serji u qawwijin, imma l-​preżenza tiegħu meta jkun fostna hi dgħajfa+ u kliemu taʼ min jistmerru.”+ 11 Min jgħid hekk ħa jqis dan, li skond m’aħna fi kliemna bl-​ittri tagħna meta ma nkunux hemmhekk, hekk ukoll se nkunu fl-​azzjoni meta nkunu preżenti magħkom.+ 12 Għax ma nissograwx nikklassifikaw jew inqabblu ruħna maʼ xi wħud li jirrikkmandaw lilhom infushom.+ Ċertament li meta jkejlu lilhom infushom bihom infushom u jqabblu ruħhom magħhom infushom ma jkunu fehmu xejn.+

13 Min-naħa tagħna ma niftaħrux barra l-​limiti tat-​territorju li ngħatajna,+ imma skond il-​qjies tat-​territorju li qassmilna Alla, li għamlu jwassal safejn qegħdin intom.+ 14 Tassew m’aħniex qed naqbżu l-​limiti bħallikieku m’intomx fit-​territorju tagħna, għax aħna konna l-​ewwel li wasalna safejn qegħdin intom biex inxandru l-​aħbar tajba dwar il-​Kristu.+ 15 Le, m’aħniex qed niftaħru barra l-​limiti tat-​territorju li ngħatajna, bit-​taħbit taʼ ħaddieħor,+ imma għandna t-​tama li, bħalma qed tikber il-​fidi tagħkom,+ aħna nikbru fostkom fit-​territorju tagħna.+ Imbagħad noktru iktar u iktar, 16 biex inxandru l-​aħbar tajba lill-​pajjiżi lil hinn minnkom,+ sabiex ma niftaħrux bit-​territorju taʼ ħaddieħor fejn l-​affarijiet tħejjew diġà. 17 “Imma min jiftaħar, ħa jiftaħar b’Ġeħova.”+ 18 Għax mhux min jirrikkmanda lilu nnifsu hu approvat,+ imma min jirrikkmandah+ Ġeħova.+

11 Nixtieqkom tittollerawni għax se nkun ftit bla raġuni.+ Iva, fil-​fatt, qed tittollerawni! 2 Għax jien għajjur għalikom b’għira bħal dik t’Alla,+ għax jien stess wegħedtkom fiż-​żwieġ+ lil għarus wieħed+ biex nippreżentakom bħala verġni safja+ lill-​Kristu.+ 3 Imma nibżaʼ li b’xi mod, bħalma s-​serp qarraq b’Eva+ bil-​makakkerija tiegħu, moħħkom isir korrott+ u jitbiegħed mis-​sinċerità u s-​safa li jistħoqqlu l-​Kristu.+ 4 Għax, fil-​fatt, jekk jiġi xi ħadd jippriedka xi Ġesù ieħor minflok dak li ppridkajna aħna,+ jew tirċievu xi spirtu ieħor minflok dak li rċivejtu,+ jew xi aħbar tajba+ oħra minflok dik li aċċettajtu, intom faċilment tittollerawh.+ 5 Għax inqis li f’xejn ma wrejt li jien inferjuri+ għall-​appostli raffinati żżejjed tagħkom.+ 6 Imma anki jekk m’iniex kapaċi nitkellem,+ żgur li kapaċi fl-​għarfien;+ u dan urejnihulkom f’kollox u b’kull mod.+

7 Jew dnibt jien meta umiljajt ruħi+ biex intom titgħollew, għax xandartilkom bil-​ferħ l-​aħbar tajba t’Alla bla ħlas?+ 8 Sraqt lil kongregazzjonijiet oħrajn billi aċċettajt proviżjonijiet biex naqdi lilkom;+ 9 iżda meta kont preżenti magħkom u ġejt fil-​bżonn, ma kont taʼ piż għal ħadd,+ għax l-​aħwa li ġew mill-​Maċedonja+ pprovdew bl-​abbundanza dak li kien jonqosni. Iva, b’kull mod bqajt ma nkunx taʼ piż għalikom u hekk se nibqaʼ.+ 10 Bħalma l-​verità+ taʼ Kristu qiegħda fija, dan il-​ftaħir tiegħi+ fir-​reġjuni taʼ l-​Akaja mhux se jieqaf. 11 Dan għala? Għax ma nħobbkomx? Alla jaf li nħobbkom.+

12 Issa li qed nagħmel nibqaʼ nagħmlu,+ biex ma nagħtix il-​wisaʼ għal xi skuża lil dawk li jridu skuża biex jitqiesu li huma daqsna fil-​kariga li jiftaħru biha. 13 Għax dawn l-​irġiel huma appostli foloz, ħaddiema qarriqin,+ li jinbidlu f’appostli taʼ Kristu.+ 14 U ma nistagħġibx, għax Satana nnifsu jibqaʼ jinbidel f’anġlu tad-​dawl.+ 15 Għalhekk, mhix ħaġa kbira li l-​ministri tiegħu+ wkoll jibqgħu jinbidlu f’ministri tal-​ġustizzja. Imma tmiemhom ikun skond għemilhom.+

16 Nerġaʼ ngħid, Ħa ma jaħseb ebda bniedem li jien bla raġuni. Xorta waħda, jekk tassew taħsbu dan, aċċettawni anki jekk bħala bniedem bla raġuni, biex jien ukoll niftaħar xi ftit.+ 17 Dak li ngħid ma ngħidux fuq l-​eżempju tal-​Mulej, imma bħallikieku kont bniedem bla raġuni, b’din il-​prużunzjoni li hi karatteristika tal-​ftaħir.+ 18 Ladarba ħafna qed jiftaħru skond il-​laħam,+ jien ukoll se niftaħar. 19 Għax intom tittolleraw bil-​ferħ lil min hu bla raġuni, peress li intom raġunevoli. 20 Fil-fatt, intom tittolleraw lil kulmin ijassarkom,+ lil kulmin jiblaʼ dak li għandkom, lil kulmin jaħtaf dak li għandkom, lil kulmin jogħla fuqkom, lil kulmin jagħtikom bil-​ħarta.+

21 Ngħid dan b’diżunur għalina, bħallikieku l-​pożizzjoni tagħna kienet dgħajfa.

Imma f’dak li ħaddieħor jaġixxi bil-​qlubija—m’iniex nitkellem b’mod raġunevoli+—jien ukoll qed naġixxi bil-​qlubija. 22 Huma Ebrej? Jien ukoll.+ Huma Israelin? Jien ukoll. Huma nisel Abraham? Jien ukoll.+ 23 Huma ministri taʼ Kristu? Inwieġeb bħal wieħed miġnun, jien nispikka ferm iktar minnhom:+ fit-​taħbit ħafna iktar,+ fil-​ħabs ħafna iktar,+ fis-​swat wisq iżjed, f’ħalq il-​mewt taʼ spiss.+ 24 Mingħand il-​Lhud ħames darbiet qlajt erbgħin daqqa+ neqsin waħda, 25 tliet darbiet ġejt imsawwat bil-​bsaten,+ darba ġejt imħaġġar,+ tliet darbiet ġarrabt nawfraġju,+ ġurnata u lejl qattajt f’baħar fond; 26 fi vjaġġi spiss, f’perikli mix-​xmajjar, f’perikli mill-​ħallelin,+ f’perikli mir-​razza tiegħi stess,+ f’perikli mill-​ġnus,+ f’perikli fil-​belt,+ f’perikli fix-​xagħri, f’perikli fil-​baħar, f’perikli fost aħwa foloz, 27 f’taħbit u tbatija, fi ljieli bla rqad spiss,+ bil-​ġuħ u bil-​għatx,+ f’sawm+ bosta drabi, f’kesħa u għera.

28 Minbarra dawn l-​affarijiet esterni, hemm dak li nħabbat wiċċi miegħu minn jum għal jum, l-​ansjetà għall-​kongregazzjonijiet kollha.+ 29 Min hu dgħajjef,+ u ma nkunx dgħajjef jien ukoll? Min jiġi mfixkel, u jien ma nitbaqbaqx?

30 Jekk għandu jkun hemm il-​ftaħir, niftaħar+ b’dak li għandu x’jaqsam mad-​dgħjufija tiegħi. 31 Alla u Missier il-​Mulej Ġesù, Dak li għandu jiġi mfaħħar għal dejjem, jaf li m’iniex nigdeb. 32 F’Damasku, il-​gvernatur, taħt is-​sultan Areta, kien qed jgħasses il-​belt tad-​Damaxxeni biex jaqbadni,+ 33 imma niżżluni f’qoffa+ minn tieqa fis-​sur u ħrabt minn taħt idejh.

12 Ikolli niftaħar. M’huwiex taʼ benefiċċju; imma se ngħaddi għal viżjonijiet+ sopranaturali u rivelazzjonijiet tal-​Mulej. 2 Naf raġel f’unjoni maʼ Kristu li erbatax-il sena ilu—jekk hux fil-​ġisem jew barra mill-​ġisem ma nafx; Alla jaf—ittieħed f’daqqa waħda+ b’dan il-​mod lejn it-​tielet sema. 3 Iva, naf raġel bħal dan—jekk hux fil-​ġisem jew mingħajr il-​ġisem+ ma nafx, Alla jaf— 4 li ttieħed fil-​ġenna+ u semaʼ kliem li ma jitlissinx u li skond il-​liġi ebda bniedem ma jistaʼ jgħidu. 5 B’raġel bħal dan niftaħar, u mhux bija nnifsi, ħlief bid-​dgħjufijiet tiegħi.+ 6 Għax jekk xi darba nkun irrid niftaħar,+ ma nkunx bniedem bla raġuni, għax inkun qed ngħid il-​verità. Imma nżomm lura, sabiex ħadd ma jagħtini kredtu għal xi ħaġa iktar milli jara fija jew jismaʼ mingħandi, 7 sempliċement minħabba l-​ħafna rivelazzjonijiet.

Għalhekk, biex ma nitgħolliex iżżejjed,+ ngħatajt xewka fil-​laħam,+ anġlu taʼ Satana, biex tibqaʼ ssawwatni, sabiex ma nitgħolliex iżżejjed. 8 Minħabba f’hekk, tliet darbiet+ tlabt bil-​ħrara lill-​Mulej biex titbiegħed minni; 9 iżda hu fil-​fatt qalli: “Il-​qalb tajba mhix mistħoqqa tiegħi hi biżżejjed+ għalik; għax il-​qawwa tiegħi tintgħamel perfetta fid-​dgħjufija.”+ Għalhekk, b’ferħ kbir, nippreferi niftaħar bid-​dgħjufijiet tiegħi+ biex il-​qawwa tal-​Kristu tibqaʼ fuqi bħal tinda. 10 Għaldaqstant nitgħaxxaq bid-​dgħjufijiet, bl-​insulti, bl-​għaks, bil-​persekuzzjonijiet u d-​diffikultajiet, għal Kristu. Għax meta nkun dgħajjef, inkun setgħan.+

11 Jien sirt bniedem bla raġuni. Intom ġegħeltuni+ nsir hekk, għax imissni ġejt rikkmandat minnkom. Għax lanqas f’ħaġa waħda ma wrejt li jien inferjuri għall-​appostli raffinati żżejjed+ tagħkom, anki jekk ma jien xejn.+ 12 Tabilħaqq, is-​sinjali t’appostlu+ saru fostkom bis-​sabar kollu,+ u b’sinjali u għeġubijiet u għemejjel setgħanin.+ 13 Għax fiex sirtu inqas mill-​bqija tal-​kongregazzjonijiet, ħlief li jien ma sirtx taʼ piż għalikom?+ Kunu qalbkom tajba u aħfruli dan in-​nuqqas.

14 Ara! Din hi t-​tielet darba+ li lest li niġi għandkom, iżda m’iniex se nkun taʼ piż. Għax mhux qed niġri wara ġidkom,+ imma warajkom; għax it-​tfal+ m’għandhomx ifaddlu għall-​ġenituri, imma l-​ġenituri għal uliedhom.+ 15 Min-naħa tiegħi, b’ferħ kbir nonfoq u nintefaq għalkollox għal ruħkom.+ Jekk inħobbkom b’mod tant abbundanti, għandi nkun maħbub inqas? 16 Hu x’inhu l-​każ, ma kontx taʼ piż għalikom.+ Madankollu, intom tgħidu li jien kont “makakk” u qbadtkom “b’ingann.”+ 17 Rigward kull wieħed minn dawk li bgħattilkom, ma pprofittajtx ruħi minnkom permezz tiegħu, hux hekk? 18 Ħeġġiġt lil Titu u miegħu bgħatt lill-​ħu. Lanqas Titu ma pprofitta ruħu minnkom, hux hekk?+ Imxejna fl-​istess spirtu,+ hux hekk? Fl-​istess passi, hux hekk?

19 Dan il-​ħin kollu kontu qed taħsbu li aħna konna qed nagħmlu d-​difiża tagħna lilkom? Quddiem Alla qed nitkellmu f’unjoni maʼ Kristu. Imma, maħbubin, kollox isir biex jgħinkom tinbnew.+ 20 Għax nibżaʼ li b’xi mod, meta nasal,+ ma nsibkomx kif nixtieq u jien ma nkunx għalikom kif tixtiequ, imma, minflok, b’xi mod ikun hemm ġlied, għira,+ każi taʼ rabja, tilwim, tqasqis, tfesfis, każi taʼ kburija, diżordni.+ 21 Forsi, meta nerġaʼ niġi, Alla tiegħi jumiljani fostkom, u nitnikket minħabba ħafna li kienu dinbu+ u ma nidmux min-​nuqqas taʼ ndafa u ż-​żína+ u l-​kondotta laxka+ li pprattikaw.

13 Din hi t-​tielet darba+ li ġej għandkom. “Kull ħaġa trid tiġi stabbilita minn fomm żewġ xhieda jew tlieta.”+ 2 Għedt qabel u, bħallikieku kont preżenti magħkom it-​tieni darba iżda issa m’iniex, ngħid bil-​quddiem lil dawk li kienu dinbu u lill-​oħrajn kollha, li jekk xi darba nerġaʼ niġi m’iniex se neħlishielhom,+ 3 ladarba qed tfittxu prova li Kristu qed jitkellem fija,+ Kristu, li mhux dgħajjef lejkom imma hu setgħan fostkom. 4 Tabilħaqq, veru li ġie msammar maʼ zokk+ minħabba d-​dgħjufija,+ imma issa hu ħaj minħabba l-​qawwa t’Alla.+ Ukoll, veru li aħna dgħajfin miegħu, imma se ngħixu miegħu+ minħabba l-​qawwa t’Alla+ lejkom.

5 Ibqgħu għarblu jekk intomx fil-​fidi, ibqgħu agħtu prova taʼ x’intom.+ Jew ma tirrikonoxxux li Ġesù Kristu hu f’unjoni magħkom?+ Sakemm m’intomx diżapprovati. 6 Jien nittama verament li ssiru tafu li m’aħniex diżapprovati.

7 Issa nitolbu+ lil Alla biex intom ma tagħmlu ebda ħażen, mhux biex nidhru li aħna approvati, imma biex tkunu qed tagħmlu t-​tajjeb, għalkemm aħna forsi nidhru diżapprovati. 8 Għax ma nistgħu nagħmlu xejn kontra l-​verità, imma biss favur il-​verità.+ 9 Dejjem nifirħu, meta intom tkunu setgħanin,+ avolja fl-​istess ħin aħna nkunu dgħajfin; u għal dan qed nitolbu,+ li terġgħu tiġu aġġustati. 10 Huwa għalhekk li qed nikteb dan waqt li m’iniex magħkom, biex, meta nkun preżenti magħkom, ma nkunx aħrax+ bl-​awtorità li tani l-​Mulej, sabiex nibni+ u mhux inġarraf.

11 Fl-aħħarnett, ħuti, komplu thennew, aġġustaw ruħkom, tfarrġu,+ kunu ħsieb wieħed,+ għixu fil-​paċi;+ u l-​Alla taʼ l-​imħabba u tal-​paċi+ jkun magħkom. 12 Agħtu merħba lil xulxin b’bewsa qaddisa.+ 13 Il-qaddisin kollha jibagħtu jsellu għalikom.

14 Il-qalb tajba mhix mistħoqqa tal-​Mulej Ġesù Kristu u l-​imħabba t’Alla u s-​sehem fl-​ispirtu qaddis ikunu magħkom ilkoll.+